Washing privates with soap: Nwaanyị o kwesịrị iji ncha asa ọtụ ya?

Ọtụtụ n'ime anyị chọrọ ịdị ọcha oge niile, na-enweghi nsogbu ọbụla n'ahụ ha.

Mana n'otu aka ahụ, ọtụtụ amaghị na ha ekwesighi iji ncha asa akụkụ ahụ ụfọdụ ndị zoro ezo.

Akụkụ ahụ ndị a gụnyere: mmepe ahụ nwaanyị (vaginal opening), ime ọnụ amụ nwoke (urethral opening), nakwa ebe e si anyụpụta nsị (anal sphincter).

Site na mgbe anyị nọ na nwata, a zụrụ anyị idowe ahụ anyị ọcha.

Ya mere anyị ji nlezianya asacha akụkụ niile dị n'ahụ anyị.

Mana kedụ etu i kwesiri iji saa akụkụ ahụ gị na-egosi ihe i jiri bụrụ nwoke maọbụ nwaanyị?

Ndị ọkacha mara kwuru na ọ bụ site n'iji naanị mmiri, onweghị ihe ọzọ.

Dkt. Udodi Kachikwuru Okoli (MBBS; MSc. Public Health; Registrar, Internal Medicine) kwuru sị na nwaanyị kwesịrị iji naanị mmiri saa akụkụ otu ya, nke ọ na-ahụ anya.

Gịnị kpatara na mmadụ kwesịrị iji sọọsọ mmiri? Ka anyị gwa gị.

Akụkụ ahụ ndị a enweghị mmanụ ahụ (sebum)

Ọtụ nwaanyị, ọnụ amụ nwoke na mmepe ahụ ebe e si anyụpụta nsị enweghi mmanụ ahụ n'ebe ndị ahụ dịka akụkụ ahụ ndị ọzọ.

N'ihi nke a, ọ dịghị mkpa iji ncha sachaa sachaa ha.

Nje na-akpata ọrịa

E nwere ụmụ kịrịkịrị akụrụngwa dị n'akụkụ ahụ ndị a nke na-enye aka ichekwa ya.

Ncha nwere ike ịsachapụ akụrụngwa ndị a.

Ọ bụrụ na akụkụ ahụ ndị a enweghị nchekwa site n'iji ncha sacha ha, ha agaghị enwe ike ịlụso nje ndị anya nkịtị anaghị ahụ agha.

Ọtụtụ ọrịa ụmụ nwaanyị na-ebute n'akụkụ ahụ ha ji bụrụ nwaanyị, bụ ncha butere ihe kpatara ọrịa ndị ahụ.

Ịkpọ nkụ

Ọ bụrụ na i jiri ncha na-asa akụkụ ahụ ndị a zoro ezo, o nwereike ime ka akụkụ ahụ ndị ahụ kpọọ nkụ.

Nke a adịghị mma.

Onwere ike ịbute nsogbu dịka 'inflammation', maọbụ 'anal fissures'.

Kedụ etu ị ga-esi jiri sọọsọ mmiri sachaa ebe ndị a?

Ọ ka mma iji mmiri nkịtị dị maọbụ dịtụ ọkụ.

Mana ọ bụrụ na ị chọrọ ịsacha ebe ndị ahụ nke ọma, tinye obere nnu na mmiri ahụ.

Chetakwa na ebe a na-ahụ anya n'ahụ nwaanyị bụ ebe a na-asa, ọ bụghị nke dị n'ime ahụ anaghị ahụ anya.

Dkt. Udodi kwukwara na ndị ji ihe dị iche iche asacha ime ahụ nwaanyị (douching), kwesịrị ịkwụsị ya, maka na ọ dịghị mma ma ncha.

Ọ kwuru sị na ọ nwere ike ibute ọrịa site n'ịtụgharị PH ahụ nwaanyị.

Ozọkwa, dịka chi si kee ọtụ nwaanyị, ọ na-eji aka ya asacha onwe ya.

Naanị mmiri ka i kwesịrị iji saa ya, ka o nwee ike rụọ ọrụ etu o kwesiri.

Dkt. Udodi sị na ikpu nwaanyị kwesịrị inwe isi, na ọ bụ etu ahụ ka Chukwu si kee ya.