Ọkụ ọ na-agba n’ụlọụka St Anthony Catholic Church Amansea nke Anambra steeti?

Ọ bụghị eziokwu na ọkụ gbara ụlọụka Katọlik St Anthony dị n’Amansea nke Anambra steeti taa bụ Sọnde, ụbọchị 10 nke ọnwa Julaị, dịka akụkọ na-efegharị na soshal midia si kwuo. Ndị mmadụ gwara onye ntakụkọ BBC Igbo gara ebe ahụ na ọ bụ n’izu gara aga ka otu tanka gbara ọkụ n’ihu ụlọụka ahụ.

Onye ntaakụkọ anyị garuru ebe ahụ ji anya ya hụ na ya bụ akụkọ na-efegharị bụ akụkọ ụgha dịka enweghị ọkụ na-agbe ebe ahụ taa.

Ndị uweojii n’Anambra steeti gwakwara BBC Igbo na ọ nweghị akụkọ ọbụla ha natarala maka ọkụ a sị na-agba n’ụka ahụ.

Akụkọ malitere na-efegharị na soshal midia taa na-ekwusike na ọkụ na-agba ụlọụka St Anthony Catholic Church, Amansea nke Anambra steeti.

Otu ihe onyonyo nke ọtụtụ na-ekesa gosiri ebe ọkụ na-agba na nso ụlọ ahụ dịka olu onye na-ese nọ na-eti 'Leekwa na ọkụ na-agba ụlọụka St Anthony Catholic Church Amansea ugbua'.

Tochukwu Ikenga bụ ọnụ na-ekwuru ndị uweojii kọwaara BBC Igbo na ihe dị etu a anaghị eme na steeti ahụ taa.

Onye ntaakụkọ BBC Igbo gara ebe ahụ hụrụ na ụmụaka nọ n’ime ogige ụka ahụ na-egwu egwu dịka akacharala ụka nke taa bụ Sọnde.

Ndị nọ ebe ahụ gwara onye ntaakụkọ ahụ sị: “E nwere ụgbọala ukwuu nke tanka gbara ọkụ n’ihu ụka a, mana ọ bụ n’ịzụ gara aga ka ya bụ ihe mere”.

Lee ke ogige ụka ahụ dị taa bụ Sọnde ụbọchị 10 nke ọnwa Julaị, 2022.