DR Congo: Twirwaneho 'yafashe' agace 'k'ingenzi' ka Point-Zero nyuma y'imirwano ikomeye

Umutwe w'inyeshyamba wa Twirwaneho muri Repubulika ya Demokarasi ya Congo wafashe 'agace k'ingenzi' mu bya gisirikare ka Point-Zero muri teritwari ya Fizi mu ntara ya Kivu y'Epfo nyuma y'imirwano ikomeye yabaye ku wa gatatu no ku wa kane, nk'uko abahaturiye babibwiye BBC.

Point-Zero ni agace kari hejuru mu karere k'imisozi ya Fizi, kandi kakaba isangano ry'amayira yerekeza mu bice bitandukanye birimo umujyi wa Uvira mu majyaruguru ashyira uburasirazuba, Mikenke na centre ya Minembwe mu burengerazuba, Fizi na Baraka mu majyepfo.

Elia Mushakwe umwe mu baturage bo muri centre ya Minembwe yabwiye BBC ko abarwanyi ba Twirwaneho ari bo bagenzura "Point-Zero no hafi yaho hose", yongeraho ati: "Nahaciye none[ku wa gatandatu], si ibyo nabwiwe, ni bo bahari".

Ku wa kane, umutwe wa Twirwaneho – ukorana n'uwa M23 - watangaje ko urimo kurwana n'ibitero by'ingabo za leta n'abafatanya na zo muri ako karere.

Bimwe mu binyamakuru muri DR Congo bivuga ko imirwano ikomeye yabaye ku wa gatatu no ku wa kane yatewe n'ibitero abarwanyi ba Twirwaneho na M23 bagabye ku birindiro by'ingabo za leta mu duce turimo Point-Zero no hafi yaho barwanira gufata imisozi y'ingenzi mu bya gisirikare muri ako gace.

Ikinyamakuru Actualité kivuga ko abarwanyi ba Twirwaneho bafatanyije na AFC/M23 bafashe agace ka Point-Zero n'inkengero zako ku wa gatanu nyuma y'imirwano ikomeye n'ingabo za leta zifatanyije na Wazalendo.

Iki kinyamakuru gisubiramo isoko y'amakuru yo mu gisirikare ivuga ko ku wa gatanu ingabo za leta nanone zagabweho igitero na Twirwaneho zikaganzwa zikava muri ako gace zerekeza ahitwa Mulima

BBC yagerageje kuvugisha umuvugizi w'ingabo za leta n'uwa Twirwaneho ntibyashoboka kugeza ubu.

Impande zombi zisanzwe zishinjanya kuba rumwe ari rwo rutangiza imirwano rutera urundi.

Iyi ntambara yatangiye mu mpera za 2021 ubwo umutwe wa M23 wongeye guhagurukira munsi y'ikirunga cya Sabyinyo muri Kivu ya Ruguru, nyuma yo kuvuga ko watewe n'ingabo za leta mu birindiro byawo ahitwa Chanzu na Runyoni. Uruhande rwa leta rwavuze ahubwo ko abo barwanyi ari bo bateye baturutse muri Uganda bagaca mu kirunga cya Sabyinyo bagafata utwo duce twombi.

Imihate yo guhagarika iyi ntambara kugeza ubu nta cyo irageraho.

Mushakwe avuga ko imirwano ikomeye cyane yabaye ku wa kane muri kari gace k'imisozi ya Fizi yatumye "abantu benshi bava mu ngo zabo barahunga".

Yagize ati: "Ku wa kane habaye intambara zikomeye cyane, imbunda nto n'iziremereye twazumva turi hariya iwacu mu Minembwe, byari bikomeye.

"Ku wa gatanu nibwo twumvise ko Twirwaneho yafashe Point-Zero."

Mu kwezi kwa 11 Abanyamulenge bakoze imyigaragambyo muri centre ya Minembwe bamagana ingabo z'u Burundi n'iz'igihugu cyabo cya RD Congo ko zafunze amayira yose ava iwabo akagera i Uvira aho ubusanzwe bakura ibyangombwa nkenerwa bidahingwa.

Iyi myigaragambyo yavugaga ko izo ngabo zafungiye amayira mu masangano ya Point-Zero, n'ahitwa Mu Mikarati n'ahandi.

Icyo gihe, umuvugizi w'igisirikare cy'u Burundi yabwiye BBC ko nta basirikare b'Abarundi bari muri ako karere, ahubwo bari ahitwa Muramvya, Mugeti na Majembwe.

Kugeza n'ubu, ingabo z'u Burundi ziri mu burasirazuba bwa RD Congo ku masezerano y'ubufatanye bw'ibihugu byombi mu kurwanya imitwe y'inyeshyamba.

U Burundi, RD Congo na ONU bashinja igisirikare cy'u Rwanda kwinjira muri Congo gufasha umutwe wa M23 ubu ukorana na Twirwaneho. U Rwanda ruhakana ibyo birego ruvuga gusa ko rwafashe ingamba zo kwirinda.

U Rwanda, M23, Twirwaneho na ONU nabo bashinja ingabo za Congo n'iz'u Burundi gufatanya n'inyeshyamba za FDLR zirwanya ubutegetsi bwa Kigali, ibyo urwo ruhande na rwo ruhakana.

Mushakwe avuga ko gufata Point-Zero ari "inkuru nziza" ku baturage ba Minembwe na Mikenke "bamaze amezi menshi bafungiwe inzira nziza" zo kugera mu mujyi wa Uvira.

Iyi mirwano irimo kuba mu gihe leta ya Kinshasa iri mu muhate mushya w'ibiganiro hagati y'Abanyecongo, ibiganiro Angola, Togo hamwe n'Ubumwe bwa Afurika bashobora kugiramo uruhare nk'abahuza.

Ibi, ni nyuma y'uko imihate yo kugera ku mahoro ya Washington na Doha kugeza ubu nta musaruro iratanga ahabera intambara.