بریتانیا ته د زېلېنسکي ناڅاپي سفر؛ ریشي سوناک سره پر مرستو خبرې کوي
د عکس سرچینه، EPA
د اوکرایین ولسمشر ولودمیر زېلېنسکي له ایټالیا، جرمني او فرانسې وروسته بریتانیا ته ناڅاپي سفر کړی او ټاکلې دغلته له لومړي وزیر ریشي سوناک سره وګوري.
ښاغلي زېلېنسکي د ټویټ یوه پیغام کې لیکلي چې له خپل "ملګري" ښاغلي سوناک سره به د کارنده خبرو لپاره وګوري.
دا په داسې حال کې ده چې بریتانیا د پنجشنبې پر ورځ اعلان وکړ چې اوکرایین ته د روسیې یرغل پر وړاندې مقابلې لپاره اوږد واټنه توغندي ورکوي.
ولودمیر زېلېنسکي هم د دې لپاره له لوېدیزو مشرانو سره پر لیدنو بوخت دی، چې اوکرایین سره پوځي ملاتړ زیات کړي.
هغه پر خپل ټویټر لیکلي "چې خبره زموږ د ځمکني او هوايي وړتیاو پراختیا ته راځي، بریتانیا پکې مخکښه ده. دا همکاري به نن دوام وکړي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د بریتانیا د لومړي وزیر دفتر وايي چې ښاغلی سوناک به اوکرایین ته د ملاتړ د یوې بشپړې ټولګې د ورکړې پر اهمیت ټینګار وکړي.
لومړيوزیر ویلي چې اوس د اوکرایین د جګړې "مهم" پړاو دی او دا چې "موږ باید دوی [اوکرایین] ناهیلی نه کړو."
"د پوتین د یرغلګرې جګړې لومړۍ کرښې ممکن په اوکرایین کې وي، خو چاودونه یې ټوله نړۍ کې غځېدلي. دا زموږ د ټولو په ګټه ده چې ډاډمنه کړو چې اوکرایین بریالی کېږي او د پوتین بربریت څه په لاس نه راوړي."
تمه دا ده چې د دواړو مشرانو ترمنځ لیده کاته به څو ساعته وخت واخلي.
بریتانیا څلورم اروپايي هېواد شو چې د اوکرایین ولسمشر یې په دې سفر کې دوره کوي.
هغه تر دې وړاندې پاریس، برلین او روم کې له چارواکو سره کتلي دي.
د یادونې ده چې د اوکرایین ولسمشر تېره فبرورۍ کې هم بریتانیا ته راغلی و.
نوموړي هغه مهال له پاچا او دولتي چارواکو سره پر کتلو سربېره د بریتانیا پارلمان ته وینا هم کړې وه.
