د افغانستان د زعفرانو بابا محمد اکبر مړ شو
د عکس سرچینه، AFP
د افغانستان د هرات اوسېدونکی حاجي محمد اکبر- چې په 'زعفران بابا' مشهور و- د دوشنبې په ورځ په دغه ولایت کې مړ شو.
نوموړی یو هغه لومړنی کس و چې هرات کې یې زعفران دود کړل.
حاجي محمد اکبر یو هغه مخکښ کرونګر بلل کېږي چې د زعفرانو تولید او پراختیا ته یې کار کړی دی.
هرات دا مهال د زعفران د تولید له پلوه افغانستان کې لومړی ځای لري او د دې ولایت تولیدي زعفران د ښه کیفت له امله نړیوال پېرونکي لري.
د افغانستان ولسمشرۍ ماڼۍ د یوه پیغام خپرولو سره ویلي: "حاجي محمد اکبر ۲۵ کاله عمر د زعفران په کرلو او دودولو تېر کړ او د افغانستان زعفران یې په ملي او نړیواله کچه مشهور او جوت کړل."
دغه پیغام کې زیاته شوې چې نوموړی د افغانستان د زعفران کرونګرو ته لوی خدمت کړی او د دوی د ملاتړ لپاره یې هر ډول هڅې وکړې.
د هرات د کرنې رییس عبدالصبور رحماني بي بي سي ته وویل، حاجي محمد اکبر هغه مهال د زعفران کرلو ته مخه کړه چې افغان کرنګر له دې بوټي سره ناشنا وو او بازار یې هم نه درلود.
د هغه په خبره، که څه هم نور کرونګر هم د زعفران دودولو کې رول لري، خو د دې محصول په دودولو او کرلو کې د زعفران باباد ونډه ډېره جوته یا برجسته ده.
د ښاغلي رحماني په خبره، د نوموړي هڅې سبب شوې چې د مخکېني ولسمشر حامد کرزي په واکمنۍ کې دې کرونګر ته د زعفران بابا نوم ورکړل شي.
ښاغلی رحماني زیاتوي، تېر کال هرات د ۱۵ ټنه زعفران تولیدولو سره افغانستان کې اول ځای خپل کړ او د اټکلونو له مخې تمه ده چې سږ کال هم دا ولایت نژدې ۲۰ ټنه زعفران تولید کړي.
افغانستان کې د زعفران ټولولو موسم په تله یا میزان میاشت کې پیلېږي.
