Komla Dumor Award 2019: Nchọpụta kpakpando ọhụrụ na ntakụkọ Afrịka

BBC na-achọ onye ga-abụ kpakpando ọhụrụ n'ihe gbasara ntaakụkọ n'Afrịka maka nturuugo Komla Dumor nke BBC ụwa niile nọzi n'afọ ise ya.

Ndị ntaakụkọ na mpaghara Afrịka niile kwesiri ịtinye akwụkwọ maka nturugo a nke chọrọ ịchọpụta ọnatarachi ọhụrụ si Afrịka pụta.

Onye meriri ga-anọ ọnwa atọ n'isiụlọọrụ BBC n'obodo London na-amụta ọrụ aka na ahụmihe ọhụrụ.

Atụmatụ a ga-emechi n'ụbọchị 26 nke ọnwa Febụwarị afọ 2019 ebe elekere 23:59 n'oge ndị mba Briten (GMT).

E hibere nturugo a iji kwanyere Komla Dumor bụ onye ntaakụkọ mba Gana kajara akaja nke BBC ụwa niile ugwu dịka ọ nwụrụ n'ike n'afọ 2014 ọ dị afọ 41.

Ọ bụ n'obodo Legọs nke Naịjirịa ka esi amalite nturugo nke afọ a.

A ga-enye ya otu onye pụrụiche bi nakwa na-arụ ọrụ n'Afrịka, onye tinyere akọ na uche ntaakụkọ siri ike nakwa ọnatarachi pụrụiche n'ịkọwa akụkọ ndị Afrịka ma nwekwa ohere ịbụ kpakpando n'ọdịnịhu.

Gụnyere ị nọ na London, onye meriri ga-aga njem na Afrịka ị kọwa akụkọ - nke a ga-ekesa ebe ahụ nakwa n'ụwa niile.

Ndị meriri ochie:

Onye ntaakụkọ mba Kenya Waihiga Mwaura ritere nke afọ gara aga ma si kwa na mba Togo zipụta akụkọ ya nke kachasị gbasara ụmụ ntorobia na-eji atịtị arụpụta prịnta nke 3D nakwa robotụ.

Waihiga kwuru na mgbe niile "ụdịrị obi Komla ji akọwa akụkọ ndị Afrịka" ga-emetụta gị.

"Mgbado anya o nwere n'ịgbanwe akụkọ Afrịka bụ otu n'ime ihe ndị mere ya ka ọ bụrụ ọpụrụiche n'ebe ndị ogbo ya ndị ntaakụkọ ndịọzọ nọ" bụ ihe onye meriri na 2018 kwuru

"Ọ dị m ka ọrụ a na BBC - ị so ndị otu Komla rụọ ọrụ - enyela m aka ị rụrụ gaaba n'akaọrụ ọma Komla bidoro. Olileanya m dị n'ụbọchị mgbe ndị ntaakụọ Afrịka dịka Komla ga-ebido kọba akụkọ ndị Afrịka n'ọkwa dị icheiche n'ụwa."

Waihiga ga-eso n'emume mmalite nke afọ 2019 ebe ọ ga-anọ n'isi oche na nrụrịtaụka BBC ụwa niile gbasara ikike ndị ntorobia Naịjirịa na ntụliaka n'abịa.

Dịka a na-akwado nturugo a, Jamie Angus, onye na-achịkọta BBC n'ụwa niile kwuru:

"N'ọgbara ebe ọ dị mkpa ịgbasa ozi ziri ezi kwụ ọtọ, ọ dị mkpa na anyị lebara anya na ndị ntaakụkọ ma, ghọta ma hazie akụkọ Afrịka maka ụwa niile na-ege ntị ka anyị were gosi ndị mmadụ foto zuru ezu gbasara ihe na-eme na mpaghara Afrịka"

"Ndị niile meriri ochie egosila na ha bụ ndị ntaakụkọ pụrụiche, ma webata kwa ụzọ ọhụrụ a ga-eji chịkọọ ndị mmadụ na-ege anyị ntị"

"Ọ masịrị anyị ị ịkwalite ncheta Komla nakwa na-atụ anya ịchọpụta onye ntaakụkọ ọzọ kajara akaja n'Afrịka."