मार्ड निवासी डाॅक्टरांचा संप मागे

"आम्ही गिरीश महाजन यांची भेट घेतली. आमच्या मागण्यांवर सकारात्मक चर्चा झाली. आमचा संप आम्ही मागे घेत आहोत", असं सेंटर मार्ड निवासी डाॅक्टरांनी पत्रकार परिषदेत स्पष्ट केलं.

"लहाने सर यांचं योगदान आम्हाला नाकारता येणार नाही. पण मुलांचं शैक्षणिक नुकसान हे सुद्धा टाळता येणार नाही", असं त्यांनी पुढे सांगितलं.

25 वर्षांच्या हुकूमशाहीचा आज अंत झाला, आमच्या बहुतांश मागण्या मान्य झालेल्या आहेत असं त्यांनी सांगितलं. डाॅ. लहाने आणि डाॅ. रागिणी पारेख यांचा राजीनामा स्वीकारून पदावर नवीन जागा भरण्याची मागणी होती ती सरकारने मान्य केलेली आहे असंही डॉक्टरांनी सांगितलं.

मुंबईतील नामांकित सर जेजे सरकारी रुग्णालायातील 9 डॉक्टरांनी तडकाफडकी राजीनामा दिला होता. त्यात सुप्रसिद्ध नेत्ररोगतज्ज्ञ डॉ. तात्याराव लहाने यांचाही समावेश होता.

शासनाने हा राजीनामा मंजूर केला आहे. तसंच मोतीबिंदू मुक्त महाराष्ट्र अभियानाच्या समन्वयक पदाचा करार समाप्त करण्यात आला आहे.

यासंबंधी शासनाने एक परिपत्रक जारी केलं आहे. गेल्या वर्षी 13 डिसेंबरला त्यांची या पदावर नियुक्ती करण्यात आली होती. आता त्यांनी जे.जे. चा राजीनामा दिल्यावर हाही करार संपुष्टात आल्याचं शासनाने म्हटलं आहे.

या विषयावर बीबीसी मराठीशी बोलताना डॉ. तात्याराव लहाने म्हणाले, “माझा राजीनामा शासनाने मंजूर केला आहे. मी शासनाचा आभारी आहे. यापुढे मी वैद्यकीय सेवा देत राहीन. अंबेजोगाई आणि मुरुड येथे काम सुरू राहील. खासगी प्रॅक्टिस सुद्धा सुरू आहे.”

तसंच "निवासी डाॅक्टरांनी केलेल्या आरोपांवर मी आधीच बोललो आहे आता मला यावर बोलायचं नाही. आता हा विषय पूर्णतः शासनाचा आहे. ते पाहतील या प्रकरणाचे पुढे काय करायचे," असंही ते म्हणाले.

डाॅ. रागिणी पारेख यांचा स्वेच्छानिवृत्तीचा अर्ज राज्य शासनाकडून मंजूर करण्यात आला आहे.

इंदिरा गांधी शासकीय वैद्यकीय महाविद्यालयाचे नेत्रशल्यचिकित्साशास्त्राचे प्राध्यापक डाॅ. रवी चव्हाण यांच्याकडे ग्रँट शासकीय वैद्यकीय महाविद्यालयात प्राध्यापक पदाचा अतिरिक्त कार्यभार सोपवण्यात आला आहे.

'आमच्याशी बोलताना शिवराळ भाषा वापरली जाते'

डाॅ. तात्याराव लहाने आणि डाॅ. रागिणी पारेख यांच्याविरोधात तक्रारी करत जेजे रुग्णालयातील निवासी डाॅक्टरांनी गेल्या चार दिवसांपासून पुकारलेला संप आजही कायम आहे.

डाॅ. तात्याराव लहाने आणि डाॅ. रागिणी पारेख यांच्याविरोधात जेजे रुग्णालयातील नेत्रचिकित्सा विभागातील 28 निवासी डाॅक्टरांनी तक्रार केली आहे. डाॅ. लहाने आणि डाॅ. पारेख निवासी डाॅक्टरांना शिकवत नसून कुठल्याही प्रकारची संधी मिळत नसल्याची तक्रार निवासी डाॅक्टरांनी केली आहे.

डाॅ. लहाने यांचा राजीनामा सरकारने मंजूर केल्यानंतर निवासी डाॅक्टरांनी डाॅ. रागिणी पारेख यांची स्वेच्छानिवृत्ती मंजूर करावी आणि या प्रकरणात चौकशी करावी अशी मागणी केली आहे.

बीबीसी मराठीशी बोलताना निवासी महिला डाॅक्टर म्हणाल्या, "आमच्याशी बोलताना शिवराळ भाषा वापरली जाते. आम्हाला काहीच शिकवलं जात नाही. रुग्णाला हात लावू दिला जात नाही. तुम्ही रुग्णांना अंध कराल या भाषेत सर्व रुग्णांसमोर आमच्याशी बोललं जातं. म्हणून आम्ही त्यांच्या राजीनाम्याची मागणी केली."

दुसऱ्या निवासी डाॅक्टर म्हणाल्या,"आम्ही सहा महिन्यांपासून काम करत आहोत पण आम्हाला बेसिक उपचारही करू दिले जात नाहीत. दुस-या वर्षाचे निवासी डाॅक्टरांना आॅपरेशन थिएटरमध्येही प्रवेश करू दिला नाही. मग आम्ही भविष्यात शस्त्रक्रिया कशा करणार?"

शुक्रवारी (2 जून) डाॅ. तात्याराव लहाने यांनी पत्रकार परिषदेत निवासी डाॅक्टरांचे सर्व आरोप फेटाळले. नियमाप्रमाणे निवासी डाॅक्टरांना संधी दिली जाते असंही त्यांनी स्पष्ट केलं.

'सुमित लहाने कोणतंही पद नसताना जेजेमध्ये'

डाॅ. लहाने यांचा मुलगा डाॅ. सुमित लहाने यांच्यावरही निवासी डाॅक्टरांचे आरोप कायम आहेत.

डाॅ. तात्याराव लहाने यांनी शुक्रवारी (2 जून) पत्रकार परिषदेत यासंदर्भात दिलेलं स्पष्टीकरण निवासी डाॅक्टरांनी अमान्य केलं आहे.

"सुमित लहाने त्यांची कोणतीही पोस्ट नसताना जेजेमध्ये रुग्णांच्या डोळ्याची शस्त्रक्रिया करत होते. काल डाॅ. लहाने यांनी सांगितलं की लहान मुलांच्या डोळ्याच्या कँसरवरील उपचार ते करायचे आणि मार्च 2022 मध्ये त्यांची नियुक्ती संपुष्टात आल्यावर ते केसेसचा पाठपुरावा करत होते पण हे चुकीचं आहे. वर्षभर कोणत्या रुग्णांचा फाॅलो अप त्यांनी घेतला?"

"सुमित लहाने यांनी त्यांचा कार्यकाळ संपल्यावर कॅटरॅक्टच्याही शस्त्रक्रिया केल्या आहेत. त्याची पत्र आमच्याकडे आहेत आम्ही दाखवू शकतो. विभाग प्रमुख डाॅ. रागिणी पारेख यांच्या मर्जीने हे सर्व चालत होतं. पण आम्हाला मात्र संधी दिली जात नव्हती."

हे आरोप डाॅ. तात्याराव लहाने यांनी यापूर्वी फेटाळले आहेत."माझ्या मुलाला लहान मुलांवर उपचार केले म्हणून शिक्षा होणार असेल तर त्याचा मला अभिमान आहे. त्याचा कार्यकाळ संपला होता पण काही लहान मुलांच्यावरील उपचार बाकी होते. म्हणून त्याने आपली वैद्यकीय सेवा दिली." असं डाॅ. लहाने यांचं म्हणणं आहे.

लहाने गटाच्या मागण्या काय आहेत?

1. सर जे जे रुग्णालयाच्या अधिष्ठाता डॉ. पल्लवी सापळे यांच्यावर कारवाई व्हावी.

2. निवासी डॉक्टरांना भडकवणाऱ्या डॉ.सार्बिक डे, डॉ स्मृती पांडे आणि डॉ. संस्कृती प्रसाद यांचे पीजी रजिस्ट्रेशन रद्द करून त्यांना समज द्यावी.

3. डॉ. रागिणी पारेख यांची स्वेच्छानिवृत्ती मंजूर करावी.

4. सर्व अध्यापकांचे राजीनामे मंजूर करून त्यांना कार्यमुक्त करण्यात यावे.

लहाने गटाच्या डॉक्टरांनी राजीनामे का दिले?

जे जे रुग्णालय हे राज्यातील एक नामांकित सरकारी रुग्णालय आहे. राज्यभरातून रुग्ण इथे उपचारासाठी येतात.

या रुग्णालयातील नेत्रचिकित्सा विभागाही राज्यात प्रसिद्ध असून मोतीबिंदू शस्त्रक्रियेसाठी मोठ्या संख्येने ग्रामीण भागातील रुग्ण याठिकाणी येतात.

डॉ. तात्याराव लहाने यांनी गेली अनेक वर्षं या विभागाचं नेतृत्त्व केलं. आता ते निवृत्त असून सरकारच्या मोतीबिंदू मुक्त महाराष्ट्र या अभियानाचे काम पाहत आहेत.

डॉ.. लहाने यांच्यानंतर डॉ.रागिणी पारेख या त्यांच्या सहकारी या विभागाचं काम पाहत होत्या. परंतु काही दिवसांपूर्वी याच विभागात काम करणाऱ्या 28 निवासी डॉक्टरांनी डॉ.लहाने यांच्यासह इतर वरिष्ठ डॉक्टरांविरोधात तक्रारी केल्या आहेत.

या तक्रारीनंतर रुग्णालयाकडून एक चौकशी समिती नेमण्यात आली.

यासंदर्भात आपल्या पत्रात हे 9 डॉक्टर्स म्हणतात, 'नेत्र विभागातील प्रथम आणि द्वितीय वर्षाच्या निवासी डॉक्टरांच्या तक्रारींवर आम्ही सरकारला उत्तर दिलं आहे.

1995 पूर्वी दररोज 30 रुग्ण येणाऱ्या विभागात आज रोज 300 - 400 रुग्ण येत आहेत.

याची दखल घेत केंद्र सरकारने 2008 मध्ये या विभागाला 'विभागीय नेत्रचिकित्सा संस्थेचा' दर्जा दिला. इथे राज्यभरातून रुग्ण उपचारासाठी येतात.

मोतीबिंदू, काचबिंदू, वैद्यकीय, रॅटीना, लेसिक, बुब्बुळावरील शस्त्रक्रिया, तिरळेपणा, लहान मुलांच्या डोळ्यावरील उपचार, डोळ्यांचा कर्करोग यावर या विभागामार्फत उपचार दिले जातात. अशा गंभीर आजारांवर तज्ज्ञांमार्फत उपचार देणारा हा राज्यातील एकमेव सरकारी विभाग आहे.

गेल्या 28 वर्षांत 692 शिबिरामध्ये 30 लाख रुग्णांवर उपचार केल्याचा दावा या विभागाने केला आहे.'

2016 मध्येही या विभागातील निवासी डॉक्टरांनी संप पुकारला होता. पण 12 पैकी 11 डॉक्टरांनी माफी मागून त्यांची तक्रार मागे घेतली होती. त्यावेळीही आमच्यावर अन्याय झाला पण रुग्णांसाठी आम्ही तो सहन केला असं राजीनामा देताना डॉक्टरांनी म्हटलं आहे.

22 मे रोजी प्रथम आणि द्वितीय वर्षाच्या 28 निवासी डॉक्टरांनी मार्ड संघटनेमार्फत जेजे रुग्णालयातील अधिष्ठाता डॉ. पल्लवी सापळे यांच्याकडे तक्रार केली आहे.

यासंदर्भात रुग्णालय प्रशासनाने नेत्र विभाग प्रमुखांकडे स्पष्टीकरण मागितले. परंतु स्पष्टीकरण देण्यापूर्वीच चौकशी समिती नेमली असा आक्षेपही वरिष्ठ डॉक्टरांचा आहे.

या समितीवर 31 मे रोजी सेवानिवृत्त झालेले डॉ. अशोक आनंद यांची नियुक्ती करण्यात आली आहे. या नियुक्तीवरही डॉक्टरांचा आक्षेप आहे.

राजीनामा दिलेल्या डाॅक्टरांपैकी एक डाॅ. रागिनी पारेख यांनी यापूर्वी एका महिलेच्या छळाप्रकरणात डाॅ. अशोक आनंद यांची चौकशी केली आहे. तसंच त्यांनी डाॅ. लहाने, डाॅ. रणजीत माणकेश्वर, डाॅ. एकनाथ पवार, डाॅ. श्रीमती अभीचंदानी यांच्याविरोधात अॅट्रोसिटीअंतर्गच पोलीस स्टेशनला तक्रार दाखल केली होती.

या पार्श्वभूमी डाॅ. आनंद यांची समितीच्या अध्यक्षपदावर केलेली नियुक्ती अधिष्ठात्यांनी आकसबुद्धीने आम्हाला त्रास देण्यासाठी केली आहे असाही आरोप राजीनामा दिलेल्या डाॅक्टरांनी केला आहे.

तसंच अधिष्ठात्यांनी नेत्रचिकित्सा विभागाला गेल्या वर्षभरात कोणतीही मदत केलेली नाही, अशीही डाॅक्टरांची तक्रार आहे.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)