అమెజాన్ అడవుల్లో బయటపడ్డ పురాతన నగరం.. అత్యాధునిక రహదారి వ్యవస్థ, కాల్వల నిర్మాణంతో వేలమంది నివసించిన ఆనవాళ్లు

పచ్చని వృక్షసంపదతో కనిపించే అమెజాన్ అడవుల్లో వేల సంవత్సరాలనాటి భారీ పురాతన నగరం ఆనవాళ్లను గుర్తించారు.

అమెజాన్ అడవుల్లో నివసించే వారి గురించి మనం ఇప్పటివరకు తెలుసుకున్న చరిత్రను మార్చేరీతిలో ఇటీవల గుర్తించిన అతి పురాతన నగరంలోని విశేషాలు ఉన్నట్లు పరిశోధకులు చెప్తున్నారు.

అమెజాన్ పరిధిలోని తూర్పు ఈక్వెడార్‌లో ఉన్న ఉపానో ప్రాంతంలో అతి పురాతన నగరం ఉన్నట్లు గుర్తించారు.

అక్కడ వేలకొద్దీ దీర్ఘ చతురస్రాకారపు ఆకారంతో నిర్మాణాలు రోడ్లు, కాలువలతో అతిపెద్ద నగరమే ఉండేదని గుర్తించారు.

అగ్నిపర్వతపు నీడలో ఉండే ఈ నగరం అంతరించిపోవడానికి, అగ్నిపర్వతానికి సమీపంలో ఉండటమేనని పరిశోధకులు అంచనా వేస్తున్నారు.

అద్భుతం..

మనకు ఇప్పటికే పెరూలోని మచుపిచ్చు లాంటి దక్షిణ అమెరికాలోని ఎత్తైన నగరాల గురించి విన్నాం. అక్కడి ప్రజలు సమూహాలుగా లేదా చిన్న స్థావరాలను ఏర్పాటు చేసుకుని నివసించేవారని నమ్మాం. కానీ, గుర్తించిన ఆ పురాతన నగరపు ఆనవాళ్లను పరిశీలించాక, అందుకు భిన్నంగా మరో కోణం బయటకు వచ్చినట్లయిందని చెప్తున్నారు.

ఈ పరిశోధనను పర్యవేక్షిస్తున్న ప్రొఫెసర్ స్టీఫెన్ రొస్టెయిన్ మాట్లాడుతూ, "ఇప్పటివరకు మేం గుర్తించిన వాటిలో నగరాల్లో ఇదే అతిపురాతనమైనది" అన్నారు.

స్టీఫెన్ ఫ్రాన్స్ నేషనల్ సెంటర్ ఫర్ సైంటిఫిక్ రీసెర్చ్‌లోని రీసెర్చ్ డైరెక్టర్‌గా బాధ్యతలు నిర్వర్తిస్తున్నారు.

"ఇప్పటివరకు నాగరికతపై యూరప్ కేంద్రీకృత అభిప్రాయముండేది. కానీ, ఇది సంస్కృతి, నాగరికతల విషయంలో మన ఆలోచనను మార్చేలా ఉంది" అన్నారు.

ఆయన మాట్లాడుతూ "అమెజాన్ సంస్కృతిని మనం చూసే విధానమే ఇప్పుడు మారిపోయింది. అమెజాన్ ప్రజలు చిన్న చిన్న సమూహాలుగా చిన్న గుడిసెలను నిర్మించుకుని, నగ్నంగా (స్పష్టంగా తెలియనప్పటికీ), నేలను చదును చేసుకుని జీవించేవారిని అనుకున్నాం. కానీ, ఈ పురాతన నగరాన్ని చూస్తుంటే క్లిష్టమైన అర్బన్ సొసైటీల్లో జీవించినట్లు తెలుస్తోంది" అని అధ్యయనపు సహ రచయిత, పరిశోధకులు ఆంటోనీ డోరిసన్ అన్నారు.

ఆ పురాతన నగరం 2500 ఏళ్ల క్రితం నిర్మితమైందని, అక్కడ వెయ్యేళ్లకు పైగా జనావాసాలు ఉన్నట్లుగా తెలుస్తోందని ఆర్కియాలజిస్టులు చెప్తున్నారు.

ఏ సమయంలో ఎంతమంది జనాభా అక్కడ ఉండేవారో కచ్చితంగా అంచనా వేయడం కష్టమని, అయితే, ఆ సంఖ్య పదివేల నుంచి లక్ష వరకు ఉండొచ్చని శాస్త్రవేత్తలు చెప్తున్నారు.

300 చరపు కిలోమీటర్ల విస్తీర్ణంలో లేజర్ సెన్సార్లతో చేపట్టిన సర్వే, పలు చోట్ల జరిపిన తవ్వకాల ఆధారంగా అక్కడున్న వృక్షాల కింద నగరానికి సంబంధించిన ఆనవాళ్లు ఉన్నాయని గుర్తించారు శాస్త్రవేత్తలు.

ఎల్ఐడీఏఆర్ టెక్నాలజీతో చేపట్టిన సర్వేలో ఆరువేల దీర్ఘచతురస్రాకారపు నిర్మాణాలు 20 మీటర్ల పొడవు, 10 మీటర్ల వెడల్పు, 2-3 మీటర్ల ఎత్తులో నిర్మితమైనట్లు గుర్తించారు.

ఇవి నగరపు మధ్య పాంత్రం చుట్టూ మూడు నుంచి ఆరు యూనిట్ల చొప్పున నిర్మించారని చెప్పారు.

శాస్త్రవేత్తలు ఆ నిర్మాణాల్లో చాలావరకు గృహాలే అయ్యుండొచ్చని విశ్వసిస్తున్నారు. కొన్ని ఉత్సవాల కోసం కూడా నిర్మించారని, ఒకటి 130 మీటర్ల పొడవు, 40 మీటర్ల వెడల్పు విస్తీర్ణంలో నిర్మించారని చెప్పారు. ఎత్తైన కొండ ప్రాంతాలను చదును చూసి, నేలకు కాస్త ఎత్తులో వాటిని నిర్మించారు.

ఆ నిర్మాణాలను అనుసంధానిస్తూ పొడవైన మార్గాలతో కూడిన రహదారుల వ్యవస్థ ఉంది. వాటిలో ఒక రోడ్డు మార్గం 25 కిలోమీటర్ల పొడవు వరకు ఉంది.

ఆ మార్గాలే పరిశోధనలో ఎంతో ఆశ్చర్యకరమైన అంశమని డా. డోరిసన్ తెలిపారు.

"రహదారుల వ్యవస్థ చాలా అధునాతనంగా ఉంది. చాలా దూరం వరకు విస్తరించి ఉంది. అంతా అనుసంధానమై ఉంది. కొన్నిచోట్ల ఆ మార్గాలు లంబాకృతిలో నిర్మితమై ఉండటం ఆకట్టుకునే విషయం" అన్నారు.

"అక్కడి భౌగోళిక పరిస్థితిని దృష్టిలో ఉంచుకుని అలా నిర్మాణాలు చేపట్టడం మామూలు విషయం కాదు" అన్నారు.

తొలిసారిగా ఆ అతిపురాతన నగరం గురించిన ఆధారాలు 1970ల్లో గుర్తించారు. 25 ఏళ్ల అధ్యయనం అనంతరం సమగ్ర అధ్యయనాలను ప్రచురించడం ఇదే తొలిసారి.

ఈ నిర్మాణాలు మధ్య మధ్యలో అతిపెద్ద వేదికలు కట్టడాన్ని చూస్తే, నమ్మకం, విశ్వాసంతో ముడిపడి ఉండొచ్చని, అలా నిర్మాణాలు చేపట్టడం వెనుక ఏదో నిగూఢమైన అర్థముందని అన్నారు డోరిసన్.

కాజ్‌వేలకు ఇరువైపులా గుంటలు ఉండటాన్ని కూడా గుర్తించారు. బహుశా అక్కడి ప్రజల తాగునీటి అవసరాలను తీర్చేందుకు వాటిని తవ్వి ఉంటారని భావిస్తున్నారు.

ఆ పురాతన నగరానికి పొరుగు ప్రాంతాల నుంచి ముప్పు ఉన్నట్లుగా వారు నగరపు ప్రవేశం, సరిహద్దుల వద్ద తవ్విన కొన్ని గోతులను పరిశీలిస్తే తెలుస్తోందని అన్నారు. అందుకు ఆ గోతులే ఆధారమని నమ్ముతున్నారు.

ఇక్కడ నివసించిన వారి గురించి ప్రస్తుతానికి వివరాలేవీ తెలియలేదు. ఆ నిర్మాణాల వద్ద కాల్చిన విత్తనాలు, విసురు రాళ్లు, వంటపాత్రల వంటి వాటిని గుర్తించినట్లు తెలుస్తోంది.

మెక్సికో, మధ్య అమెరికాలో నివసించిన మయన్‌లను మించిన సంక్లిష్టమైన రీతిలో ఇక్కడి వారు నివసించినట్లు తెలుస్తోంది.

ఈ పరిశోధనలో భాగం కానప్పటికీ యూనివర్సిటీ ఆఫ్ ఎక్స్‌టర్‌లోని ఆర్కియాలజీ ప్రొఫెసర్ జోస్ ఇరియార్టే మాట్లాడుతూ, "మయన్‌ల నాగరికత తరహాలో మరో నాగరికత ఉనికిని వారు గుర్తించారని మీరు అర్థం చేసుకోవాలి. వారి కన్నా కూడా భిన్నమైన సాగు, సిరామిక్స్‌ నిర్మాణాలతో కూడిన పురాతన నగరంలో వారు జీవించారని ఊహించుకోండి" అని చెప్పారు.

దక్షిణ అమెరికాలోని ఆ ప్రాంతంలో అరుదైన అష్టభుజి, దీర్ఘచతురస్రాకారాల్లో చేపట్టిన నిర్మాణాలను గుర్తించామని శాస్త్రవేత్తలు చెప్తున్నారు.

బహుశా కిలామోపె, ఉపానోలకు చెందిన ప్రజలు అక్కడ నివసించి ఉండొచ్చని, వారు ప్రధానంగా వ్యవసాయంపైనే ఆధారపడి జీవించేవారని పరిశోధకులు అంచనా వేస్తున్నారు.

వారు మొక్కజొన్న, చిలకడదుంపలు తినేవారు. 'చిచా' అనే ద్రావణాన్ని సేవించేవారు.

ప్రొఫెసర్ రొస్టైన్ మాట్లాడుతూ, తన తొలినాళ్లలో అమెజాన్ అడవుల్లో పురాతన ప్రజలెవరూ లేరని అప్పటి శాస్త్రవేత్తలు నమ్మారని, పైగా ఈ పరిశోధన వృధా అన్నట్లుగా వారు భావించారని అన్నారు.

"నేను మొండివాడిని. ఎలాగైనా నేను సంకల్పించిన పని చేసితీరాలని నిర్ణయించుకున్నాను. నా పరిశోధనను కొనసాగించాను. ఇప్పుడు నాకెంతో సంతోషంగా ఉంది. ఒక పురాతన నగరాన్ని నేను గుర్తించాను" అన్నారు.

తరువాతి దశలో పరిశోధకులు ఎంచుకున్న ఆ 300 చదరపు కిలోమీటర్ల పరిధిలో లభించిన ఆనవాళ్లపై లోతుగా అధ్యయనం చేస్తారు.

ఇవి కూడా చదవండి..

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)