ટ્રમ્પનું ટ્વિટર એકાઉન્ટ કાયમી ધોરણે બંધ કરાયું, તેમને પદભ્રષ્ટ કરવા ડેમૉક્રેટ્સની તૈયારી

અમેરિકાનો રાજકીય પક્ષ ડેમૉક્રેટિક પાર્ટીએ રાષ્ટ્રપતિ સામે મહાઅભિયોગ ચલાવવાની તૈયારી બતાવી છે. બુધવારે વૉશિંગ્ટન ડીસીમાં અમેરીકી સંસદની ઇમારત પર થયેલા હુમલાના આરોપ તેમની સામે ઘડીને તેમની સામે ગૃહમાં મહાઅભિયોગ પ્રસ્તાવ લાવવાની વાત થઈ રહી છે.

કૅપિટલ હિંસામાં તેમની કથિત ભૂમિકા મામલે તેમને પદભ્રષ્ટ કરવા માટે ડેમૉક્રેટિક પાર્ટી કમરકસી રહી હોવાનું કહેવાઈ રહ્યું છે.

જેમાં ગૃહના સ્પીકર નેન્સી પેલોસીએ કહ્યું છે કે જો ટ્રમ્પ રાજીનામું નહીં આપે તો તેઓ તેમની સામે મહાઅભિયોગ ચલાવશે.

દરમિયાન ટ્વિટરે ટ્રમ્પનું ટ્વિટર એકાઉન્ટ કાયમી ધોરણે સસ્પેન્ડ કરી દીધું છે. કંપનીએ કહ્યું કે ટ્રમ્પ આગામી સમયમાં વધુ હિંસાને ઉશ્કેરે એવું જોખમ હોવાથી તેમનું એકાઉન્ટ સસ્પેન્ડ કરી દેવાયું છે.

કંપનીએ એવું પણ કહ્યું કે તાજેતરના તેમના ટ્વીટ અને તેના સંદર્ભોની ગંભીર સમીક્ષા કર્યા પછી જ આ પ્રકારનો નિર્ણય લેવાયો છે.

દરમિયાન અમેરિકામાં કૅપિટલ હિંસાનો વિવાદ હજી શમી રહ્યો નથી અને એવામાં ડોનાલ્ડ ટ્રમ્પે જાહેર કર્યું છે કે તેઓ 20 જાન્યુઆરીએ જો બાઇડનના શપથગ્રહણ સમારોહમાં સામેલ નહીં થાય.

ટ્રમ્પની આ જાહેરાત પરંપરાથી અલગ છે અને સત્તા હસ્તાંતરણને લઈને જે અસમંજસ વ્યાપી રહી છે તેનો સંકેત છે.

ગઈ કાલે ડોનાલ્ડ ટ્રમ્પે એમના પ્રવક્તા થકી કહ્યું હતું કે સત્તા હસ્તાંતરણ વ્યવસ્થિત રીતે થશે. જોકે, આજે એમનું નિવેદન અલગ છે.

બુધવારની હિંસા બાદ ટ્વિટર, ફેસબુક, ઇન્સ્ટાગ્રામમાં ટ્રમ્પ પર પ્રતિબંધ લગાવવામાં આવ્યો હતો.

ટ્વિટર પર પ્રતિબંધની અવધિ પૂર્ણ થયા પછી ટ્રમ્પે પોતે બાઇડનના શપથગ્રહણમાં ભાગ નહીં લે તેમ કહ્યું છે.

આ અગાઉ તેમણે એક વીડિયો શૅર કર્યો જેમાં એમનો ટોન સાવ અલગ જ હતો. આ વીડિયોમાં એમણે સમાધાનની વાત કરી અને શાંતિપૂર્ણ રીતે સત્તા હસ્તાંતરણ તરફ ઇશારો કર્યો.

વીડિયોમાં એમણે બુધવારે થયેલી હિંસાની નિંદા પણ કરી.

જોકે, એ પછી એમણે પોતાના જાણીતા અંદાજમાં ટ્વીટ કરીને પોતાના મતદાતાઓનો બચાવ કરતાં કહ્યું કે ન તો તેમનું અપમાન થશે ન તેમની સાથે ખરાબ વ્યવહાર થશે.

દુનિયાને સ્તબ્ધ કરી દેનાર બુધવારના દિવસે અમેરિકાના ઇતિહાસમાં એ થયું જે કદી નહોતું થયું. રાષ્ટ્રપતિ ડોનાલ્ડ ટ્રમ્પના સમર્થકોની ભીડ બુધવાર બપોરે અચાનક જ કૅપિટલ્સ હિલ્સમાં ઘૂસી ગઈ અને આ ભીડ ત્યાં હાજર પોલીસ સાથે ઘર્ષણમાં ઊતરી. આ હિંસમાં ચાર લોકોના મૃત્યુ નીપજ્યાં હતાં.

આ ભીડ અમેરિકન કૉંગ્રેસની કાર્યવાહીને અટકાવવાના હેતુથી કૅપિટલ હિલ્સમાં ઘૂસી ગઈ હતી, જેથી નવા ચૂંટાયેલા રાષ્ટ્રપતિ જો બાઇડન 2020ની ચૂંટણીમાં વિજેતાનું સર્ટિફિકેટ ન મેળવી શકે.

બુધવારની ઘટના બાદ ભૂતપૂર્વ એક્સ ચીફ મીક મૂલવણે, ડેપ્યુટી રાષ્ટ્રીય સુરક્ષા સલાહકાર અને ફર્સ્ટ લેડી ચીફ ઑફ સ્ટાફે રાજીનામું આપી દીધું છે.

દરમિયાન બુધવારની હિંસામાં એક પોલીસના મૃત્યુ પર સ્પીકર પેલોસીએ કૅપિટલ હિલ્સ પર રાષ્ટ્રધ્વજ અડધી કાઠીએ ફરકાવવાનો આદેશ આપ્યો છે.

અમેરિકામાં બુધવારના કાળા દિવસે શું થયું?

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો