Ufaransa ilivyojenga Mji wa 'Paris feki' kuwahadaa wanajeshi wa Ujerumani wakati wa vita ya kwanza ya dunia..

Tarehe 4 Oktoba mwaka 1920, ripoti ilitokea katika gazeti la Uingereza la 'The Globe' yenye kichwa cha habari 'Paris Bandia: Mpango wa Ufaransa kuwahadaa wavamizi wa Ujerumani. Kichwa cha ripoti kilivutia sana.

Ripoti hiyo ilisema, "Wakati wa Vita vya Kwanza vya Dunia, kulikuwa na usitishwaji vita kwa muda kwa pande zote mbili. Wakati huu shughuli za kijeshi zilikuwa zimesimama. Kwa kutumia fursa hii, wahandisi wa Ufaransa walifanya kazi kubwa, wakajenga mji wa Paris mwingine mbali na mji wenyewe halisi wa Paris. Wakajenga reli, mitaa, nyumba, stesheni na treni, na zaidi ya hayo jiji lote liliigwa, likajengwa kama jiji halisi.

Yalikuwa mawazo ya mhandisi wa umeme Fernand Jakopozzi, ambayo yaliyogeuka kuwa ukweli kwa kushirikiana na serikali ya Ufaransa.

Hii ilikuwa njia yao ya kuhadaa ndege za Wajerumani na kuziondoa kwenye mji mkuu halisi, ili mtu yeyote asiuwawe au kudhurika iwapo wangeshambuliwa na bomu.

Ndege ya kwanza ya Ujerumani kushambulia Paris ilikuwa aina ya Taub, ambayo ilidondosha bomu huko Paris mnamo Agosti 30 mwaka 1914. Baadaye, ndege hizi zenye umbo kama ndege (kiumbe) pia zilitumiwa na Ujerumani kushambulia London.

Kulikuwa na sababu mbili za nia ya Ujerumani huko Paris. Kwanza, ikiwa mji mkuu wa nchi yoyote ulikuwa karibu na uwanja wa vita, basi ulikuwa Paris, ili kushambulia mji huo ndege za Ujerumani zingelazimika kusafiri umbali wa kilomita thelathini tu. Na pili, kwa kuwa ni mji mkuu, ilikuwa muhimu kwa Ufaransa.

Shambulio la kwanza la Wajerumani dhidi ya Paris lilikuwa tarehe 30 Agosti 1914. Hii ilikuwa mara ya kwanza kwa mji mkuu wa nchi kushambuliwa. Majeruhi hawakuwa wengi lakini walisababisha madhara makubwa ya akili.

Sasa ukubwa wa vita ulikuwa umeenea pande zote hadi. Watoto na wanawake ambao hawakwenda kwenye uwanja wa vita pia walikuwa wakishambuliwa pia.

Mabomu yalikuwa yakitokea angani

Baada ya hayo jiji hilo lilishambuliwa mara kadhaa kwa muda wa miezi 18 iliyofuata. Hii ilijumuisha shambulio la kwanza la kutumia ndege za Zeppelin mnamo Machi 1915. Zeppelin ilivumbuliwa na Count Ferdinand von Zeppelin.

Ndege hizi zilipaa kutoka viwanja vya ndege vya Ubelgiji na kudondosha mabomu huko Paris. Hata hivyo, waliopoteza maisha katika mashambulizi haya hawakuwa wengi.

Mnamo tarehe 29 Januari 1916, Zeppelin mbili zilionekana angani juu ya mji mkuu wa Ufaransa. Mabomu waliyorusha yaliua watu 24 na kujeruhi 30. Mazishi ya wafu yalifanyika tarehe 7 Februari 1916, inasemekana shughuli zilisimama Paris siku hiyo.

Majeneza ya waliofariki yalihifadhiwa kwenye magari sita na kupelekwa katika Kanisa la Notre Dam. Wanasiasa na viongozi pamoja na maelfu ya watu walihudhuria mazishi hayo.

Mkutano maalum wa maombi uliandaliwa kanisani wakati huo, ambapo Askofu Mkuu wa Paris Kadinali Léon Adolphe Amet pia alikuwepo. Gazeti la Uingereza baadaye lilidai kwamba sala hiyo 'ilishtua watu sana.'

Aliomba, "Kabla ya kuwa mhanga wa unyama wa Wajerumani, vifo hivi vitakukumbusha ubinadamu na dhamira yako ya kushinda, ili uweze kumpokonya adui silaha na kumzuia kufanya uhalifu huo tena." "

Lakini mashambulizi dhidi ya Ufaransa yalianza kuongezeka katika miezi iliyofuata, na hivyo kufanya kuwa vigumu kuyazuia.

Mpango wa kujenga Paris ya pili

Mnamo mwaka 1917, Ufaransa ilipata ahueni kidogo Ujerumani ilipoelekeza fikira zake London. Walikuwa wakitumia ndege zao mpya za Gotha kushambulia London. Katika shambulio la mwezi Juni, watu 162 waliuawa Uingereza.

Ufaransa ilielewa kwamba baada ya kusababisha uharibifu kwa London, Wajerumani wangegeuka tena. Katika hali hiyo, swali lililokuwa mbele yake lilikuwa jinsi ya kujikinga?

Fernand Jakopozzi alikuwa na suluhisho la kukabiliana na ugumu huu.

Jacopozzi alizaliwa katika jiji la Italia la Florence, hapo awali alikuwa amefanya kazi katika maonyesho ya kimataifa ya Paris mwaka wa 1900. Wakati huo, lilikuwa tukio la kiwango cha kimataifa ambalo mafanikio ya karne iliyopita yalikumbukwa na kile ambacho mwanadamu angeweza kufikia karne ilifuata kilizungumzwa.

Jakopozzi aliamini kuwa wakati uliokuwa mbeleni ungekuwa wa uvumbuzi mpya. Kama mhandisi wa umeme, aliamua kuhamia Paris kwa maisha yake ya baadaye na akaanza kutafiti masuala ya 'mwanga wa umeme' huko, kulingana na gazeti la ndani.

Jacopozzi pia alihusika katika mradi wa kuunda jiji bandia la Paris, ingawa bado haijajulikana ni sababu gani zilichangia hili. Mwishoni mwa 1917, alipewa jukumu la kuilinda Ufaransa kutokana na mashambulizi ya anga na Idara ya Vita ya nchi hiyo, Defence Contre Aviance. Katika hili, mpango ulifanywa wa kujenga mji mzima ili kudanganya ndege za Ujerumani.

Wakati huo teknolojia ya vita kutoka angani ilikuwa changa. Vilipuzi vingebebwa na vingedondoshwa moja kwa moja kwenye shabaha kwa kutazama kutoka angani. Kwa sababu ya ukosefu wa teknolojia, marubani hawakuweza kujua kutoka angani usiku ikiwa walikuwa wakiruka juu ya Paris halisi au juu ya Paris bandia.

Ndege za adui zilikuwa zikiruka kuelekea mji mkuu katika giza la usiku. Hawakuwa na vifaa vya kiufundi na badala yake walikuwa na ramani zinazotoa taarifa kuhusu topografia.

Wangeruka kupitia mto Sen na kuangusha mabomu. Mji wa Paris uko karibu na Mto Seine, ambao unatiririka kaskazini mwa Ufaransa.

Lakini mto huu hautiririki moja kwa moja. Mto huo hugeuka kama nundu ya ngamia si mara moja bali mara mbili unapopita kwenye Daraja maarufu la Paris na Mnara wa Eiffel.

Ya pili kati ya hizi ina mahali paitwapo Maison-Laffite ambayo Jacopozzi ilichagua kuunda jiji bandia la Paris.

Kwa kuongezea, vituo viwili vipya vilijengwa ili kuhadaa ndege za Ujerumani, cha kwanza kikiwa eneo la viwanda ghushi huko Varys-sar-Manne, kilomita 16 mashariki mwa mji mkuu, na kaskazini mashariki kando ya mistari ya kitongoji cha Saun Diné kaskazini mwa Paris.

Jakopozzi alianza mchezo wa taa huko Villepintine mwaka wa 1918. Kwa taa, alijenga kituo cha Gare-de-Let, kituo cha reli yenye shughuli nyingi zaidi huko Paris, na hata treni ya kusonga.

Akitumia kikamilifu miaka yake ya utafiti juu ya mwanga, Jakopozzi alitengeneza makochi ya treni kutoka kwa mbao na kuweka taa kwenye ukanda wa kusafirisha ili kuunda mfano wa treni inayosonga. Ilipotazamwa kutoka angani, ilionekana kama treni inayosonga.

Ili kuunda eneo la viwanda, Jakopozzi alitumia kikamilifu kuni na kutengeneza miundo ya viwanda. Juu ya paa la viwanda, alitumia turubai ambayo alipaka rangi tofauti.

Alitumia ustadi wa taa za rangi tofauti kama nyeupe, njano na nyekundu kukifanya kiwanda kionekane kuwaka moto na moshi ulionekana ukitoka humo. Jaribio lake lilikuwa kufanya mwanga uonekane wa asili ili marubani wa Ujerumani wasiwe na shaka yoyote.

Matokeo ya bidii ya Jakopozzi yalikuwa tayari yanaonekana wakati ndege ya Ujerumani ya Gotha ilipodondosha bomu la kilo 22,000 kwenye mji mkuu mnamo tarehe 16 Septemba. Katika shambulio hili watu 6 walikufa na 15 walijeruhiwa.

Ilipangwa kwamba kabla ya shambulio linalofuata, udanganyifu ulioundwa na Jakopozzi ungetumiwa lakini wakati huo haukufika.

Vita viliisha miezi miwili baadaye, na Jakopozzi hakujua kama mpango wake unaweza kuwahadaa marubani wa Ujerumani.

Lakini, serikali ya Ufaransa ilikuwa na hakika kwamba ikiwa vita vingeendelea na ndege za adui zingelenga mji mkuu, mkakati huu wa ulinzi ungeonekana kuwa mzuri.

Mpango mzima wa kujenga mji wa kuhadaa wa Jacoboji uliwekwa siri hata baada ya kumalizika kwa vita. Katika mwaka wa 1920, wakati vyombo vya habari vya Uingereza vilichapisha habari kuhusiana na hilo, baada ya hapo pazia liliinuliwa.

'The Globe' ilikuja kujua kuhusu hili mapema Oktoba, lakini kabla ya hapo 'The Illustrated London News' iliandika makala kuhusu mpango huu wa Jacobozzi katika toleo lake la tarehe 6 Novemba 1920 - 'Remarkably Interesting Revelations'. Katika picha hizi, ramani na mambo mengine yanayohusiana na mpango yaliandikwa

Pamoja na makala hiyo, baadhi ya picha pia zilichapishwa gazetini. Kichwa cha habari hii kilikuwa 'Paris Bandia Nje ya Paris: Jiji Lililoundwa Kupigwa Bomu'

Lakini nakala hii haikusema chochote juu ya utambulisho wa muundaji wa jiji bandia la Paris.

Utambulisho wa mpangaji haukufichuliwa

Jakopokazi baadaye alitunukiwa heshima ya juu zaidi ya kiraia ya Ufaransa , Legion of Honor, na alifurahia mafanikio makubwa katika miaka ya 1920.

Aliwasha Mnara wa Eiffel, na kufuatiwa na kuwasha alama muhimu za jiji kama vile Palais de la Concorde.

Wafanyabiashara pia waliona uwezo ndani yake. Citrione alimpa jukumu la kuweka tangazo la gari lake katika Mnara wa Eiffel.

Fernand Jakopozzi alikufa huko Paris mnamo 1932.

Wakati wa kifo chake, gazeti linaloitwa 'The People' liliandika, "Taa alizokuwa ameweka katika Mnara wa Eiffel zilivutia watu duniani kote. Amekuwa na jukumu kubwa katika kuifanya Paris kuwa jiji la mwanga."

Lakini gazeti hilo halikutaja hata kidogo juhudi za serikali ya Ufaransa wakati wa Vita vya Kwanza vya Ulimwengu wala mpango wao wa kujenga jiji bandia la Paris.