ਬ੍ਰਿਟੇਨ: ਕਿਵੇਂ ਹੋਵੇਗੀ ਪਾਰਟੀ ਆਗੂ ਤੇ ਪ੍ਰਧਾਨ ਮੰਤਰੀ ਦੀ ਚੋਣ ਤੇ ਕੌਣ ਲੈ ਸਕਦਾ ਹੈ ਬੋਰਿਸ ਜੌਨਸਨ ਦੀ ਥਾਂ

ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ਵਜੋਂ ਅਸਤੀਫ਼ਾ ਦੇ ਦਿੱਤਾ ਹੈ।

ਪਿਛਲੇ ਕਈ ਮਹੀਨਿਆਂ ਦੌਰਾਨ ਉਹ ਵਿਵਾਦਾਂ ਵਿੱਚ ਘਿਰਦੇ ਨਜ਼ਰ ਆਏ, ਜਿਸ ਵਿੱਚ ਲੌਕਡਾਊਨ ਲਈ ਬਣਾਏ ਆਪਣੇ ਹੀ ਕਾਨੂੰਨ ਤੋੜਨੇ ਸ਼ਾਮਲ ਹਨ।

ਤਾਜ਼ਾ ਬਗਾਵਤ ਦਾ ਕਾਰਨ ਸਾਬਕਾ ਡਿਪਟੀ ਚੀਫ਼ ਵ੍ਹਿਪ ਕ੍ਰਿਸ ਪਿੰਚਰ ਖਿਲਾਫ਼ ਲੱਗੇ ਜਿਨਸੀ ਸ਼ੋਸ਼ਣ ਦੇ ਇਲਜ਼ਾਮਾਂ ਉੱਤੇ ਪ੍ਰਧਾਨ ਮੰਤਰੀ ਵਲੋਂ ਸਹੀ ਤਰੀਕੇ ਨਾਲ ਕਾਰਵਾਈ ਨਾ ਕਰਨਾ ਹੈ।

ਲੰਘੇ ਦੋ ਦਿਨਾਂ ਵਿੱਚ 50 ਤੋਂ ਵੱਧ ਮੰਤਰੀਆਂ ਅਤੇ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਆਪਣੇ ਸਮੂਹਿਕ ਅਸਤੀਫ਼ੇ ਦੇ ਕੇ ਬੋਰਿਸ ਜੌਨਸਨ ਦੀ ਲੀਡਰਸ਼ਿਪ ਖ਼ਿਲਾਫ਼ ਬਗਾਵਤ ਕਰ ਦਿੱਤੀ।

ਹੁਣ ਬੋਰਿਸ ਨੇ ਅਸਤੀਫ਼ਾ ਦੇ ਦਿੱਤਾ ਹੈ ਪਰ ਨਵੇਂ ਆਗੂ ਦੇ ਚੁਣੇ ਜਾਣ ਤੱਕ ਉਹ ਪ੍ਰਧਾਨ ਮੰਤਰੀ ਦੇ ਅਹੁਦੇ 'ਤੇ ਬਣੇ ਰਹਿਣਗੇ।

ਨਵੇਂ ਕੰਜ਼ਰਵੇਟਿਵ ਆਗੂ ਅਤੇ ਪ੍ਰਧਾਨ ਮੰਤਰੀ 'ਤੇ ਫੈਸਲੇ ਲਈ ਦੇਸ਼ 'ਚ ਲੀਡਰਸ਼ਿਪ ਲਈ ਚੋਣਾਂ ਹੋਣਗੀਆਂ।

ਇਸ ਦੇ ਉਮੀਦਵਾਰਾਂ ਨੂੰ ਟੋਰੀ ਸੰਸਦ ਮੈਂਬਰਾਂ ਦੇ ਸਮਰਥਨ ਦੀ ਲੋੜ ਹੋਵੇਗੀ ਅਤੇ ਦੋ ਉਮੀਦਵਾਰ ਹੀ ਅਖੀਰ ਤੱਕ ਜਾਣਗੇ, ਜਿੱਥੇ ਸਾਰੇ ਕੰਜ਼ਰਵੇਟਿਵ ਮੈਂਬਰਾਂ ਦੀਆਂ ਵੋਟਾਂ ਨਾਲ ਜੇਤੂ ਦਾ ਫੈਸਲਾ ਕੀਤਾ ਜਾਵੇਗਾ।

ਕੌਣ ਹੋ ਸਕਦੇ ਹਨ ਤੱਕੜੇ ਉਮੀਦਵਾਰ?

ਦੱਸ ਦਈਏ ਕਿ ਅਜੇ ਤੱਕ ਜ਼ਿਆਦਾਤਰ ਸੰਸਦ ਮੈਂਬਰਾਂ ਅਤੇ ਮੰਤਰੀਆਂ ਨੇ ਇਹ ਨਹੀਂ ਕਿਹਾ ਹੈ ਕਿ ਉਹ ਟੋਰੀ ਆਗੂ ਜਾਂ ਪ੍ਰਧਾਨ ਮੰਤਰੀ ਬਣਨਾ ਚਾਹੁੰਦੇ ਹਨ, ਪਰ ਫਿਰ ਵੀ ਇਨ੍ਹਾਂ ਕੁਝ ਮੈਂਬਰਾਂ 'ਤੇ ਸਭ ਦੀਆਂ ਨਜ਼ਰਾਂ ਰਹਿਣਗੀਆਂ।

ਹੋ ਸਕਦਾ ਹੈ ਕੁਝ ਹੋਰ ਮੈਂਬਰ ਵੀ ਦਾਅਵੇਦਾਰੀ ਲਈ ਅੱਗੇ ਆਉਣ।

ਇਹ ਵੀ ਪੜ੍ਹੋ:

ਆਓ ਜਾਣਦੇ ਹਾਂ ਉਨ੍ਹਾਂ ਬਾਰੇ ਜੋ ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ਦੀ ਦੌੜ ਵਿੱਚ ਤਕੜੇ ਉਮੀਦਵਾਰ ਬਣ ਸਕਦੇ ਹਨ:

ਰਿਸ਼ੀ ਸੁਨਕ

ਸਰਕਾਰੀ ਖਜ਼ਾਨੇ ਦੇ ਸਾਬਕਾ ਚਾਂਸਲਰ

ਲਿਜ਼ ਟਰੂਸ

ਵਿਦੇਸ਼ ਸਕੱਤਰ

ਸਾਜਿਦ ਜਾਵੇਦ

ਸਾਬਕਾ ਸਿਹਤ ਸਕੱਤਰ

ਨਧੀਮ ਜ਼ਹਾਵੀ

ਸਰਕਾਰੀ ਖ਼ਜ਼ਾਨੇ ਦੇ ਨਵੇਂ ਚਾਂਸਲਰ

ਜੇਰੇਮੀ ਹੰਟ

ਸੰਸਦ ਮੈਂਬਰ

ਸੁਏਲਾ ਬਰਾਵਰਮੈਨ

ਅਟਾਰਨੀ ਜਨਰਲ

ਪੈਨੀ ਮੋਰਡੌਂਟ

ਮਿਨਿਸਟਰ ਆਫ਼ ਸਟੇਟ

ਬੇਨ ਵਾਲੇਸ

ਰੱਖਿਆ ਸਕੱਤਰ

ਟੌਮ ਟੁਗੇਂਧਟ

ਸੰਸਦ ਮੈਂਬਰ

ਸਟੀਵ ਬੇਕਰ

ਸੰਸਦ ਮੈਂਬਰ

ਬੀਬੀਸੀ ਪੰਜਾਬੀ ਨੂੰ ਆਪਣੇ ਐਂਡਰਾਇਡ ਫ਼ੋਨ 'ਤੇ ਇੰਝ ਲੈ ਕੇ ਆਓ:

ਪ੍ਰੀਤੀ ਪਟੇਲ

ਗ੍ਰਹਿ ਸਕੱਤਰ

ਗ੍ਰਾਂਟ ਸ਼ੈਪਸ

ਆਵਾਜਾਈ ਸਕੱਤਰ

ਟੋਰੀ ਪਾਰਟੀ ਦੇ ਮੈਂਬਰਾਂ ਵਿਚਕਾਰ ਰੱਖਿਆ ਸਕੱਤਰ ਬੇਨ ਵੈਲੇਸ ਵਧੇਰੇ ਪਸੰਦੀਦਾ ਜਾਪਦੇ ਹਨ ਜੋ ਕਿ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਦੀ ਥਾਂ ਪਾਰਟੀ ਆਗੂ ਅਤੇ ਪ੍ਰਧਾਨ ਮੰਤਰੀ ਦਾ ਅਹੁਦਾ ਸੰਭਾਲ ਸਕਦੇ ਹਨ।

ਕੰਜ਼ਰਵੇਟਿਵ ਪਾਰਟੀ ਦੇ 716 ਮੈਂਬਰਾਂ ਦੇ ਇੱਕ ਯੂਗੋਵ (YouGov) ਪੋਲ ਨੇ ਬੈਨ ਵੈਲੇਸ ਨੂੰ ਸਭ ਤੋਂ ਉੱਪਰ ਰੱਖਿਆ ਹੈ, ਜਿਨ੍ਹਾਂ ਤੋਂ ਬਾਅਦ ਪੈਨੀ ਮੋਰਡੌਂਟ ਅਤੇ ਫਿਰ ਤੀਜੇ ਨੰਬਰ 'ਤੇ ਰਿਸ਼ੀ ਸੁਨਕ ਆ ਰਹੇ ਹਨ।

ਕੰਜ਼ਰਵੇਟਿਵ ਆਪਣਾ ਨਵਾਂ ਆਗੂ ਕਿਵੇਂ ਚੁਣਦੇ ਹਨ?

ਜਿਵੇਂ ਹੀ ਕੰਜ਼ਰਵੇਟਿਵ ਪਾਰਟੀ ਦਾ ਆਗੂ ਆਪਣਾ ਅਹੁਦਾ ਛੱਡਣ ਦਾ ਫੈਸਲਾ ਕਰਦਾ ਹੈ, ਪਾਰਟੀ ਆਪਣੇ ਨਵੇਂ ਆਗੂ ਦੀ ਚੋਣ ਦੀ ਤਿਆਰੀ ਸ਼ੁਰੂ ਕਰ ਦਿੰਦੀ ਹੈ।

ਮੌਜੂਦਾ ਨਿਯਮਾਂ ਤਹਿਤ, ਇਸ ਅਹੁਦੇ ਦੇ ਉਮੀਦਵਾਰਾਂ ਕੋਲ 8 ਪਾਰਟੀ ਮੈਂਬਰਾਂ ਦਾ ਸਮਰਥਨ ਹੋਣਾ ਲਾਜ਼ਮੀ ਹੈ।

ਜੇਕਰ ਦੋ ਤੋਂ ਵੱਧ ਉਮੀਦਵਾਰ ਹੁੰਦੇ ਹਨ ਤਾਂ ਟੋਰੀ ਸੰਸਦ ਮੈਂਬਰ ਉਦੋਂ ਤੱਕ ਵੋਟਾਂ ਪਵਾਉਂਦੇ ਹਨ ਜਦੋਂ ਤੱਕ ਸਿਰਫ਼ ਦੋ ਹੀ ਉਮੀਦਵਾਰ ਨਹੀਂ ਰਹਿ ਜਾਂਦੇ।

ਫਿਰ ਅੰਤ ਵਿੱਚ ਜਦੋਂ ਸਿਰਫ਼ 2 ਉਮੀਦਵਾਰ ਬਾਕੀ ਰਹਿ ਜਾਂਦੇ ਹਨ ਤਾਂ ਜੇਤੂ ਦੀ ਚੋਣ ਕਰਨ ਲਈ ਦੇਸ਼ ਭਰ 'ਚੋਂ ਕੰਜ਼ਰਵੇਟਿਵ ਪਾਰਟੀ ਦੇ ਸਾਰੇ ਮੈਂਬਰ ਮਤਦਾਨ ਕਰਦੇ ਹਨ।

ਬੈਕਬੈਂਚ ਟੋਰੀ ਸੰਸਦ ਮੈਂਬਰਾਂ ਦੀ 1922 ਦੀ ਕਮੇਟੀ ਦੁਆਰਾ, ਹਰੇਕ (ਮਤਦਾਨ) ਮੁਕਾਬਲੇ ਲਈ ਸਮਾਂ-ਸੀਮਾ ਤੈਅ ਕੀਤੀ ਜਾਂਦੀ ਹੈ ਅਤੇ ਕਮੇਟੀ ਮੁਕਾਬਲਾ ਹੋਣ ਤੋਂ ਪਹਿਲਾਂ ਨਿਯਮਾਂ 'ਚ ਬਦਲਾਅ ਲਈ ਵੋਟ ਕਰ ਸਕਦੀ ਹੈ।

ਨਵੇਂ ਪ੍ਰਧਾਨ ਮੰਤਰੀ ਦੀ ਚੋਣ ਕਿਵੇਂ ਹੁੰਦੀ ਹੈ?

ਜੋ ਕੋਈ ਵੀ ਉਪਰੋਕਤ ਮੁਕਾਬਲੇ ਵਿੱਚ ਜਿੱਤਦਾ ਹੈ, ਉਹ ਪਾਰਟੀ ਆਗੂ ਬਣ ਜਾਂਦਾ ਹੈ।

ਉਸ ਤੋਂ ਬਾਅਦ ਮਹਾਰਾਣੀ ਉਨ੍ਹਾਂ ਨੂੰ ਸਰਕਾਰ ਬਣਾਉਣ ਲਈ ਕਹਿੰਦੇ ਹਨ।

ਕੀ ਬ੍ਰਿਟੇਨ ਵਿੱਚ ਆਮ ਚੋਣਾਂ ਹੋਣਗੀਆਂ?

ਸ਼ਾਇਦ ਨਹੀਂ।

ਬ੍ਰਿਟੇਨ ਵਿੱਚ ਜਦੋਂ ਕੋਈ ਪ੍ਰਧਾਨ ਮੰਤਰੀ ਅਸਤੀਫ਼ਾ ਦਿੰਦਾ ਹੈ ਤਾਂ ਆਮ ਚੋਣਾਂ ਨਹੀਂ ਹੁੰਦੀਆਂ।

ਹੁਣ ਅਗਲੀਆਂ ਚੋਣਾਂ ਜਨਵਰੀ 2025 'ਚ ਕਰਵਾਈਆਂ ਜਾ ਸਕਦੀਆਂ ਹਨ ਪਰ ਨਵਾਂ ਪ੍ਰਧਾਨ ਮੰਤਰੀ ਚਾਹੇ ਤਾਂ ਉਸ ਤੋਂ ਪਹਿਲਾਂ ਵੀ ਚੋਣਾਂ ਕਰਵਾਉਣ ਦਾ ਫੈਸਲਾ ਲੈ ਸਕਦਾ ਹੈ।

ਇਹ ਵੀ ਪੜ੍ਹੋ:

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)