Jurgen Klopp: Umutoza wa Liverpool yatowe na bagenzi be nk'umutoza w'umwaka
Ahavuye isanamu, Getty Images
Umutoza wa Liverpool Jurgen Klopp yatowe n'ishyirahamwe ry'abatoza mu Bwongereza nk'umutoza w'uyu mwaka w'imikino.
Uyu Mudage w'imyaka 54, yegukanye iki gihembo cyitwa Sir Alex Ferguson Trophy, gitorerwa n'abatoza bose bo mu byiciro byose bya shampiyona zo mu Bwongereza.
Klopp yanatsindiye igihembo cy'umutoza w'umwaka muri Premier League nubwo ikipe ye ku cyumweru yarushijwe inota rimwe na Manchester City ikayitwara igikombe cya shampiyona y'uyu mwaka.
Emma Hayes utoza Chelsea y'abagore ni we wegukanye igihembo cy'umutoza w'umugore warushije abandi batoza muri shampiyona y'abagore.
Muri uku kwezi kwa gatanu, Chelsea y'abagore yegukanye igikombe cya shampiyona cya gatatu yikurikiranya, ndetse itsinda Manchester City ibitego 3-2 ku mukino wa nyuma w'igikombe cya FA Cup.
Liverpool ya Klopp yamaze kwegukana igikombe cya FA Cup n'igikombe cya League Cup muri uyu mwaka, no ku wa gatandatu izakina na Real Madrid ku mukino wa nyuma wa Champions League.
Pep Guardiola utoza Manchester City, Thomas Frank wa Brentford, Eddie Howe wa Newcastle na Patrick Vieira wa Crystal Palace ni bo batoza bandi bari bari ku rutonde rugufi rw'abahataniraga igihembo cy'umutoza warushije abandi muri Premier League.
Klopp yagize ati: "Ni ishema rikomeye kandi wari umwaka ugoye cyane. Ntiwabaye mwiza cyane kuri twebwe, ariko ibyo twamaze kubirenga".
Yongeyeho ati: "Iyo utsindiye igihembo nk'iki uba uri umuhanga cyangwa ukaba ufite abatoza mufatanya ba mbere beza ku isi - none ndi hano hamwe n'abatoza mfatanya na bo bose, barabizi uburyo mbashimira cyane".
Kath Phipps, umaze imyaka irenga 50 akora akazi ko kwakira abantu mu ikipe ya Manchester United, ni we watsindiye igihembo cyo gukorera umupira w'amaguru.
Marco Silva yatsindiye igihembo cy'umutoza w'umwaka muri shampiyona y'icyiciro cya kabiri, nyuma yo gutuma Fulham yegukana igikombe cya shampiyona y'uyu mwaka.
Matt Beard yatsindiye igihembo cy'umutoza w'umugore warushije abandi muri shampiyona y'icyiciro cya kabiri, nyuma yo guhesha igikombe Liverpool.
