కరోనావైరస్ వ్యాక్సీన్ తయారు చేశామన్న రష్యా... 'నా బిడ్డకు కూడా ఈ టీకా ఇచ్చాం' - అధ్యక్షుడు పుతిన్

కరోనా వైరస్‌పై ప్రభావవంతంగా పనిచేసే తొలి వ్యాక్సీన్‌ను తమ శాస్త్రవేత్తలు సిద్ధం చేశారని రష్యా అధ్యక్షుడు వ్లాదిమీర్‌ పుతిన్‌ ప్రకటించారు. "కరోనాను ఎదుర్కోడానికి మొదటి వ్యాక్సీన్‌ సిద్ధమైంది'' అని పుతిన్‌ తన మంత్రులకు మంగళవారం ఉదయం వెల్లడించారు.

ఈ వ్యాక్సిన్‌తో మనుషులపై రెండు నెలలుగా పరీక్షలు జరిపామని, ఇది అన్ని భద్రతా ప్రమాణాలకు అనుగుణంగా ఉందని పుతిన్ తెలిపారు.

ఈ వ్యాక్సీన్‌ను రష్యా ఆరోగ్య మంత్రిత్వ శాఖ కూడా ఆమోదించింది. రష్యాలో ఈ వ్యాక్సీన్‌ను ప్రజలకు పెద్ద ఎత్తున అందుబాటులోకి తీసుకురానున్నట్లు చెబుతున్నారు.

అయితే రష్యా ఈ వ్యాక్సీన్‌ను ఇంత త్వరగా ఎలా తయారు చేయగలిందని, దీని శాస్త్రీయత ఎంత అన్నదానిపై ప్రపంచ వ్యాప్తంగా అనుమానాలు వ్యక్తమవుతున్నాయి.

రష్యా అధ్యక్షుడు వ్లాదిమిర్‌ పుతిన్‌ మాత్రం ఈ వ్యాక్సిన్‌ సురక్షితమైందని, దీన్ని గమాలయా ఇనిస్టిట్యూట్‌లో తయారు చేశామని, తన కుమార్తెకు కూడా ఈ టీకా ఇచ్చినట్లు అధికార టెలివిజన్‌లో ప్రకటించారు.

"ఈ టీకా చాలా ప్రభావవంతమైనదని నాకు తెలుసు, ఇది రోగ నిరోధక శక్తిని పెంచుతుంది. అన్ని భద్రతా ప్రమాణాలు పాటించామని నేను పునరుద్ఘాటిస్తున్నాను'' అని పుతిన్‌ వెల్లడించారు. త్వరలోనే ఈ వ్యాక్సిన్‌ను పెద్ద ఎత్తున ఉత్పత్తి చేయబోతున్నామని ఆయన అన్నారు.

తుది దశలో చైనా ప్రయోగాలు

మరోవైపు చైనాకు చెందిన సినోవాక్ బయోటెక్‌ లిమిటెడ్‌ మంగళవారం కోవిడ్ -19 వ్యాక్సిన్ చివరి దశ మానవ ప్రయోగాలను ప్రారంభించింది. ఈ టీకాను ఇండోనేషియాలోని 1620 మంది రోగులపై పరీక్షిస్తున్నారు.

ఇండోనేషియా ప్రభుత్వ యాజమాన్యంలోని బయోఫార్మా సహకారంతో ఈ టీకాను తయారు చేస్తున్నారు. ఈ ప్రయోగాల రెండో దశ వ్యాక్సిన్‌ సురక్షితమైందని, రోగులలో యాంటీబాడీలకు సంబంధించిన రెస్పాన్స్‌ను తాము గుర్తించామని సినోవాక్‌ సంస్థ వెల్లడించింది.

కరోనావాక్ అనే పేరుతో తయారవుతున్న ఈ వ్యాక్సిన్‌కు పరీక్షలు చివరి దశలో ఉన్నాయని, కరోనాపై ప్రభావవంతమైన వ్యాక్సిన్‌లలో ఇది ఒకటని ఆ సంస్థ పేర్కొంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌‌లో ఫాలో అవ్వండి. యూట్యూబ్‌‌లో సబ్‌స్క్రైబ్ చేయండి.)