Liverpool 4-0 Manchester United: Uku gutsindwa 'ni agasuzuguro' – Ralf Rangnick

Umutoza w'inzibacyuho wa Manchester United Ralf Rangnick yavuze ko gutsindwa na Liverpool kw'ikipe ye muri Premier League ku kibuga Anfield ari "agasuzuguro".

Muri uwo mukino wo ku wa kabiri, Liverpool yanyagiye mucyeba wayo ibitego 4-0, ihita ijya ku mwanya wa mbere ku rutonde rw'agateganyo rwa shampiyona.

United - yatakaje amahirwe yo kwigira imbere ngo ihatanire umwanya muri Champions League hamwe na Tottenham iri ku mwanya wa kane - ubu yamanutse ijya ku mwanya wa gatandatu.

Rangnick yagize ati: "Biteye isoni, birababaje, wenda ni n'agasuzuguro".

Abajijwe ukuntu United yashobora kuziba icyuho kiri hagati yayo na Liverpool, yongeyeho ati: "Tugomba kwemera ko ubu bari imbere yacu ho imyaka itandatu.

"Ubwo Jurgen Klopp yazaga bahinduye ikipe kandi bazamura atari ikipe gusa ahubwo ikipe n'umujyi babishyira ku rwego rushya. Ibi ni byo bicyeneye kubaho kuri twe mu magura n'amagurishwa y'abakinnyi ari imbere.

"Ni impamo hazabaho kubaka bundi bushya, ibyo ni ibintu byangaragariye mu byumweru bitatu cyangwa bine bya mbere. Kuri twebwe biteye isoni cyane nk'abatoza kwicara hano tukagirana ikiganiro n'abanyamakuru nk'iki. Tugomba kwemera gusa ko ari beza [bakina neza] cyane kuturusha".

Mohamed Salah yinjije ibitego bibiri - ku munota wa 22 na 85, asoza atyo kutinjiza ibitego kwari kumaze imikino umunani muri Liverpool no mu ikipe y'igihugu ya Misiri.

Salah yongeye kuzonga United kuko no mu mukino uheruka mu kwezi kwa cumi mu 2021 i Old Trafford, yinjije bitatu mu bitego 5-0 bayitsinze icyo gihe. Ibindi bitego byo mu mukino wo ku wa kabiri byinjijwe na Luis Díaz ku munota wa gatanu na Sadio Mané ku munota wa 68.

United iracyarushwa amanota atatu na Tottenham ya kane, ikaba imaze gukina umukino umwe kurenza Tottenham.

United inganya amanota na Arsenal izakurikizaho ku wa gatandatu, iri ku mwanya wa gatanu, nubwo Arsenal hari imikino ibiri yo itarakina.

Umukinnyi wo hagati wa United Bruno Fernandes yabwiye Sky Sports ati: "Abafana ntibakwiye ko dukina nk'uku".

"Bakwiye ko tubaha ibirenze ibi. Ukuntu bahaguma [ku kibuga] bakadukomera amashyi, bakwiye ibirenzeho. Tugomba kuzamura urwego rwacu hejuru cyane.

"Liverpool yiteguye igikombe, [twebwe] ntitwiteguye. Sinkeneye kuba ndi hano mvuga ku kinyuranyo [itandukaniro] cy'urwego [turiho].

"Tugomba kwicyebuka kuva hejuru kugera hasi tukamenya ikirimo kugenda nabi. Turahatana kugeza ku musozo. Nta n'umwe ushobora kwirara ngo atekereze ko byarangiye. Dufite ikintu cyo guhatanira".

Muri uwo mukino, abafana b'amakipe yombi bafashe umunota wo gukoma amashyi baha icyubahiro rutahizamu Cristiano Ronaldo wa Manchester United hamwe n'umuryango we, nyuma yo gupfusha umwana wabo w'umuhungu.

'Sindi hano ngo nsuzuguze abo dukina'

Iyo ntsinzi yatumye ikipe y'umutoza Jurgen Klopp irusha amanota abiri Manchester City yegukanye igikombe cya shampiyona cyo mu mwaka ushize w'imikino, iyi ikaba ishobora kwisubiza umwanya wa mbere iramutse itsinze Brighton kuri uyu wa gatatu.

Iyi Liverpool, yamaze kwegukana igikombe cya Carabao mu kwezi kwa kabiri, iracyarimo guhatanira ibikombe bine - ibintu bitigeze bibaho mbere - muri ibi byumweru bya nyuma by'uyu mwaka w'imikino.

Umukino wayo wo mu ijoro ryacyeye watumye Liverpool iba ikipe ya mbere itsinze ibitego bitari munsi y'umunani mucyeba United mu mwaka umwe w'imikino muri Premier League.

Klopp yagize ati: "Sindi hano ngo nsuzuguze abo dukina - twakoze ibyo twagombaga gukora".

"United ntiri mu gihe cyiza, ariko ku bafana bacu cyari igihe gikomeye kandi bakwiye ibyishimo bishoboka byose. Iri joro [ku wa kabiri] bagize ibyishimo byinshi.

"Naryohewe rwose n'iri joro. Simba niteze ko tumara iminota 95 yose ari twebwe tugenzura umukino, ariko mu minota 70 twawugenzuraga naho mu minota 20, nubwo United itawugenzuraga, yaduteje ibibazo".