Burundi: Saido Berahino mu bakinnyi batongerewe amasezerano muri Sheffield Wednesday

Inyandiko gusa
Saido Berahino

Ahavuye isanamu, Rex Features

Insiguro y'isanamu, Igitego cya nyuma Saido Berahino yatsindiye Sheffield Wednesday ni icyo mu mukino iyi kipe yatsinzemo Portsmouth ibitego 4-1, ku munsi wa nyuma w'umwaka w'imikino wa shampiyona y'icyiciro cya gatatu

Rutahizamu w'Intamba mu Rugamba z'u Burundi Saido Berahino hamwe n'umukinnyi w'Umwongereza Sam Hutchinson ni bamwe mu batongerewe amasezerano n'ikipe Sheffield Wednesday ikina muri shampiyona y'icyiciro cya gatatu mu Bwongereza.

Berahino, w'imyaka 28, myugariro Hutchinson, w'imyaka 32, na myugariro wundi w'Umwongereza Chey Dunkley, w'imyaka 30, barekuwe n'iyi kipe nyuma yo gusoza kontaro zabo.

Iyi kipe yo mu majyaruguru y'Ubwongereza yahaye amasezerano mashya abakinnyi Jack Hunt, Massimo Luongo, Nathaniel Mendez-Laing n'umunyezamu Joe Wildsmith, na bo bari bafite amasezerano arangira kuri iyi mpeshyi.

Berahino - wahoze ari rutahizamu wa West Bromwich Albion na Stoke City - yari yageze muri Sheffield Wednesday ku mpeshyi y'umwaka ushize avuye mu ikipe ya Zulte Waregem ikina muri shampiyona y'icyiciro cya mbere mu Bubiligi.

Yakiniye Sheffield Wednesday imikino 40 atsindamo ibitego icyenda.

Mu mwaka w'imikino ushize ni bwo Sheffield Wednesday yamanutse ivuye mu cyiciro cya kabiri.

Yarangije shampiyona y'uyu mwaka y'icyiciro cya gatatu - izwi nka League One - iri ku mwanya wa kane.