Liverpool: Virgil Van Dijk avuga ko byaba ari 'inzozi' gutwara ibikombe bine

Myugariro wa Liverpool Virgil van Dijk avuga ko byaba ari "inzozi" zibaye impamo ikipe ye yanditse amateka "asa nk'adashoboka" ikegukana ibikombe bine mu mwaka umwe w'imikino.

Mu kwezi kwa kabiri, Liverpool yegukanye igikombe cya Carabao, kandi iracyari mu guhatanira igikombe cya FA, icya Premier League hamwe n'icya Champions League.

Iyi kipe itozwa n'Umudage Jurgen Klopp, ku wa gatandatu yatsinze mucyeba Manchester City ibitego 3-2, bituma igera ku mukino wa nyuma w'igikombe cya FA.

Van Dijk yagize ati: "Nta kipe n'imwe yageze ku bikombe bine kandi hari impamvu yabyo - ni ukubera ko bisa nk'ibidashoboka kubikora".

Liverpool irushwa inota rimwe na City iri ku mwanya wa mbere ku rutonde rw'agateganyo rwa shampiyona, mu gihe hasigaye imikino irindwi ngo shampiyona irangire.

Ku wa kabiri, Liverpool izakira Manchetser United, ndetse mu mpera ya shampiyona ifite imikino igoranye, irimo n'uwa mucyeba w'i Merseyside, Everton, na Tottenham ihatanira kubona itike yo gukina Champions League.

Liverpool izanakina na Villarreal muri kimwe cya kabiri cya Champions League, mu gihe mu wundi mukino wa kimwe cya kabiri City y'umutoza Pep Guardiola izakina na Real Madrid.

'Icyo ari cyo cyose gishobora kubaho'

Van Dijk yongeyeho ati: "Ibi byose bivugwa ku bikombe bine cyangwa bitatu, biva ku bantu bo hanze kandi bishobora kudushyiraho igitutu cy'inyongera".

"Ni ikintu buri muntu wese yagira inzozi zo kugeraho, gutsinda buri rushanwa ugiyemo, ariko tuzareba icyo bizana [uko bizagenda].

"Ikintu icyo ari cyo cyose gishobora kubaho, no ku yandi makipe na yo".

Van Dijk, Umuholandi w'imyaka 30, mu kwezi kwa munani 2021 ni bwo yongeye gukina, nyuma yo kumara amezi 10 adakina kubera imvune ikomeye yo mu ivi.

Yashimangiye ko Liverpool itajenjeka ku kumera neza k'umukinnyi uwo ari we wese.

"Kera sinari umukinnyi mwiza, nabigezeho ntinze - ni yo mpamvu nishimira umwuga wanjye kurushaho".

"Ndashaka gukomeza kuwuteza imbere, gukomeza kumera neza [ku mubiri], gutsinda imikino no kureba icyo bizana no kwitegura igikombe cy'isi na cyo".

Ubwo baheruka gukina mu kwezi kwa cumi mu 2021, Liverpool yanyagiye Man Utd ibitego 5-0 ku kibuga Old Trafford cya Man Utd.

Umutoza w'inzibacyuho (imfatakibanza mu Kirundi) wa United Ralf Rangnick yakoranye na bamwe mu bakinnyi b'ingenzi ba Liverpool mu gihe cy'imyaka yabo ya mbere yo gukina umupira.

Umukinnyi wo hagati wa Liverpool Naby Keïta yavuze ko uwo mutoza w'Umudage yamufataga nk'"umuhungu we" ubwo mbere yatozwaga na we mu makipe ya Red Bull Salzburg na RB Leipzig.

Rangnick yongeyeho ati: "Si ibintu by'uruhurirane [byikoze gutyo gusa] kuba ari beza nkuko bameze".

"Batandatu cyangwa barindwi muri abo bakinnyi bahoze ari abakinnyi banjye, abakinnyi bacu, ubwo twabaguriraga amakipe yacu nta muntu n'umwe ubazi.

"Nanone, si ibintu by'uruhurirane ko iyi ishobora kuba ari yo kipe ifite umubare munini cyane w'abakinnyi bahoze mu makipe yacu ya kera kuko uburyo bwabo, umupira wabo, uburyo bashaka gukinamo burasa cyane".