Бишкекте тамактан массалык уулангандардын арасында балдар да бар

Бишкектеги "Даамдуу" аттуу тез тамактануучу жайдан тамактангандан кийин ууланып, ооруканага кайрылган 23 бейтаптын абалы туруктуу. Бул тууралуу Республикалык жугуштуу оорулар ооруканасынын жетекчиси Гүлжигит Аалиев Би-Би-Сиге билдирди.

Айтымында, 15-январда саат 10:30дан тарта ооруканга аталган жайдан тамактангандар кайрыла баштаган. Кечки саат 19:00дөн кийин кайрылгандардын саны көбөйгөн.

"Жалпысынан 23 бейтап кайрылды. Алардын 18и ооруканага жаткырылды. Бешөөнө керектүү жардам көрсөтүлүп, үйлөрүнө коё берилди. Жабыркагандардын бешөө 4 жаштан 15 жашка чейинки балдар, калгандары 20–30 жаштагылар. Баарынын абалы туруктуу, дары-дармек менен камсыздалып жатат. Бүгүн эртең менен палаталарды кыдырып баарынан кабар алып чыктым, бейтаптардын абалы канааттандырарлык",- деди Гүлжигит Аалиев.

Дарыгердин маалыматына ылайык, бул жыл башынан бери катталган массалык ууланган биринчи учур.

Саламаттык сактоо министрлигине караштуу Оорулардын алдын алуу жана мамлекеттик санитардык-эпидемиологиялык көзөмөл департаментинин өкүлү Назгүл Абамуслимованын айтымында, тиешелүү анализдер алынып, иликтөө иштери жүргүзүлүүдө. Тез тамактануучу жай убактылуу жабылып, 41 миң сом айып салынды.