کورونا وېروس؛ افغانستان کې د دویمې څپې راتلو وېره ډېره ده

د افغانستان د روغتیا وزارت وايي له لوېدیځو ولایتونو د کورونا وېروس د دویمې څپې خورېدو اندېښنې شته. په همدې موخه د عامې روغتیا سرپرست وزیر له یوه پلاوي سره غور، بادغیس او هرات ولایتونو ته تللی او له سیمه ییزو مسؤلینو سره یې د دویمې څپې د مخنیوي لپاره تصمیمونه نیولي دي.

د روغتیا وزارت چارواکي دا هم وايي له شاوخوا یوې میاشتې راهیسې چې ښوونځي پرانیستل شوي تر اوسه په زده کوونکو کې د کورونا وېروس کومه مثبته پېښه نه ده ثبت شوې.

بل خوا، د روغتیا نړیوال سازمان خبرداری ورکړی، چې کورونا وبا لاهم یو ګواښ دی او هېوادونه یې باید د مخنیوي لپاره لا ډېر لاس په کار شي.

د دغه سازمان د بېړنیو چارو مشر ډاکټر مایک راین وايي، د راتلونکي ژمي لپاره باید له دې ناروغۍ سره د مبارزې لپاره چمتووالی ونیول شي.

نوموړي دا څرګندونې داسې مهال کړې، چې ګڼو هېوادونو د کورونا وېروس د دویمې څپې له کبله د محدودیتونو لګولو اعلان کړی.

په ورته وخت کې، په افغانستان کې د روغتیا نړیوال سازمان د بېړنیو پروګرامونو مسئول وايي چې په افغانستان کې د کورونا وېروس هغه ډول چې پکار دی د خلکو له لورې پاملرنه نه ورته کېږي او ښايي دا چاره د دغه وېروس د پېښو شمېر ډېر کړي او ان د دویم پړاو وېره یې شته.

دغې ادارې ویلي، د پوهنتونو او ښوونځیو له بیا پیلېدا سره د پېښو شمېر ډېرېدو ته اندېښنه لري او زیاتوي چې خلک اوس دغه ننګونې جدي نه ګڼي.

په کابل کې زموږ همکار ندیم اشرف په افغانستان کې د روغتیا نړیوال سازمان د بېړنیو پروګرامونو له مسئول داود الطاف سره خبرې کړې دي.

ښاغلي الطاف ویلي، له بده مرغه له تېرو دوو اونیو راهیسې افغانستان، په تېره لوېدیځو سیمو کې د کورونا وېروس پېښې ډېرې شوې دي.

نوموړی وايي، که خلک روغتیايي سپارښتنې او لارښوونکې عملي نه کړي او جدي پام ورته ونه کړي، د کورونا وبا د دویمې څپې راتلو وېره ډېره ده، په تېره په هغو ښوونځیو او پوهنتونونو کې چې څه موده مخکې بیا پیل شوي، روغتیايي او وقایوي لارښوونې جدي نه دي ګڼل شوې.

کورونا ته ځانګړې شوې پاڼه

د روغتیا وزارت د نویو شمېرو له مخې په تېرو ۲۴ ساعتونو کې د کرونا ۹۵ شکمنې پېښې ارزول شوي، چې ۲۲ یې مثبتې ختلې دي.

په افغانستان کې د کورونا وېروس ثبت شوې شمېرې نژدې ۳۹ زرو ته رسېږي او د همدې وېروس له امله د مړو شمېر شاوخوا ۱۵۰۰ ته رسېدلی دی.

برتانیا

د برتانیا لومړي وزیر بوریس جانسن ویلي، هېواد یې د کوویډ-۱۹ ناروغۍ "دویمط څپې شاهد" دی، چې په وینا یې "په هېواد کې له روان وضعیت تېښته نه شته."

ښاغلي جانسن زیاته کړې "په پراخ ډول د ټولبند لپاره هېڅوک لېوال نه دي"، خو باید د روغتیا لپاره ځینې محدودیتونه ولګول شي.

بوریس جانسن دا څرګندونې داسې مهال کړې چې په برتانیا کې د کورونا وېرسو تازه ۴۳۲۲ پېښې ثبت شوې دي.