Coronavirus Impact: Etu coronavirus si metụta emume 'Holy Week' nke afọ a

Ihe adịghịzị ka ọ dị na mbụ ugbua n'ihi na ọrịa coronavirus egosila ụwa ihe ọkụ jị ntị oke eme.

Ka ọ dị tata bụ Tọzde dị asọ, ọtụtụ ụlọụka na Naịjirịa mechiri emechi.

N'ụka Katọliki, tata ka a na-eme emume mass chrism, ebe ndị ụkọchukwu na-ekwenwo nkwa echichi ha.

Ụka Anglican nakwa ndị ọzọ na emekwa ya bụ emume "Maundy Thursday" maọbụ "Holy Thursday" kwa afọ n'ụwa niile.

Ọnụ na-ekwuru ụka Katọlik n'Enugwu Dayọsis bụ Fada Benjamin Achi kwuru na nke afọ a ga-adị iche n'ihi ọrịa coronavirus.

Fada Achi kwuru na ọ bụ nanị ndị ụkọchụkwụ iri abụọ 20 ga esonyere Bishọp na 'Chrism mass' nke afọ a iji nọchite anya ndị ụkọchukwu ndị ọzọ ọnụọgụgụ ha ruru 450.

Nke a bụ iji rube isi n'iwu gọmenti etiti wepụtara iji gbochie mgbasa ọrịa Corona.

Achị yọrọ ka ndị mmadụ sonye na ya bụ emume site na TV, Redio nakwa social media.

N'Ọnịcha

Ozi si n'aka Bishọp ụka Katọlik nke Ọnịcha bụ Valerian Okeke gosiri na ha agaghị aka ụka na mgbede Tọzde dị asọ.

Uka ga-ebido na mgbede 'Good Friday' n'elekere ise.

N'Abịa

Na mgbede ụbọchị Tọọzdee ka gọọmentị Abịa kwuru na ga-ebelata aka n'iwu onye nọrọ be ya nke ha tinyere.

Ha kwuru na nke a bụ iji mee ka ndị mmadụ sonye nke ọma n'emume 'Easter'.

Nke a pụtara na ụlọụka nwere ikike ịka ụka mana ndị mmadụ agaghị akarị 50 n'ime ụlọụka n'otu oge.

Amabeghi etu ndịisi ụka dị icheiche na steeti ahụ ga-esi megharịa ọgbakọ ha n'ihi ntuziaka ọhụrụ a gọọmentị wepụtara.

Abuja

Onyeisi ụka Katọlik n'Abuja bụ Bishọp Ignatius Kaigama machikwara ọgbakọ ndị mmadụ n'ụlọụka n'oge a, n'ihi coronavirus.

Usoro e wepụtara bụ na ndị ụka ga-esonye na mass site na igwe ịntaneetị nakwa onyoonyoo TV na ndị ọzọ.