د چابهار بندر پر لور لومړنی افغان صادراتي کاروان وخوځېد
د عکس سرچینه، Arg
هند ته د افغانستان د ځمکنیو صادراتو لومړی کاروان په رسمي مراسمو د نیمروز ولایت له زرنج نه د ایران چابهار بندر ته وخوځېد. د څه باندې ۲۰ باري ګاډو په دغه کتار کې ۵۷۰ ټنه مال بار دی.
له ورېښم بندره چابهار بندر ته د افغانستان لومړی سوداګریز کاروان د ولسمشر غني له خوا د نیمروز ولایت د مشرانو او چارواکو په شتون کې وخوځېد.
دغو مراسمو کې له ولسمشر غني او پلاوي سره یې په کابل کې د هند سفیر هم ملګری دی.
ولسمشر غني په دې اړه جوړو شویو مراسمو کې کې وویل "نن نیمروز له یوه محروم ولایته یوه کلیدي ولایت ته تبدیلېږي. "
د عکس سرچینه، Arg
هند ته په دغو ځمکنیو صادراتو کې مۍ او د ننګرهار ولایت شوکاڼی 'تالک' شامل دي.
د ولسمشر ویاند هارون چخانسوري ویلي، پر چابهار لار به پر هند سربېره، خلیجي هېوادونو ته هم د افغانستان صادرات کېږي.
هند لا وختي افغانستان ته د چابهار بندر په کارولو د مالونو استول پیل کړي دي.
چابهار بندر د افغانستان لپاره د سمندر له لارې د نړیوالې سوداګرۍ په موخه تر ټولو نژدې لار بلل کېږي.
افغان ولسمشر محمد اشرف غني وايي، پر خپلو پښو د افغانستان د درېدو لپاره باید د افغانستان صادرات ډېر شي او موخه دا ده چې په کال کې دوو میلیاردو ډالرو ته ورسېږي:
"۱۸ کاله پخوا، د افغانستان صادرات ۲۰ میلیونه ډالره وو، خو موخه مو دا ده چې په یوه کال کې به د افغانستان صادرات دوو میلیاردو ډالرو ته رسېږي. دا هېواد بډای دی. زموږ جنجال دا نه دی چې خدای جل جلاله نعمتونه نه دي راکړي."
د عکس سرچینه، ARG
د چابهار بندر له لارې هند ته د افغانستان د صادراتو پیل په یو لړ سمبولیکو مراسمو کې د نیمروز په زرنج ښار کې ترسره کېږي.
چابهار بندر په ایران کې د هند سمندر پر غاړه د هند په مالي مرسته جوړ شوي چې له دې لارې غواړي له افغانستان او نورو هېوادونو په تېره بیا منځنۍ اسیا سره سودګریزه راکړه ورکړه پراخه کړي.
پاکستان لوی خنډ
د عکس سرچینه، Gemic
منځنۍ اسیا او افغانستان ته د هند د سوداګریزې راکړې ورکړې پروړاندې لوی خنډ پاکستان دی، خو له دې لارې هند کولی شي په خلاص مټ افغانستان او له منځنۍ اسیا او نورو هېوادونو سره سوداګري وکړي.
د دې بندر ګټه درې واړو هېوادونو هند، افغانستان او ایران ته رسېږي.
امریکا د افغانستان لپاره د دغه بندر د ارزښت په پام کې نیولو سره، پر ایران له لګول شویو بندیزونو څخه مستثنا کړی.
درې واړو هېوادونو دوه کاله وړاندې د دې بندر د کارولو هوکړه لاسلیک کړه.
هند دغه بندر ته د افغانستان د رسېدو لپاره د زرنج - دلارام ترمنځ سړک هم جوړ کړی.
هند د افغانستان د تولیداتو لپاره یو ښه بازار ګڼل کېږي او دغه هېواد له افغانستان سره د لویو مرستندویو هېوادونو په کتار کې راځي، چې مرستې یې تر ډېره پر بنسټیزو پروژو لګولې دي.
