డోనాల్డ్ ట్రంప్ - స్టార్మీ డేనియల్స్: అమెరికా మాజీ అధ్యక్షుడిపై కేసులో ఏడు ప్రశ్నలు, సమాధానాలు

డోనాల్డ్ ట్రంప్‌పై క్రిమినల్ అభియోగాలు నమోదుచేసేందుకు ‘‘న్యూయార్క్ గ్రాండ్ జ్యూరీ’’ ఇటీవల పచ్చజెండా ఊపింది.

దీంతో తన పేరుపై క్రిమినల్ అభియోగం నమోదవుతున్న తొలి అమెరికా మాజీ అధ్యక్షుడు ఆయన కాబోతున్నారు.

ఇంతకీ ఆయనపై నిర్దిష్టంగా ఎలాంటి అభియోగాలు చేస్తారో బయటకు తెలియడం లేదు.

డిస్ట్రిక్ట్ అటార్నీ నమోదుచేసిన అభియోగపత్రాలు ప్రస్తుతం సీల్‌చేసి ఉన్నాయి. మంగళవారం వీటిని అధికారికంగా బయటకు విడుదల చేస్తారు.

అయితే, ఈ కేసు 2016లో తన అధ్యక్ష ఎన్నికల ప్రచార సమయంలో ఓ అడల్ట్ ఫిల్మ్ స్టార్‌కు చెల్లింపుల సంబంధించినది. ఆయనతోనున్న సంబంధంపై ఆమె నోరు విప్పకుండా ఉండేందుకు ఆ చెల్లింపులు చేసినట్లు ఆరోపణలు వచ్చాయి.

అసలు ఈ కేసులో ఇప్పటివరకు ఏం జరిగిందో ఒకసారి చూద్దాం..

1. ఇండిక్ట్‌మెంట్(అభియోగం) అంటే ఏమిటి?

గత గురువారం ట్రంప్‌పై అభియోగాలు మోపేందుకు గ్రాండ్ జ్యూరీ ఆమోదం తెలిపింది.

ఇండిక్ట్‌మెంట్ అంటే ఒక వ్యక్తి నేరానికి పాల్పడ్డారని లిఖితపూర్వకంగా ఆరోపణలు లేదా అభియోగాలు మోపడమే. దీన్ని నిందితులు లేదా వ్యక్తులపై దర్యాప్తు అధికారులు నమోదుచేయిస్తారు.

ఈ అభియోగపత్రంలో ఆరోపణలు ఉంటాయి. అదే ట్రంప్ కేసు విషయంలో అయితే, ఫెలోనీ చార్జెస్ (తీవ్రమైన అభియోగం) నమోదుచేస్తారు.

ఇలాంటి అభియోగాలు (ఫెలోనీ చార్జెస్) రుజువైతే శిక్ష ఏడాది లేదా అంతకంటే ఎక్కువే పడుతుంది.

దర్యాప్తు అధికారులు చేసే సాధారణ అభియోగాల కంటే ఇండిక్ట్‌మెంట్ భిన్నమైనది. ఇండిక్ట్‌మెంట్ నమోదుకు ముందుగా ఒక గ్రాండ్ జ్యూరీ దీనికి సీక్రెట్ ఓటింగ్ ద్వారా ఆమోదం తెలపాల్సి ఉంటుంది. ఈ కేసులో న్యూయార్క్‌లోని మన్‌హటన్ జ్యూరీ దీనికి ఆమోదం తెలిపింది.

ఇక్కడ గ్రాండ్ జ్యూరీ అంటే కొంతమంది పౌరుల బృందం. వీరు సాక్షులు చెప్పే అంశాలను పరిశీలిస్తారు. అభియోగాలు మోపేందుకు వీరు చెబుతున్న ఆధారాలు సరిపోతాయో లేదో చూస్తారు.

2. ట్రంప్‌ను అరెస్టు చేస్తారా?

ఇండిక్ట్‌మెంట్ పూర్తయిన మాత్రాన అందరినీ అరెస్టు చేయరు.

అయితే, ఈ కేసులో దర్యాప్తు సంస్థల అధికారులు ట్రంప్ లాయర్లతో ఇప్పటికే మాట్లాడారు. వీరి మధ్య చర్చలు జరిగాయని, మంగళవారం ట్రంప్ నేరుగా లొంగిపోతారని అధికారిక వర్గాలు చెబుతున్నాయి.

అయితే, ఈ ప్రక్రియలు ఎలా జరగబోతున్నాయో స్పష్టత లేదు. బహుశా నిబంధనలకు అనుసరించి ట్రంప్‌ను అరెస్టు చేయొచ్చు.

తీవ్రమైన నేరాల్లో చేతులకు బేడీలు వేసి తీసుకెళ్లినట్లు (ప్రెప్ వాక్)గా ఈ కేసులో ట్రంప్‌కు బేడీలు వేయబోరని ట్రంప్ న్యాయవాది ఏబీసీ వార్తా సంస్థతో చెప్పారు.

3. మామూలుగా అయితే ఏం చేస్తారు?

అభియోగాలు మోపిన తర్వాత, ఆయన మంగళవారం లొంగిపోబోతున్నారు. అయితే, మొదటగా ఆయన జర్నలిస్టులు, కెమెరాలు, మైక్‌ల ముందు నుంచి న్యూయార్క్ సిటీ కోర్టులకు తీసుకెళ్లాల్సి ఉంటుంది. దీన్నే ప్రెప్ వాక్ అంటారు. అంటే పెర్పెట్రేటర్ వాక్.

తీవ్రమైన కేసుల్లో నిందితులకు బేడీలు వేసి పోలీసులు తీసుకెళ్తారు. కొంతమందిని సాధారణంగా తీసుకెళ్తుంటారు.

ఇలాంటి సమయాల్లో తీసే ఫోటోలు బాగా వైరల్ అవుతుంటాయి. హాలీవుడ్ దిగ్జజం హార్వే వీన్‌స్టీన్‌పై వరుస లైంగిక నేరారోపణలు వచ్చినప్పుడు ఆయన్ను ప్రెప్ వాక్‌ చేసుకుంటూ తీసుకెళ్లారు. అంటే ఆయన చేతికి బేడీలువేసి న్యూయార్క్ పోలీస్ డిపార్ట్‌మెంట్‌కు తరలించారు.

మీటూ ఉద్యమంలో బాగా వైరల్ అయిన ఫోటోల్లో ఇవి కూడా ఒకటి.

మరోవైపు మాజీ ఐఎంఎఫ్ చీఫ్ డొమినిక్ స్ట్రాస్ కన్‌ను కూడా లైంగిక వేధింపుల ఆరోపణలపై ఇలానే తీసుకెళ్లారు. అలా తీసుకెళ్లేటప్పుడు ఒళ్లంతా చెమటలతో తీవ్రంగా అలసిపోయి ఆయన కెమెరాలకు కనిపించారు. ‘‘అయితే, నేరం నిరూపణ అయ్యేవరకు ఆయన నిర్దోషే.. కానీ, అప్పటికే దోషిలా మిమ్మల్ని తీసుకెళ్తే ఎలా’’అని 2013లో సీఎన్ఎన్ వార్తా సంస్థతో స్ట్రాస్ అన్నారు.

అయితే, ఆ తర్వాత కాలంలో ఆయనపై వచ్చిన ఆరోపణలను అధికారులు వెనక్కి తీసుకున్నారు. ఆ కేసును కోర్టు బయట పరిష్కరించుకున్నారు.

ప్రస్తుత కేసులో మాత్రం చేతులకు బేడీలు వేసి తీసుకెళ్లబోరని ట్రంప్ న్యాయవాది జోయి టకోపినా స్పష్టంచేశారు.

నిజానికి ఈ ప్రెప్ వాక్‌లు ఇంతలా ప్రజల్లోకి వెళ్లడానికి ట్రంప్ సలహాదారుడు, అమెరికా మాజీ అటార్నీ రూడీ జిలియానీనే కారణం. నిందితులను ఇలా మీడియా ముందు నుంచి తీసుకెళ్తే ఏం జరుగుతుందో ఆయన బాగా తెలుసు. దీన్ని 1980, 90లలో ఆయన బాగా ప్రోత్సహించారు.

4. విచారణలో ఏం జరుగుతుంది?

మంగళవారం అంటే ఏప్రిల్ 4న మధ్యాహ్నం ట్రంప్ విచారణ జరగనుంది. అప్పుడే తొలిసారి ఆయన మీద ఉన్న ఆరోపణలను కోర్టులో చదివి వినిపిస్తారు.

మీరు నేరం చేశారని అంగీకరిస్తున్నారా? లేదా? అని ట్రంప్‌ను అడుగుతారు?

అప్పుడు తప్పు చేశాననో లేక లేదనో చెబుతూ ట్రంప్ లేదా ఆయన లాయర్ వాదన వినిపిస్తారు.

న్యాయమూర్తి అంగీకరిస్తే కోర్టులో కెమెరాలు కూడా పెట్టొచ్చు.

కోర్టులో విచారణ తరువాత సొంత పూచీకత్తు మీద ట్రంప్‌ను విడుదల చేసే అవకాశం ఉంటుంది. అంటే మళ్లీ విచారణకు వస్తానని కోర్టుకు హామీ ఇవ్వడం వంటివి చేయాలి.

5. ట్రంప్ మీద ఆరోపణలు ఏంటి?

ట్రంప్ మీద అధికారులు చేసిన ఆరోపణలు ఏంటో కచ్చితంగా బీబీసీకి తెలియదు. కాకపోతే తన మాజీ లాయర్ మైఖేల్ కొహెన్‌కు చేసిన పేమెంట్‌కు సంబంధించి విచారణ ఎదుర్కొంటున్నారు.

2016 అమెరికా అధ్యక్ష ఎన్నికలకు ముందు పోర్న్‌స్టార్ స్టార్మీ డేనియల్స్‌కు ఆ డబ్బును ఇచ్చారన్నది ఆరోపణ. 2006లో స్టార్మీ డేనియల్స్‌తో ట్రంప్ సెక్స్‌లో పాల్గొన్నారని, ఆ విషయాన్ని దాచిపెట్టేందుకు ఆమెకు డబ్బు ఇచ్చారనే ఆరోపణలున్నాయి.

అయితే ఆమెకు డబ్బు ఇవ్వడం నేరం కాదు. కానీ లాయర్‌కు ఇచ్చిన డబ్బును లీగల్ ఫీజుల కింద ఇచ్చినట్లు రికార్డుల్లో నమోదు చేయడం వివాదంగా మారింది.

అందుకోసం ట్రంప్ తప్పుడు డాక్యుమెంట్లు సృష్టించారనేది ఆరోపణ.

ట్రంప్‌తో తనకు సంబంధం ఉందని చెబుతున్న ప్లే బాయ్ మోడల్ కరేన్ మెక్‌డౌగల్‌కు కూడా ఆయన డబ్బు ఇచ్చారనే ఆరోపణలు ఉన్నాయి.

6. ఇతర ఆరోపణలు ఉన్నాయా?

2021 జనవరి 6న ట్రంప్ మద్దతుదారులు అమెరికా కాంగ్రెస్ ఉండే క్యాపిటల్ హిల్స్ మీద దాడి చేశారు. వారిని రెచ్చగొట్టేలా ట్రంప్ ప్రసంగించిన తరువాత ఆ దాడి జరిగింది. అయితే క్యాపిటల్ హిల్స్ మీద దాడిలో ట్రంప్ విచారణ ఎదుర్కొంటారో లేదో ఇంకా తెలియడం లేదు.

ఫ్లోరిడాలోని ట్రంప్ వ్యక్తిగత నివాసంలో అమెరికా రహస్య పత్రాలు దొరికాయి. ఈ కేసులో కూడా ఆయన ఆరోపణలు ఎదుర్కొనే అవకాశం ఉంది.

2020 అమెరికా అధ్యక్ష ఎన్నికల్లో జో బైడెన్ ఓడిపోయినట్లుగా ప్రకటించాలంటూ జార్జియా రాష్ట్రం అధికారులను ట్రంప్ ఒత్తిడి చేసినట్లుగా చెబుతున్న కేసులోనూ ఆయన విచారణ ఎదుర్కొంటున్నారు.

ఎన్నికల ఫలితాలను తారుమారు చేసేందుకు కావాల్సిన ఓట్లను ‘గుర్తించాల్సింది’గా ఆయన ఫోనులో సెక్రటరీ ఆఫ్ స్టేట్‌ను కోరారనే ఆరోపణలు కూడా ఉన్నాయి.

7. దోషిగా తేలితే 2024 అధ్యక్ష ఎన్నికల్లో పోటీ చేయొచ్చా?

చేయొచ్చు. ఆరోపణలు మోపినా లేక దోషిగా తేలినా అధ్యక్ష ఎన్నికల్లో ట్రంప్ పోటీ చేయొచ్చు.

అమెరికా రాజ్యాంగం ప్రకారం అభ్యర్థులకు ఎటువంటి నేర చరిత్ర లేకుండా ఉండాలనే నియమం లేదు.

అభిశంసన ఎదుర్కొన్నవారు, పెద్దపెద్ద నేరాలు చేసిన వారికి అధ్యక్షుడు అయ్యేందుకు అవకాశం లభించకపోవచ్చు. కాకపోతే ట్రంప్ మీద రెండు సార్లు అభిశంసన పెట్టినా అమెరికా సెనేట్ ఆయనను నిర్దోషిగా తేల్చింది.

‘‘నేరం రుజువై శిక్ష పడినప్పటికీ జైలు నుంచే అమెరికా అధ్యక్షునిగా బాధ్యతలు నిర్వహించొచ్చు. నేరస్థులను అధ్యక్షుడు కాకుండా నిషేధించే చట్టాలు ఏవీ అమెరికాలో లేవు’’ అని బీబీసీ నార్త్ అమెరికా ప్రతినిధి ఆంటోనీ జుర్చర్ తెలిపారు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)