Saido Berahino – Kujya muri CAN bwa mbere ku Burundi 'ntibyari amahirwe'
Ahavuye isanamu, Getty Images
Intamba mu Rugamba z'u Burundi zirashaka kujya mu gikombe cya Africa cya 2022 ngo zigaragaze ko ubwo ziherukayo "bitari ibyazigwiririye", nk'uko bivugwa na kapiteni wazo Saido Berahino.
Mu irushanwa riheruka rya 2019 nibwo bwa mbere u Burundi bwari bugeze mu mikino ya nyuma y'igikombe cya Africa.
Intamba ubu ni iza gatatu mu itsinda E, zirarushwa inota rimwe na Mauritania. Zisigaje guhura na Centrafrique na Maroc iyoboye iri tsinda, yo isa n'iyizeye kubona tike kuri iyi mikino ibiri isigaye.
Berahino yabwiye BBC Sport Africa ati: "Twarakoze cyane ngo tube turi ku mwanya turiho ubu.
"Nyuma yo kugera muri iri rushanwa bwa mbere mu mateka, turashaka kwereka abantu ko bitari ibyatugwiririye."
Mu myaka ibiri ishize muri CAN mu Misiri aho Intamba zari mu itsinda rimwe na Madagascar, Guinea na Nigeria, zasoje ari iza nyuma mu itsinda, zitsinzwe imikino yazo itatu.
Berahino - wakiniye abatarengeje imyaka 20 b'Ubwongereza mbere yo guhindura agakinira igihugu cye cy'amavuko - avuga ko "kumenya icyanga" cy'iri rushanwa bizabafasha kugerageza kugera no muri Cameroun.
Ati: "Turashaka kugera muri iyi mikino nanone - kuko dufite inyota, dufite n'ubushake.
"Kandi tuzi uko iri rushanwa rimera, rero byaba ari byiza cyane gusubirayo - kujyayo kabiri twikurikiranya - tukagerageza kwitwara neza kurusha ubushize.
"Dufite amahirwe yose".
