Umutwe witwara gisirikare wasezeranyije kugaba ibindi bitero mu Burusiya

Inyandiko gusa
Denis Kapustin (uri hagati), akikijwe n'abarwanyi bo mu itsinda Russian Volunteer Corps, aganira n'abanyamakuru muri Ukraine. Ifoto yo ku itariki ya 24 Gicurasi (5) mu 2023

Ahavuye isanamu, EPA-EFE/REX/Shutterstock

Insiguro y'isanamu, Denis Kapustin, komanda w'itsinda RDK, yavuze ko igitero cyo mu Burusiya cyagenze neza

Umukuru w'itsinda ryitwara gisirikare rivuga ko ari ryo ryagabye igitero mu Burusiya cyambutse umupaka kivuye muri Ukraine, yasezeranyije ko hazabaho ibindi bitero nk'icyo.

Denis Kapustin, uyobora itsinda Russian Volunteer Corps (RDK), yagize ati: "Ntekereza ko muzongera kutubona kuri ruriya ruhande".

Uburusiya bwavuze ko bwasubije inyuma icyo gitero, bwica abo bwise abononnyi barenga 70.

Minisitiri w'ingabo w'Uburusiya Sergei Shoigu yasezeranyije "igisubizo gikaze" ku gitero icyo ari cyo cyose cyabaho mu gihe kiri imbere.

Ukraine ihakana ivuga ko nta ruhare yagize muri icyo gitero.

Skip content and continue reading

End of content

Umutwe wa RDK hamwe n'umutwe wa Liberty of Russia Legion (LSR), yavuze ko ari yo yagabye igitero cyo ku wa mbere mu karere ka Belgorod ko mu Burusiya kari ku mupaka na Ukraine.

Aganira n'abanyamakuru ku wa gatatu ari ku mupaka ku butaka bwa Ukraine, Kapustin, ufite izina ry'intambara rya White Rex, yagize ati: "Tunyuzwe n'umusaruro [w'igitero]".

Yavuze ko itsinda rye ryashoboye gufata "intwaro zimwe", zirimo n'imodoka itwara abasirikare n'ibikoresho byabo, anavuga ko hari abo ryafashe bunyago (nk'imfungwa) mu bo barwanaga muri icyo gitero – mbere yuko iryo tsinda riva ku butaka bw'Uburusiya rihamaze amasaha 24.

Skip Ibisomwa cane and continue reading
Ibisomwa cane

End of Ibisomwa cane

Ikarita

Yavuze ko abarwanyi babiri bo mu itsinda rye bakomeretse, ahakana ibivugwa n'igisirikare cy'Uburusiya ko cyishe kikanakomeretsa abononnyi benshi.

Ku rundi ruhande, itsinda LSR ryavuze ko babiri mu barwanyi baryo bishwe naho abandi 10 barakomereka.

Imibare y'abapfuye n'abakomeretse itangwa na buri ruhande rwarwanaga ntabwo yashoboye kugenzurwa mu buryo bwigenga.

Muri icyo kiganiro n'abanyamakuru, Kapustin yahakanye amakuru avuga ko abarwanyi be bakoresheje intwaro zatanzwe n'ibihugu byo mu burengerazuba by'inshuti za Ukraine, byayihaye mu kwirwanaho ku gitero yagabweho n'Uburusiya kuva mu kwezi kwa Gashyantare (2) mu 2022.

Imodoka ebyiri za gisirikare zikorwa n'Amerika zo mu bwoko bwa Humvee, mu karere ka Belgorod mu Burusiya

Ahavuye isanamu, EPA

Insiguro y'isanamu, Uburusiya bwatangaje amafoto buvuga ko ari ay'imodoka za gisirikare zatawe cyangwa zangiritse zo mu burengerazuba – ariko inzobere zimwe zivuga ko ayo mafoto yapanzwe (yateguwe)

Uburusiya buvuga ko imitwe ya RDK na LSR ari iy'intagondwa z'Abanya-Ukraine – ariko Ukraine ivuga ko izo ntagondwa ari izo mu mitwe ibiri y'Abarusiya yitwara gisirikare irwanya ubutegetsi bw'Uburusiya.

Iyi mitwe yombi ivuga ko ishaka gusenya ubutegetsi bwa Perezida w'Uburusiya Vladimir Putin, ndetse mu gihe cyashize iyi mitwe yavuzweho ko iri mu ngabo z'amahanga ziri mu gikorwa cya Ukraine cyo kurwana ku butaka bwayo.

Kapustin yavuze ko ikintu cyonyine Ukraine yahaye umutwe wa RDK ari ibikoresho by'ubuvuzi n'imiti, ibitoro n'ibiribwa.

Umutwe wa RDK wamenyekanye cyane mu kwezi kwa Werurwe (3) muri uyu mwaka wa 2023, ubwo wagiraga uruhare mu gitero cyambukiranya umupaka cyabereye mu karere ka Bryansk ko mu Burusiya, icyo gihe wavuze ko cyakozwe n'abantu 45.