ولسي جرګې د افغان حکومت د ملي دسترخوان پروګرام رد کړ

د افغاستان ولسي جرګې د چارشنبې غونډه کې د حکومت هغه پروګرام چې له بې وزلو کورنیو سره د مرستو لپاره جوړ شوی د رایو په اکثریت رد کړ.

د دې پروګرام مالي لګښت چې نړیوال بانک کې ور کوي ۲۸۰ میلیونه ډالره ښودل شوی او په دوه پړاوونو کې عملي کېږي.

دا پروګرام تېره اونۍ ارګ کې د ولسمشر محمد اشرف غني له خوا رسما پرانیستل شو.

خو د ولسي جرګو غړو ویلي د دې پروګرام لپاره د ځانګړې شوې بودیجې په اړه له دوی سره سلا نه ده شوې.

حکومت وايي، د دې پروژې له مخې غواړي نږدې څلور میلیون بې وزله کورنیو سره مرسته وکړي، خو د ولسي جرګې غړي دې پروګرام او مدیریت کې یې د بډو په هکله اندېښنه لري.

خو د افغان ولسمشر ویاند صدیق صدیقي وايي، د ملي دسترخوان موخه له لوږې، بې وزلۍ او د کورونا منفي اغېز سره مقابله ده:

"زموږ هیله دا ده چې دوی(وکیلان) د خلکو سره وي او کله چې حکومت یو پراخ پروګرام لري هغه هم د دوی موکلانو ته نو دوی دې ملاتړ وکړي."

د کورونا وېروس وبا لومړیو کې حکومت په کابل او نورو ولایتونو کې د وچې ډوډۍ وېشلو لړۍ هم درلوده، چې پکار وه، د نوملړ له مخې بې وزله کورنیو ته لس لس ډوډۍ هره ورځ ور کړي.

خو پر هغه پروګرام هم نیوکې دا وې چې درغلي پکې شوې ده.

صدیق صدیقي وايي، د هغه پروګرام په هکله شويو شکایتونو ته رسیدګي کېږي او په یوه پروګرام کې ستونزې باید د دې سبب نه شي، چې له خلکو سره د مرستې د نورو پروګرامونو خنډ شي.

د ولسمشرۍ ماڼۍ په وینا، دا پروګرام به په ۳۴ ولایتونو کې عملي کېږي.

د ارګ په وینا دغه مرستې به د ولسي تړون له لارې ویشل کېږي او پر دولت سربېره به یې مدني ټولنې، د دولت پر کړنو د څار بنسټونه او عام ولس نظارت کوي.

ارګ وايي، په لومړي پړاو کې به ۳۴ ولایتونو کې ۱٫۶۷ میلیون کورنیو ته د ۸۸ میلیون ډالرو په ارزښت د خوراکي توکو بستې، چې غوړي، وریجې، لوبیا، اوړه او د لاس مینځلو صابون پکې شامل دي، ووېشل شي.