ગુજરાતમાં હવે કઈ જગ્યાએ વરસાદની આગાહી છે, હવામાન ક્યારે ચોખ્ખું થશે?

ગુજરાતમાં છેલ્લા એક અઠવાડિયાથી મોટા ભાગના જિલ્લામાં વરસાદ પડ્યો છે અને હજુ પણ વાદળછાયું વાતાવરણ છે. અરબી સમુદ્રમાં સર્જાયેલી ડિપ્રેશનની સ્થિતિના કારણે સૌરાષ્ટ્રથી લઈને દક્ષિણ ગુજરાત અને ઉત્તર ગુજરાતમાં ઘણી જગ્યાએ થોડો-ઘણો વરસાદ પડ્યો છે. જોકે, હવે વરસાદની શક્યતા ઘટતી જાય છે.

અમદાવાદસ્થિત હવામાન વિભાગનું બુલેટિન કહે છે કે છેલ્લા ચોવીસ કલાકમાં સૌરાષ્ટ્રના પોરબંદર જિલ્લામાં છૂટાંછવાયાં સ્થળે ભારે વરસાદ પડ્યો છે. આ ઉપરાંત સૌરાષ્ટ્રમાં પણ વરસાદ નોંધાયો છે.

ગુજરાતમાં છેલ્લા 24 કલાકમાં દેવભૂમિ દ્વારકામાં 1.38 ઇંચ વરસાદ નોંધાયો છે. આ ઉપરાંત ભાવનગરમાં 0.87 ઇંચ, લાલપુર અને મોરબીમાં 0.79 ઇંચ, ભાવનગરના ઘોઘા અને મોરબીના માળિયા તથા હળવદમાં 0.71 ઇંચ વરસાદ પડ્યો છે.

સોજિત્રા, ખેડબ્રહ્મા, કપરાડા, વાસો, ગરુડેશ્વર, શેહરા, કલ્યાણપુર, જામકંડોરણા, ધ્રાંગધ્રામાં પણ 0.20 ઇંચથી 0.63 ઇંચ સુધી વરસાદ પડ્યો છે.

કઈ સિસ્ટમ કામ કરે છે?

અરબી સમુદ્ર અને આસપાસના વિસ્તારમાં ઉત્તર પૂર્વ અરબી સમુદ્ર પર એક લો પ્રેશર એરિયા રચાયો છે જે સાઇક્લૉનિક સર્ક્યુલેશન સાથે સંબંધિત છે. હાલમાં આ એરિયા સમુદ્રની સપાટીથી 5.8 કિમીની ઊંચાઈએ સ્થિત છે. આગામી 24 કલાકમાં તે ઉત્તરપૂર્વ તરફ આગળ વધે અને પછી સાવ નબળું પડી જાય તેવી શક્યતા છે.

હવામાન વિભાગ મુજબ આગામી સાત દિવસમાં ગુજરાતમાં લઘુતમ તાપમાનમાં કોઈ મોટો ફેરફાર થવાની શક્યતા ઓછી છે.

હવે કઈ જગ્યાએ વરસાદ પડશે?

ગુજરાતમાં હાલમાં કોઈ જગ્યાએ ભારે વરસાદ પડવાની સંભાવના નથી. એટલે કે અત્યારે કોઈ જગ્યાએ રેડ અથવા ઑરેન્જ એલર્ટની જાહેરાત નથી. પરંતુ ત્રીજી નવેમ્બર, સોમવારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરુચ, સુરત, ડાંગ, નવસારી, તાપી, વલસાડ, દમણ, દાદરા અને નગર હવેલીમાં કેટલીક જગ્યાએ હળવો વરસાદ પડવાની શક્યતા છે.

આ ઉપરાંત રાજકોટ, સુરેન્દ્રનગર, જામનગર, પોરબંદર, જૂનાગઢ, ભાવનગર, અમરેલી, મોરબી, દ્વારકા, ગીર સોમનાથ, બોટાદ અને કચ્છમાં હળવો વરસાદ પડવાની શક્યતા છે.

આ ઉપરાંત મંગળવારે પણ સાબરકાંઠા, અરવલ્લી, ખેડા, અમદાવાદ, પંચમહાલ, આણંદ, મહીસાગર, દાહોદ, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, દમણ, દાદરા અને નગર હવેલી, જૂનાગઢ, અમરેલી, ભાવનગર, ગીર સોમનાથ, બોટાદ અને દીવમાં હળવો વરસાદ પડી શકે છે. રાજ્યના બાકીના ભાગોમાં હવામાન સૂકું રહેશે.

ત્યાર પછીના બે દિવસ સુધી પણ આવી જ સ્થિતિ રહેવાની શક્યતા છે. 6 નવેમ્બરથી આખા રાજ્યમાં મોટા ભાગના વિસ્તાર સૂકા રહેશે અને કોઈ જગ્યાએ વરસાદ પડવાની શક્યતા બહુ ઓછી છે.

ખાનગી હવામાન એજન્સી સ્કાયમેટના અહેવાલ પ્રમાણે ઉત્તર ભારતમાં સર્જાયેલ લો પ્રેશર એરિયા નબળો પડશે. તેવી જ રીતે અરબી સમુદ્રમાં લો પ્રેશર એરિયા પણ પોતાની નબળો પડવાની આગાહી છે.

ગુજરાત વિશે સ્કાયમેટ જણાવે છે કે કચ્છ, પોરબંદર, ભાવનગર, નવસારી, વલસાડ, અમરેલી, દ્વારકામાં બે દિવસ સુધી વરસાદ પડવાની શક્યતા છે.

ગુજરાતમાં આ વર્ષે અત્યાર સુધીમાં 128 ટકાની આસપાસ વરસાદ પડી ગયો છે. તેમાં કચ્છમાં સૌથી વધુ લગભગ 150 ટકા વરસાદ પડ્યો છે. જ્યારે સાઉથ ગુજરાતમાં 132 ટકા વરસાદ નોંધાયો છે. હજુ આગામી સમયમાં પણ સાઉથ ગુજરાતમાં વરસાદ પડી શકે છે. ઉત્તર ગુજરાતમાં સરેરાશની તુલનામાં 127 ટકા વરસાદ નોંધાયો છે.

અમદાવાદ અને આસપાસના વિસ્તારમાં આજે હળવાથી મધ્યમ વરસાદ પડી શકે છે. જ્યારે લઘુતમ તાપમાન 24 ડિગ્રી સેલ્સિયસ રહેવાની આગાહી છે.

બીબીસી માટે કલેક્ટિવ ન્યૂઝરૂમનું પ્રકાશન