Urukiko rw'Ikirenga rwemeje ko ikirego Victoire Ingabire yatanze gifite ishingiro
- Umwanditsi, Jean Claude Mwambutsa
- Igikorwa, BBC Gahuzamiryango i Kigali
Urukiko rw'Ikirenga mu Rwanda rwemeje ko ikirego umunyapolitike Victoire Ingabire yatanze avuga ko afunze binyuranyije n'amategeko gifite ishingiro bityo kigomba kuburanishwa guhera mu kwezi kwa Werurwe(3).
Ingabire n'umwunganizi we mu mategeko baregeye Urukiko rw'Ikirenga nyuma y'uko Urukiko Rukuru rwari rwatesheje agaciro ikirego cye, ruvuga ko nta shingiro gifite.
Victoire Ingabire, azwi nk'impirimbanyi ya politike akaba n'umwe mu batavuga rumwe n'ubutegetsi bw'u Rwanda.
Uyu munsi ntabwo Ingabire yari mu cyumba cy'Urukiko rw'Ikirenga i Kigali ariko umwunganizi we mu mategeko Me Félicien Gashema yari ahari.
Ingabire yafunzwe muri Kamena (6) ishize nyuma yuko yitabye Urukiko nk'umuntu waje gutanga amakuru mu rubanza rwa bamwe mu bari abayoboke b'ishyaka rye baregwa ibyaha birimo gushaka guhirika ubutegetsi badakoresheje inzira y'intambara.
Urwego rukora iperereza ku byaha mu Rwanda rwavuze ko yafunzwe "mu rwego rwo gushyira mu bikorwa icyemezo cy'Urukiko Rukuru", rutanyuzwe n'amakuru yatanze ku bayoboke be bamaze igihe baburana.
Ingabire hamwe n'abamushyigikiye bavuga ko yafunzwe nyuma y'amezi Perezida Paul Kagame avuze amagambo akomoza ko azongera agafungwa.
Mu mpera za 2024, mu ijambo ryanyuze kuri radiyo na televiziyo by'igihugu, Kagame yagize ati: "... Hari abo bandi mureba bari aho bidegembya, n'abo twababariye twavanye aho bari bari bafunzwe ...
"Murabazi.... Ndetse bakogezwa n'abantu bo hanze, bakavuga ko ari ibitangaza, ko barwanira demokarasi, barwanira ibyo ntazi barwanira.
"Buriya na bo, ariko turaza [akora ikimenyetso cy'intoki cyo gufunga], uzi ya masaha bamanika ku nkuta? Iyo yashizemo uruvire ['levure', umuti] bagira batya [akaraga ikiganza gifunze] bakarwongeramo kugira ngo yongere ikore. Turaza kurwongeramo."
Abanyamategeko ba Ingabire bavuze ko ayo magambo yari"ateje inkeke ku mutekano" w'umukiliya wabo, kandi gufungwa kwe babihuje n'ibyavuzwe na Perezida Kagame.
Icyemezo cy'urukiko uyu munsi gihuriranye n'imyigaragambyo iteganyijwe kubera i Buruseli mu Bubirigi imbere y'iteko ishinga amategeko y'umuryango w'Ubumwe bw'Uburayi, iteganyijwe uyu munsi.
Abayiteguye, bavuga ko bashaka kwibutsa umuryango w'Ubumwe bw'Uburayi ko umwaka ushize wa 2025 wasabye ko Ingabire Victoire "arekurwa ako kanya".
Urukiko rw'Ikirenga rwatangaje ko urubanza ku kirego Ingabire yatanze ruzaburanishwa guhera tariki 04 Werurwe(3) uyu mwaka.
