You’re viewing a text-only version of this website that uses less data. View the main version of the website including all images and videos.
કરોડોનું હેરોઇન પાકિસ્તાનથી ગુજરાત લાવવા પાછળ શું હતો પ્લાન?
ગુજરાતના દરિયાકાંઠા પાસેથી 385 કરોડના 77 કિલો હેરોઇન સાથે પાકિસ્તાની બોટ ઝડપાઈ છે.
ગુજરાત પોલીસના જણાવ્યા અનુસાર એટીએસના નાયબ પોલીસ અધિક્ષક ભાવેશ રોજિયાને આ બોટ ડિલિવરી માટે આવી રહી છે, એવી બાતમી મળી હતી.
તેમને જાણવા મળ્યું હતું કે ડ્રગમાફિયા હાજી હસન દ્વારા કરાચી પૉર્ટ પરથી હેરોઇનના જથ્થા સાથે ‘અલ હુસૈની’ નામની એક બોટ મોકલવામાં આવી છે.
સાથે જ તેમને ખબર પડી હતી કે ગુજરાતના જખૌથી 35 નોટિકલ માઇલ દૂર મધદરિયે હેરોઇનની ડિલિવરી થવાની છે.
આ ડિલિવરી તેઓ પંજાબનાં અંડરવર્લ્ડ સાથે સંકળાયેલ લોકોને કરવાના હોવાનું પણ પોલીસે જણાવ્યું હતું.
આ ડિલિવરી મોડી રાતે થવાની હોવાથી એટીએસની ટીમ તાત્કાલિક જખૌ પહોંચી ગઈ હતી અને કોસ્ટ ગાર્ડના વરિષ્ઠ અધિકારીઓ સાથે મળીને એક વિશેષ ટીમ બનાવી હતી.
આ ટીમ દ્વારા બાતમી પ્રમાણેની જગ્યાની આસપાસ પેટ્રોલિંગ કરવામાં આવ્યું હતું અને એ દરમિયાન મોડી રાત્રે એક શંકાસ્પદ બોટ મળી આવી હતી.
બોટની તપાસ કરતાં તેનું નામ બાતમી પ્રમાણેનું જ હતું, તેની તપાસ કરતાં તેમાં કુલ છ લોકો મળી આવ્યા હતા.
End of સૌથી વધારે વંચાયેલા સમાચાર
બોટની ઝીણવટભરી તપાસ કરાતા અંદરથી 77 કિલોગ્રામ હેરોઇનનો જથ્થો મળી આવ્યો હતો.
આ લોકોની પૂછપરછ કરાતાં જાણવા મળ્યું હતું કે તેઓ ‘હરિ-1’ અને ‘હરિ-2’ કોડવર્ડથી ડ્રગ્સનો જથ્થો ડિલિવર કરવાના હતા.
ગુજરાત ટ્રાન્ઝિટ રૂટ
અગાઉ ગુજરાતના સલાયા, ઓખા, અને માંડવી જેવાં સૌરાષ્ટ્રનાં બંદરો પર સોનું, ઘડિયાળો કે ઇલેક્ટ્રૉનિક સામાન દાણચોરીથી લાવવામાં આવતો હતો. જેને 'ઢો' તરીકે ઓળખાતા નાના દેશી જહાજમાં લાવવામાં આવતો હતો.
વર્ષ 1993માં પોરબંદરના ગોસાબારા બંદર ખાતે આરડીએક્સ તથા હથિયારોની ખેપ ઊતરી હતી, જેનો ઉપયોગ તત્કાલીન બૉમ્બેમાં વિસ્ફોટો કરવા માટે થયો હતો. છેલ્લાં કેટલાંક વર્ષોથી ગુજરાતનો ઉપયોગ ટ્રાન્ઝિટ રૂટ તરીકે કરવામાં આવે છે.
અગાઉ કચ્છ, પંજાબ અને રાજસ્થાનની સરહદો ઉપર સુરંગ કે પાઇપવાટે નશાકારક પદાર્થો દેશમાં ઘૂસાડવામાં આવતા હતા.
તાજેતરનાં વર્ષોમાં ગુજરાતના દરિયાકિનારાના માર્ગે ભારતમાં મોટાપાયે નશાકારક પદાર્થો ઘૂસાડવાના પ્રયાસ સામે આવ્યા છે.
2018માં દરિયાઈ માર્ગે 500 કિલોગ્રામ હેરોઇન ભારતમાં ઠાલવવામાં આવ્યું હોવાનું બહાર આવ્યું હતું. જેના તાર દેવભૂમિ દ્વારકા જિલ્લાના સલાયા સાથે પણ જોડાયેલા હતા.
આ ડ્રગ્સની ખેપને કારમાર્ગે કચ્છમાંથી ઊંઝા મોકલવામાં આવી હતી, જ્યાંથી જીરું ભરેલી ટ્રકમાં લાકડાંની આડમાં છૂપાવીને ડ્રગ્સને પંજાબ મોકલવામાં આવ્યું હતું.
હેરોઇનનું પાકિસ્તાન સાથે શું કનેક્શન?
મૂળ કચ્છના નાના જહાજે મધદરિયે કથિત રીતે પાકિસ્તાની જહાજ પાસેથી ડ્રગ્સની ડિલિવરી લીધી હતી અને તેને ભારતમાં ઘૂસાડ્યું હતું.
એપ્રિલ-2021માં પણ વધુ એક ખેપ પકડાઈ હતી અને તેને પણ પંજાબ મોકલવાની હતી. અંતે આ કેસ નેશનલ ઇન્વેસ્ટિગેશન એજન્સી (એનઆઈએ)ને સોંપી દેવામાં આવ્યો હતો.
ગુજરાત 1600 કિલોમીટર જેટલો દરિયાકિનારો ધરાવે છે, જે દેશમાં સૌથી લાંબો છે. લગભગ 30 હજાર કરતાં વધુ બોટ તથા નાનાં જહાજો ગુજરાતમાં નોંધાયેલાં છે. આથી, ખુલ્લા દરિયામાં આંતરરાષ્ટ્રીય જળસીમામાં તેમની પ્રવૃત્તિઓ ઉપર નજર રાખવી મુશ્કેલ બની રહે છે.
એસીપી રોજિયાના જણાવ્યા પ્રમાણે, "અફઘાનિસ્તાનમાં મોટા પાયે અફીણનું ઉત્પાદન થાય છે, જેમાંથી હેરોઇન બનાવીને તેને ભારતમાં ઘૂસાડવા માટે પ્રયાસ થતા રહે છે."
"ગુજરાત અને પંજાબની સરહદ સીલ થઈ ગઈ છે. વધુમાં એલઓસી માર્ગે વેપાર પણ બંધ થઈ ગયો છે. એટલે ડ્રગ્સને ઘૂસાડવા માટે અન્ય માર્ગો પર નજર દોડાવવામાં આવી રહી છે. આંતરરાષ્ટ્રીય જળસીમામાં ભારત અને પાકિસ્તાનની બોટો સાથે જ માછીમારી કરતી હોય છે, એટલે તેમની ઉપર નજર રાખવી મુશ્કેલ બની રહે છે."
"ડ્રગ્સને ભારતમાં લાવવામાં સફળ મળે તો તેને અલગ-અલગ સ્થળોએ મોકલી દેવામાં આવે છે અને પછી તેને એક-બે કિલોગ્રામના નાના-નાના જથ્થામાં ખાડી કે પશ્ચિમી દેશોમાં મોકલવામાં આવે છે, એવું અગાઉની તપાસમાં બહાર આવ્યું છે."
સુરક્ષા એજન્સીઓ, નૅવી, કૉસ્ટગાર્ડ વગેરે મળીને માછીમારી સમુદાયમાં બાતમીદારોના નેટવર્ક, દરિયામાં સામાન્ય રીતે વપરાશમાં લેવામાં આવતી રેડિયો ફ્રિક્વન્સી પર નજર રાખે છે અને કેન્દ્રીય ગુપ્તચર સંસ્થાઓની બાતમીના આધારે, ભારત તરફ આવતો જથ્થો આંતરવાના પ્રયાસો કરે છે.
તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો
એમ્બેડ કરવાના વીડિયો -
