Liverpool yatsinze Villarreal: Uko yayigaranzuye iri hafi gusezererwa muri Champions League

Mu gihe cy'iminota 45 ku wa kabiri, icyizere cya Liverpool cyo kugera ku mukino wa nyuma wa Champions League cyasaga nk'ikiri mu kaga gakomeye.

Yarushijwe mu gice cya mbere cy'umukino wo kwishyura wo muri kimwe cya kabiri i Villarreal.

Liverpool yakinnye igice cya mbere, cya mbere kibi igize muri uyu mwaka w'imikino, mu mukino wari ushyize ku nkeke icyizere cyayo cyo kwegukana ibikombe bine uyu mwaka.

Ariko - nkuko kenshi cyane bigenda - iyi kipe y'umutoza Jurgen Klopp yabonye uko ihikura.

Mu cyumweru gishize, byabonekaga ko Liverpool irimo kugenzura uyu mukino nyuma yo gutsinda Villarreal ibitego 2-0 i Anfield, ariko ku mpera y'igice cya mbere iyi kipe yo muri Espagne yari yamaze gusubiza umukino ibubisi.

Iminota 60 y'umukino yashize aya makipe anganya ibitego 2-2 ku giteranyo cy'umukino ubanza n'uwo kwishyura.

Ariko Fabinho, Luis Díaz winjiye mu gice cya kabiri, na Sadio Mané buri umwe yinjije igitego, batuma Liverpool izaba iri i Paris ku itariki ya 28 y'uku kwezi kwa gatanu, ku mukino wa nyuma izahuramo na Real Madrid cyangwa Manchester City.

Uko kwigaranzura Villarreal kuvuze ko:

'Mu mitwe yacu ntihari hameze neza' - uko Klopp yahinduye ibintu nyuma y'igice cya mbere

Nyuma y'umukino Klopp yahishuye ko mu kiruhuko cya nyuma y'igice cya mbere yasabye umwungiriza we Peter Krawietz kwereka abakinnyi agace ka videwo kagaragaza aho bakinnye neza mu gice cya mbere, kugira ngo akaberekereho baze gukomereza aho mu gice cya kabiri.

Ariko uwo mwungiriza we arakabura.

Liverpool yari yamaze gutsindwa na Villarreal ibitego 2-0 bya Boulaye Dia na Francis Coquelin, kandi yo nta na rimwe yari yigeze itera ishoti mu izamu rya Villareal.

Klopp yagize ati: "Ikibazo nyuma y'igice cya mbere ni uko twari tuzi ikitagenda kuko cyabonekaga ariko ntitwari dufite ikintu cyo kwerekaniraho aho twitwaye neza".

"Nabwiye Krawietz 'gushaka ahantu hamwe twakoze neza kugira ngo dushobore kuherekana'. Araza aravuga ati 'oya, ntaho mfite'.

"Rero cyari ikibazo gikomeye nyuma y'igice cya mbere ariko [icy'ingenzi] ni uko abahungu babyitwayemo. Twari dutuje kandi turacyari hano [mu irushanwa].

"Ntitwakinnye umupira habe na busa. Nabwiye abahungu nti 'bafite ishyaka riri hejuru ariko ntibarigumana, dushobora kuryisubiza'.

"Igihe twari dushoboye kumena imirongo yabo tukabona imyanya [yo gukiniramo] kandi tukarushaho kunyaruka ntitugume ahantu hamwe, ako kanya twagiye mu mukino. Twatsinze ibitego dutuma ibintu bishoboka.

"Icyo navuze cyari kijyanye n'umupira, aho twagombaga gukina, aho twagombaga kunyeganyega, aho twagombaga kugira umurava, guhindura ibintu, gusubira inyuma no hagati. Cyari ikibazo cy'umupira kandi ugicyemuza umupira.

"Nyuma y'iminota itatu [y'igice cya mbere] mu mitwe yacu ntihari hameze neza. Twahubukaga tukumva igitutu. Ugomba guhatana ugakina umupira wawe bwite kandi mu gice cya kabiri ibyo twabikoze".

Avuga ku magambo Klopp yababwiye nyuma y'igice cya mbere, myugariro Virgil van Dijk yabwiye igitangazamakuru BT Sport ati: "Yatubwiye gukina umupira, mu buryo Liverpool iwukinamo, uko twawukinnye muri uyu mwaka wose w'imikino.

"Bakina bazamuka rero hamwe n'umuvuduko dufite twacyeneye kubivanga. Ikindi twacyeneye kugaragaza ukuntu twashakaga cyane kujya ku mukino wa nyuma. Mu gice cya kabiri twihariye umukino".

Myugariro Trent Alexander-Arnold yongeyeho ati: "Nta na rimwe twakinnye umupira muri kiriya gice cya mbere ndetse nta mipira ya kabiri n'imwe twafashe. Bakinnye umukino bashakaga tubemerera kubikora. Mu gice cya kabiri twagenzuye umukino neza kubarusha".

Kwegukana ibikombe byose bine? Salah yumva bishoboka

Liverpool ubu isigaje imikino itandatu ngo ibe yaba ikipe ya mbere mu Bwongereza yegukanye ibikombe bine mu mwaka umwe w'imikino - nubwo iri inyuma ho inota Manchester City iyoboye urutonde rw'agateganyo rwa Premier League, isigaje imikino ine ngo irangire.

Kandi Liverpool ikaba icyeneye ko mucyeba wayo atsikira agatakaza.

Celtic yonyine, mu mwaka w'imikino wa 1966-1967, ni yo imaze gutsindira European Cup, igikombe cya shampiyona na League Cup mu mwaka umwe w'imikino - nubwo byinshi mu bihugu bitagira ibikombe bibiri bikinirwa imbere mu gihugu.

Kuva Mohamed Salah yagera muri Liverpool mu mwaka wa 2017, imaze gutsindira ibikombe bitatu - Champions League yo mu mwaka wa 2018-2019, Premier League yo mu mwaka wa 2019-2020 na Carabao Cup yo muri uyu mwaka w'imikino.

Mu myaka 13 ya mbere yuko Salah agera muri Liverpool, iyi kipe yari imaze kwegukana ibikombe bitatu.

Uyu Munya-Misiri - muri uyu mwaka umaze kwinjiriza Liverpool ibitego byinshi kurusha bagenzi be, ibitego 30, yagize ati: "Duhatanira buri kintu cyose. Dutsindira [twatsindiye] igikombe kimwe, ubu turi ku wundi mukino wa nyuma, dukomeje guhatana muri Premier League.

"Ubu ibikombe bine ni yo ntego. Wenda mu ntangiriro y'umwaka si yo yari intego. Buri gihe mvugisha ukuri nkibanda kuri Champions League na Premier League. Ariko ubu, kuki se bitaba? Nyuma yuko dutsinze City muri kimwe cya kabiri cya FA Cup [natekereje ko bishoboka].

"Nyuma yo kuva mu matsinda naratekereje nti 'OK, muri uyu mwaka tuzatwara Champions League'.

"Ndashaka gukina na [Real] Madrid [ku mukino wa nyuma]. City ni ikipe igoye cyane".

Klopp yongeyeho ati: "Biragoye rwose kugera ku mikino itatu ya nyuma, birashoboka ko ari yo mpamvu nta wundi muntu n'umwe wari warabikoze mbere.

"Igihe cy'imikino ya nyuma nikigera tuzakora kuburyo tuzaba tubyiteguye, ariko muri iyi mikino ya nyuma dukina n'amakipe akomeye cyane, rero tuzagerageza ariko biragoye".