Steeti ise a kachasị gbuo mmadụ na Naịjirịa n'afọ 2025

Onye Soja bu egbe ma guzoro ọtọ ebe ndị otu ya nọ n'ụgbọala nchekwa ma na-elegharị anya n'ime ọhịa

elekere 4 gara aga

Oge e ji agụ akụkọ nkeji 3

Ihe gbasara nchekwa bụ okwu a kachasị kpụrụ n'ọnụ na Naịjirịa nakwa nke na-enye ndị mmadụ nsogbu.

Nsogbu nchekwa ndị Naịjirịa na-agabiga gụnyere mwakpo ndị na-eyi ọha egwu a kpọrọ 'jihadists' na-eme, ndị ojiegbe maọbụ ndị omekome na-atọrọ ndị mmadụ nakwa nsogbu dị n'etiti ndị na-akọ ọrụ ugbo na ndị na-achị ehi.

Ụlọọrụ 'Beacon Security and Intelligence Limited' na-ahụ maka inyocha ihe gbasara nchekwa na Naịjirịa nakwa mpaghara Sahel n'Afrịka kwuru na ihe gbasara nsogbu nchekwa beletara n'afọ 2025 karịa nke afọ 2024.

N'ihe ndekọ ha na-ewepụta kwa afọ ọbụla, ha kwuru na ndị e gburu egbu na ndị a tọọrọ belatara karịa nke afọ 2024 dịka ha bipụtara steeti ndị nọ na Naịjirịa kachasị nwee nsogbu nchekwa n'afọ 2025.

Ụlọọrụ a gbakwasịrị ukwu n'ihe abụọ wee mee nnyocha a, nke gụnyere ogbugbu na ntọrọ mmadụ.

Skip content and continue reading

A ga-emepe ụlọakwụkwọ ndị e nwere na Niger Steeti n'ọnwa Jenụwarị -Gọọmenti5 Jenụwarị 2026
EFCC: Gịnị mere ụfọdụ ikpe nrụrụaka ji egbu oge?12 Jenụwarị 2026
Kedụ ihe mere Trump ji nye Naijiria na mba 23 ndị ọzọ mmachi visa?17 Disemba 2025

End of content

Zamfara

Ndị nchekwa dị iche iche gbakọrọ ọnụ n'ogige ama egwuregwu

Zamfara Steeti dị na mpaghara ugwu Naịjirịa bụ steeti kachasị nwee nsogbu nchekwa n'ime steeti ise 'Beacon Security' wepụtara n'afọ 2025

Ndekọ si n'aka Beacon Security gosiri na mmadụ puku abụọ, narị anọ na iri itoolu na itoolu (2499) bụ ndị atọọrọ, ebe ndị e gburu egbu ruru mmadụ otu puku, narị ise na iri atọ na anọ (1534).

Onye na-eyi ndụ egwu a ma ama bụ Bello Turji bụ ebe ahụ ka ọ nọ.

Skip Akachasị Gụọ and continue reading

Akachasị Gụọ

End of Akachasị Gụọ

Katsịna

Ndị mmadụ bu egbe ebe ụfọdụ nọ n'elụ ọgbatumtum ha

Ozi si n'aka ụlọọrụ nchekwa ekwupụtala Katsịna Steeti ya na Zamfara gbara agbataobi dịka steeti nke abụọ ọnọdụ enweghị nchekwa kachasị yie egwu n'afọ 2025.

Katsịna Steeti bụ otu n'ime steeti kachasị nwee mmetụta ndị ojiegbe na-atọrọ mmadụ maka ego mgbapụta.

E gburu ọnụọgụ mmadụ ruru narị itolu na iri na otu (911) ma tọrọ ihe ruru otu puku, narị anọ na iri isii na asatọ (1468)

Niger

Foto ndị mmadụ bu egbe mana anaghị ahụ ihu ha.

Niger Steeti dị na mpaghara Ugwu-Etiti Naịjirịa bụ steeti nke atọ kachasị nwee nsogbu nchekwa.

Ọnụọgụ ndị mmadụ e gburu egbu ruru otu puku na narị anọ (1400) ebe a tọọrọ mmadụ ruru narị asatọ na iri atọ na asatọ (838).

Ọ bụ na steeti a ka a tọrọ ọnụọgụ ụmụakwụkwọ kachasị elu, ihe ruru narị atọ (300) n'ụlọakwụkwọ 'St Mary's' dị n'obodo Papiri.

Borno

Borno bụ steeti nke anọ kachasị nwee nsogbu nchekwa. Mmadụ ruru narị isii na iri isii na itolu (669) bụ ndị a tọọrọ ebe e gburu ọnụọgụ mmadụ dị otu puku, narị isii na otu (1601)

Ndị na-eyị ọha egwu 'Boko Haram' nakwa 'ISWAP' bụ ndị na-akpa ike ebe ahụ.

Cheta na ọ bụ na Borno Steeti ka e gburu Ọchịagha ndịagha Naịjirịa bụ MA Uba.