Saido Berahino yamaze gusinya mu ikipe yo mu Bubiligi

Ikipe Zulte Waregem yo mu cyiciro cya mbere mu Bubiligi yamaze gutangaza ko Saido Berahino yamaze gusinya muri iyo kipe yari amaze ibyumweru yimenyerezamo.

Uyu kapiteni w'ikipe y'igihugu y'u Burundi Intamba mu Rugamba w'imyaka 26 y'amavuko, kuri ubu nta kipe yari afite akinira nyuma yo gutandukana n'ikipe ya Stoke City ku wa gatatu.

Constantin Mutima uhagarariye Berahino yari yamenyesheje ejo ku wa gatanu ko umwanya n'umwanya yashoboraga gusinya "mu ikipe ye nshyashya yo mu Bubiligi iri mu cyiciro cya mbere".

Anenga ibyavuzwe n'uwo bahoze bakinana

Mutima yahakanye amakuru bimwe mu bitangazamakuru byo mu Bwongereza byatangaje aho Glen Johnson wahoze akinana na Berahino muri Stoke, yavuze ko yari umukinnyi udashobotse.

Johnson yavuze ko Berahino ari umukinnyi utitanga, kandi usiba imyitozo nta mpamvu.

Kuri ibi, Mutima yavuze ko amagambo nk'ayo adakwiye ku bantu bahoze bakinana, ko "Saido atari umwana mubi", ko abavuga ibyo ari abagamije "kumwicira ejo hazaza he mu mupira w'amaguru".

Undi bakinanye yamwifurije amahirwe

Ravel Morrison wahoze akinana na Berahino muri Stoke ariko mu kwezi gushize akerekeza muri Sheffield United, yanenze amagambo ya Johnson kuri Berahino.

Ikinyamakuru The Guardian gisubiramo amagambo ya Morrison agira ati: "Ni gute wavuga amagambo nk'ayo ku karubanda. Berahino, nkwifurije amahirwe mu ikipe yawe nshya..."

Berahino yari asigaje imyaka itatu kuri kontaro yashyizeho umukono muri Stoke mu mwaka wa 2017, ikipe yagezemo avuye muri West Bromwich Albion aguzwe miliyoni 12 z'amapawundi.

Bivugwa ko yavuye muri Stoke ahawe arenga miliyoni ebyiri z'amapawundi.

Ayivuyemo ayitsindiye ibitego bitanu gusa mu mikino 56 yayikiniye - uwa nyuma akaba yarawukinnye mu kwezi kwa kabiri akina na West Bromwich Albion.

Mu kwezi kwa gatanu, yahamwe n'ikosa ryo gutwara imodoka yanyoye yarengeje igipimo cyemewe, acibwa amande y'amapawundi ibihumbi 75 ndetse abuzwa gutwara imodoka mu gihe cy'amezi 30.

Hari mbere yuko ayobora Intamba mu Rugamba nka kapiteni mu mikino y'igikombe cy'Afurika cy'ibihugu iheruka kubera mu Misiri, imikino u Burundi bwari bwitabiriye bwa mbere, bugasezererwa butarenze icyiciro cyo mu matsinda.