سترې محکمې سره نژدې چاودنه کې لږ ترلږه "۲۰" تنه وژل شوي
د کابل د روغتونونو مشر سليم رسولي بي بي سي ته ويلي، سترې محکمې ته نژدې چاودنه کې لږ ترلږه ۲۰ تنه وژل شوي او ۴۵ تنه نور ټپيان دي.
د ځينو رپوټونو له مخې په وژل شويو کې ښځې او ماشومان هم شامل دي.
د افغانستان عامې روغتیا وزارت وايي دا چاودنه د سترې محکمې له عمومي دروازې سره شوې ده.
کابل کې د نهمې حوزې پوليسو بي بي سي ته ويلي، يوه ځانمرګي بريدګر د محکمې کارکوونکو د رخصتۍ پر مهال چاودنه کړې ده.
دا بريد په داسې حال کې شوی چې پرون ملگرو ملتونو ويلي وو په افغانستان کې د ملکي وگړو مرگ ژوبله تېر کال تر بل هر وخت ډېره وه.
د افغانستان د سترې محکمې ودانۍ پر هغه سړک پرته ده چې د کابل هوايي ډګر د امریکا له سفارت سره نښلوي او دغه سیمه کې کلک امنيتي تدبيرونه نيول شوي وي.
د عکس سرچینه، EPA
تراوسه هېڅ کومې ډلې د ننني بريد پړه پر غاړه نه ده اخيستي.
وړاندې د عامې روغتيا وزارت ویاند اسماعیل کاووسي بي بي سي ته ويلي وو په چاودنه کې پنځه کسان وژل شوي او ۱۷ ټپیان شوي دي.
د نوموړي په خبره، د پېښې ټپیان وزیر اکبر روغتون ته لېږدول شوي دي.
د پېښې ځای امنیتي ځواکونو کلابند کړی دی.
