Vita vya Ukraine: Wanajeshi wa Urusi waondoka Chernobyl, Ukraine yasema
Chanzo cha picha, Getty Images
Wanajeshi wa Urusi waliokuwa wanadhibiti kinu cha zamani cha nyuklia huko Chernobyl wameondoka, wafanyakazi wa kinu hicho wamesema.
Kulingana na kampuni ya nyuklia ya serikali ya Ukraine Energoatom, wafanyakazi katika eneo hilo walisema kwa sasa hakuna "wageni" kwenye eneo hilo.
Hapo awali, ilisema baadhi ya vikosi vya Urusi vilikuwa vimeondoka kuelekea mpaka wa Belarus, na kuacha kikundi kidogo nyuma.
Tangazo hilo linaonekana kuthibitisha ripoti za maafisa wakuu wa ulinzi wa Marekani siku ya Jumatano za kujiondoa.
Wanajeshi wa Urusi walidhibiti Chernobyl mwanzoni mwa uvamizi wao nchini Ukraine.
"Leo asubuhi, wavamizi walitangaza nia yao ya kuondoka kwenye kinu cha nyuklia cha Chernobyl," Energoatom ilisema katika taarifa.
Kampuni hiyo pia ilithibitisha ripoti kwamba askari wa Urusi walikuwa wamechimba mitaro katika sehemu iliyochafuliwa zaidi ya eneo la kutengwa la Chernobyl, wakipata "athari kubwa" za mionzi. Kuna ripoti ambazo hazijathibitishwa kwamba wengine wanatibiwa huko Belarus.
Unaweza pia kusoma
- YA MSINGI:Mzozo wa Ukraine: Kwanini Urusi inaivamia Ukraine na Putin anataka nini?
- UFAFANUZI:Mzozo wa Ukraine: Swift ni nini na kwa nini kuipiga marufuku Urusi ni muhimu sana?
- UCHAMBUZI:Mzozo wa Ukraine: Putin humsikiliza nani?
- KWENYE RAMANI:Uvamizi wa Ukraine: Shambulio la Urusi kwenye ramani
- ZELENSKY:Volodymyr Zelensky: Mfahamu rais wa Ukraine aliyeacha umaarufu wake wa TV na kuingia kwenye siasa
- PUTIN:Vladimir Putin: Rais wa Urusi aliyeagiza shambulio Ukraine
- SILAHA:Mzozo wa Ukraine:Makombora ya stinger na silaha nyingine kali zinazotumiwa Ukraine
Shirika la habari la Reuters liliwanukuu wafanyakazi katika kiwanda hicho wakisema baadhi ya wanajeshi hawakujua kuwa walikuwa katika eneo la mionzi.
Shirika la Kimataifa la Nguvu za Atomiki (IAEA) lilisema katika taarifa kwamba halikuweza kuthibitisha ripoti hizo.
Mkurugenzi wake alisema, hata hivyo, ilikuwa katika mashauriano ya karibu na mamlaka ya Ukraine juu ya kutuma ujumbe kwenda kwenye kinu cha Chernobyl katika siku chache zijazo.
Katika siku za hivi karibuni Urusi imesema itapunguza operesheni zake kaskazini mwa Ukraine karibu na mji mkuu Kyiv na kuelekeza nguvu zake katika eneo la mashariki la Donbas. Chernobyl iko kaskazini mwa Kyiv.
Lakini siku ya Alhamisi Katibu Mkuu wa Nato Jens Stoltenberg alisema Moscow ilikuwa inajipanga badala ya kujiondoa ili kujipanga upya, kusambaza na kuimarisha mashambulizi yake huko Donbas.
"Wakati huo huo, Urusi inashikilia shinikizo kwa Kyiv na miji mingine. Kwa hiyo tunaweza kutarajia vitendo vya ziada vya kukera, na kuleta mateso zaidi," alisema.
Hakukuwa na mabadiliko katika lengo la Urusi kutafuta matokeo ya kijeshi, aliongeza.
Uvamizi wa eneo la Chernobyl tangu tarehe 24 mwezi Februari, siku ya uvamizi, umekuwa na wasiwasi juu ya kukatika kwa umeme na matatizo kwa wafanyakazi, ambao wengi wao walikuwa wamekwama huko kwa wiki na hawakuweza kufika nyumbani.
Ingawa haikuwa tena kituo cha nguvu kinachofanya kazi, Chernobyl haikuachwa kamwe na bado inahitaji usimamizi wa mara kwa mara.
Ni eneo la ajali mbaya zaidi ulimwenguni ya nyuklia mnamo 1986.
Kujiondoa kwa Urusi kunafuatia tangazo la siku kadhaa zilizopita na meya wa Slavutych, wafanyakazi wa makazi ya mji wa karibu katika kiwanda hicho, kwamba wanajeshi wa Urusi wameondoka katika mji huo.
