రతన్ టాటాను పోలింగ్ కేంద్రానికి తీసుకెళ్లిన కుర్రాడు శంతను నాయుడు ఎవరు? వీరు క్లోజ్ ఫ్రెండ్స్ ఎలా అయ్యారు?

ఇటీవల ముంబయిలో లోక్‌సభ ఎన్నికల పోలింగ్ సందర్భంగా ప్రముఖ పారిశ్రామికవేత్త రతన్ టాటాను ఒక యువకుడు పోలింగ్ కేంద్రానికి తీసుకొచ్చారు.

86 ఏళ్ల వయసున్న రతన్ టాటాను చేయి పట్టుకుని తీసుకొచ్చిన ఈ యువకుడు ఆయనకు సహాయకుడు అయ్యుంటారు అనుకుంటే పొరపాటే. ఈ యువకుడు రతన్ టాటాకు ‘క్లోజ్ ఫ్రెండ్’. అవును.. నిజమే! రతన్ టాటాకు, ఈ కుర్రాడికి ఉన్న అనుబంధం అలాంటిది.

ఈ యువకుడి పేరు శంతను నాయుడు. వయసు 31 ఏళ్లు. వీరి కుటుంబం పుణెలో స్థిరపడింది.

రతన్ టాటాకు అత్యంత దగ్గరి మిత్రుల్లో శంతను నాయుడు ఒకరు. రతన్ టాటా ఎక్కడికి వెళ్లినా ఆయన వెంట ఈ యువకుడు కూడా ఉంటారు.

ఇతర స్నేహితుల్లానే హెయిర్‌ కట్‌లు చేయించుకోవడం నుంచి సినిమాలు చూడటం వరకు ఎక్కడికైనా రతన్, శంతను కలిసే వెళ్తుంటారు.

వయసులో 50 ఏళ్లకు పైగా అంతరం ఉన్న వీరి స్నేహం గురించి తెలుసుకుని ఆశ్చర్యపోతుంటారు. అయితే, తనకది చాలా ప్రత్యేకమని శంతను నాయుడు అంటున్నారు.

‘‘రతన్ నాకు కఠినంగా వ్యవహరించే బాస్. మంచి మార్గదర్శి. నన్ను బాగా అర్థం చేసుకునే మంచి మిత్రుడు’’ అని ఆయన గతంలో బీబీసీతో చెప్పారు.

రతన్ టాటా, శంతను నాయుడు మధ్య స్నేహం ఎలా మొదలైంది?

టాటా గ్రూప్ సంస్థల్లో శంతను ఐదో తరం ఉద్యోగి.

టాటా బ్రాండ్‌తో ఆయన కుటుంబానికి బలమైన అనుబంధం ఉన్నా, ఆ సంస్థకు కీలకమైన వ్యక్తిని తాను కలుస్తానని ఆయన ఎప్పుడూ అనుకోలేదు.

వీధి కుక్కలపై ఉన్న ప్రేమే వీరిద్దరినీ కలిపింది.

పుణెలోని సావిత్రభాయి ఫూలే యూనివర్సిటీలో మెకానికల్ ఇంజినీరింగ్ చదివారు. ఆ తర్వాత 2014లో పుణెలోనే ఉన్న టాటా టెక్నాలజీస్‌లో ఇంటర్న్‌షిప్ చేశారు. ఆ తర్వాత టాటా ఈఎల్‌ఎక్స్‌ఎస్‌ఐ (Tata Elxsi)లో డిజైన్‌ ఇంజినీర్‌గా చేరారు.

ఆ సమయంలో ఆయన మోటాపాస్ అనే కార్యక్రమాన్ని చేపట్టారు. వీధి కుక్కుల మెడలకు రాత్రి పూట మెరిసే కాలర్లు వేసేందుకు ఈ కార్యక్రమం చేపట్టారు. ఆయన చేస్తున్న ఈ పని గురించి సంస్థ న్యూస్‌లెటర్‌లో ప్రధానంగా వచ్చింది.

శంతను ఆలోచన నచ్చి, ఆయన్ను ముంబయికి రతన్ టాటా ఆహ్వానించారు.

‘‘వీధి కుక్కలపై ఉన్న ప్రేమ కారణంగానే తొలిసారి శంతనును కలిశాను. కళాశాల కుర్రాళ్లతో కలిసి ఓ బృందాన్ని నడిపిస్తూ, వీధి కుక్కలను అతడు చేరదీశాడు. వాటి ఆలనాపాలనా చూసుకున్నాడు’’ అని బీబీసీతో ఈ-మెయిల్ ద్వారా రతన్ టాటా చెప్పారు.

‘‘మోటోపాస్ పెరుగుతున్న కొద్దీ, మేం మరింత దగ్గరయ్యాం. పని గురించిన ఈ-మెయిళ్ల నుంచి ఒకరి గురించి ఒకరు అడిగే స్థితికి చేరుకున్నాం’’ అని శంతను చెప్పారు.

అయితే, ఆ తర్వాత అమెరికాలోని ఓ యూనివర్సిటీలో చదువుకునేందుకు శంతను భారత్‌ను వదిలి వెళ్లాల్సి వచ్చింది.

‘‘రతన్ టాటా రూపంలో నాకో మంచి మిత్రుడు దొరికారు. కానీ, అంతలోనే నేను దేశాన్ని విడిచి వెళ్లాల్సి రావడం బాధగా అనిపించింది’’ అని శంతను అన్నారు.

అయితే, ఆ తర్వాత శంతను, రతన్ టాటాల మధ్య అనుబంధం మరింత బలపడింది.

రతన్ టాటా చదువుకున్న కార్నెల్ యూనివర్సిటీలోనే శంతను చేరారు. శంతను గ్రాడ్యుయేషన్‌ డేకు రతన్ టాటా స్వయంగా హాజరయ్యారు.

‘‘ఏదో మాట్లాడుతూ నా గ్రాడ్యుయేషన్ డే గురించి ఆయనకు చెప్పా. ఆ రోజు వచ్చే సరికి ఆయన అక్కడున్నారు’’ అని శంతను చెప్పారు.

అమెరికా నుంచి భారత్‌కు తిరిగివచ్చాక రతన్ టాటా దగ్గర బిజినెస్ అసిస్టెంట్‌ ఉద్యోగంలో శంతను చేరారు.

‘‘అంతా ఒక్క నిమిషంలో మారిపోయింది. నా జీవితం ఇలా మలుపు తిరుగుతుందని నేను ఎప్పుడూ అనుకోలేదు’’ అని శంతను అన్నారు.

‘‘శంతనులోని వినూత్నత, దయాగుణం నాకు నచ్చింది. ఈ పోటీ ప్రపంచంలో అలాంటి లక్షణాలు అంతగా కనిపించవు’’ అని రతన్ టాటా అన్నారు.

బిజినెస్ అసిస్టెంట్‌గా రోజూ ఏం చేయాల్సి ఉంటుందని అడిగితే... ‘‘సమావేశాల్లో నోట్స్ రాసుకుంటా. రతన్ టాటా రాగానే ఆయనకు ఆ రోజు విషయాల గురించి క్లుప్తంగా చెప్తా. ఆ రోజు తన ప్రణాళిక ఏంటో ఆయన చెబుతారు. ఒక్కో పని చేస్తూ పోతాం. ఆయన చాలా ఫోకస్డ్‌గా ఉండే మనిషి. విరామాలు తీసుకోకుండా పని చేస్తూనే ఉంటారు’’ అని శంతను వివరించారు.

2022 నుంచి రతన్ టాటా కార్యాలయంలో జనరల్ మేనేజర్‌గా పనిచేస్తున్నారు శంతను నాయుడు.

2021లో ‘గుడ్‌ఫెలోస్ ఇండియా’ అనే స్టార్టప్‌ సంస్థను కూడా శంతను ప్రారంభించారు. ఈ యాప్‌ ద్వారా వృద్ధులు యువతతో తమ ఆలోచనలను పంచుకోవచ్చు. అలాగే వృద్ధులకు రోజువారీ పనుల్లో ఈ సంస్థ సాయపడుతుందని చెబుతున్నారు. ఈ యాప్ ప్రారంభోత్సవానికి రతన్ టాటా కూడా వచ్చారు.

అందరు స్నేహితుల్లానే వీళ్లిద్దరూ సరదాగా చాలా సమయం కలిసి గడుపుతుంటారు.

తమ ఇద్దరికీ ‘ద అదర్ గైస్’, ‘ద లోన్ రేంజర్’ లాంటి యాక్షన్ కామెడీ సినిమాలు ఇష్టమని చెబుతున్నారు శంతను. నెట్‌ఫ్లిక్స్‌లో వచ్చే ‘ఫౌడా‌’ అనే టీవీ సిరీస్‌ను రతన్ టాటా వదలకుండా ఏకబిగిన చూసేస్తుంటారని వివరించారు.

‘‘నాకేదైనా కష్టంగా అనిపిస్తే, నేను మొదట ఫోన్ చేసేది ఆయనకే. నా కోసం ఆయన ఎప్పుడూ ఉంటారు. నేను కూడా ఆయనకు అలాగే ఉండాలనుకుంటున్నా’’ అని శంతను అన్నారు.

బీబీసీ తెలుగును ఫేస్‌బుక్ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)