U Burundi na OMS mu iperereza ku ndwara itaramenyekana imaze kwica abantu batanu

Ishami ry'Umuryango w'Abibumbye ryita ku buzima (OMS/WHO) rivuga ko ririmo gufatanya n'abategetsi bo mu rwego rw'ubuzima mu Burundi mu iperereza ryo kumenya icyateje indwara itazwi imaze kwica abantu batanu naho abandi 35 bakayandura muri komine Mpanda, mu ntara ya Bujumbura, mu majyaruguru y'igihugu.

Itangazo rya OMS rivuga ko ibizamini byakorewe muri laboratwari (laboratoire) byagaragaje ko iyo ndwara itari mu ndwara ziterwa na virusi, nka Ebola na Marburg.

OMS ivuga ko yamenyeshejwe iby'iyo ndwara itaramenyekana ku itariki ya 31 y'ukwezi gushize kwa Werurwe (3), ikaba yaragaragaye ahanini mu bantu bo mu rugo rumwe no mu bahuye na bo bya hafi.

Ibimenyetso by'iyo ndwara birimo guhinda umuriro, kuruka, gucibwamo, inkari zirimo amaraso, kugira umunaniro no kubabara mu nda, nkuko OMS ibivuga.

Bamwe mu bakariwe n'iyo ndwara banagaragaje ibimenyetso byo guhinduka umuhondo kw'uruhu no kuba umuhondo imbere mu maso n'igabanuka ry'ingano y'amaraso mu mubiri.

Amagambo ya Minisitiri w'ubuzima w'u Burundi Lydwine Baradahana yasubiwemo na OMS agira ati: "Nubwo ibyavuye mu bizamini [byo kwa muganga] by'ibanze bitanga icyizere ku kuba bitarimo izi ndwara zikaze, amaperereza arakomeje n'umurava kugira ngo hamenyekane igitera iyi ndwara."

"Ingamba zose za ngombwa zirafashwe mu rwego rwo kurinda ubuzima bw'abaturage no kwirinda ikwirakwira [ry'iyi ndwara] rishobora kubaho."

OMS ivuga ko itsinda rihuriweho ry'inzobere zo mu kigo cy'u Burundi cy'ibikorwa byihutirwa by'ubuzima rusange n'izo muri laboratwari nkuru y'igihugu ryoherejwe ahagaragaye iyo ndwara kugira ngo rifashe amaperereza arimo gukorerwayo.

Iryo shami rya ONU ryita ku buzima rivuga ko rifasha minisiteri y'ubuzima mu Burundi mu kongerera imbaraga ibikorwa byo kugenzura indwara, amaperereza abera ahagaragaye indwara, kwita ku barwayi, ibipimo byo muri laboratwari byo kumenya indwara, kwirinda no guhagarika ubwandu, n'ubufasha mu by'ibikoresho n'imikorere.

OMS ivuga ko yanafashije mu kohereza bimwe mu bipimo byo kwa muganga byafashwe kugira ngo bikorerwe isesengura ry'inyongera mu kigo cy'igihugu cya Repubulika ya Demokarasi ya Congo (DRC) cy'ubushakashatsi mu by'ibinyabuzima n'ubuvuzi.

Komine Mpanda yagaragayemo iyo ndwara iri ku mupaka u Burundi buhana na DRC.

Minisiteri y'ubuzima mu Burundi ni yo iyoboye ibikorwa byo guhangana n'iyo ndwara, hamwe n'imiryango y'abafatanyabikorwa, kugira ngo habeho guhuza ibikorwa, nkuko OMS ibivuga.