Amerika yitandukanyije n'igitero cyo mu Burusiya

Amerika yitandukanyije n'igitero mu Burusiya – Uburusiya buvuga ko cyarangiye butsinze abacengezi bitwaje intwaro binjiye bavuye muri Ukraine.

Ibice bimwe by'akarere ka Belgorod ko mu Burusiya kari ku mupaka byagabweho igitero ku wa mbere, muri kimwe mu bitero bikomeye cyane byambukiranya umupaka bibayeho kuva Uburusiya bwagaba igitero ku muturanyi wabwo, Ukraine, mu mwaka ushize.

Nyuma yaho, Uburusiya bwatangaje amafoto buvuga ko ari ay'imodoka za gisirikare zatawe cyangwa zangiritse zo mu burengerazuba (Uburayi n'Amerika), zirimo n'imodoka zo mu bwoko bwa Humvee zikorwa n'Amerika.

Amerika yashimangiye ko "idashishikariza cyangwa ngo ifashe ibitero imbere mu Burusiya".

Umuvugizi wa minisiteri y'ububanyi n'amahanga y'Amerika yavuze ko azi "amakuru azenguruka ku mbuga nkoranyambaga n'ahandi" avuga ko intwaro zatanzwe n'Amerika zakoreshejwe, ariko yavuze ko igihugu cye "gishidikanya kugeza ubu ku kuri kw'aya makuru".

Mu kiganiro n'abanyamakuru ku wa kabiri, Matthew Miller yongeyeho ati: "Ukraine ni yo irebwa n'uburyo bwo gukoramo iyi ntambara".

Mu Burusiya, abatuye mu byaro byo mu karere ka Belgorod hafi y'umupaka na Ukraine bahungishijwe, nyuma yuko ibyo byaro birashweho ibisasu bya rutura.

Uburusiya buvuga ko 70 mu bateye bwabishe, ndetse bwashimangiye ko abo barwanyi ari Abanya-Ukraine.

Ariko Ukraine ihakana ivuga ko nta ruhare ibifitemo – ndetse amatsinda abiri yitwara gisirikare y'Abarusiya atavuga rumwe na Perezida w'Uburusiya Vladimir Putin avuga ko ari yo yagabye icyo gitero.

Icyo gitero cyo ku wa mbere cyatumye Uburusiya butangaza ko bwatangije igikorwa cyo kurwanya abakora iterabwoba, ibi byahaye abategetsi ububasha bwihariye bwo guhagarika itumanaho n'urujya n'uruza rw'abantu.

Izo ngamba zakuweho gusa nyuma ya saa sita z'amanywa zo ku wa kabiri, ariko na bwo, rimwe mu matsinda yitwara gisirikare ryari rikivuga ko rigenzura "agace gato, ariko ka kavukire yacu".

Guverineri Vyacheslav Gladkov w'akarere ka Belgorod yavuze ko umusivile umwe yapfiriye muri urwo rugomo, kandi ko abandi benshi bakomeretse.

Nyuma yaho, yavuze ko Belgorod yagabweho ibindi bitero "binini" by'indege nto zitarimo umupilote (zizwi nka 'drones') ku wa kabiri nijoro. Yavuze ko ibyo bitero byangije imodoka z'abantu ku giti cyabo, inzu n'ibiro, ariko ko nta muntu wabipfiriyemo.

Gladkov yanavuze ko umuyoboro wa gaze (gas/gaz) wo mu karere ka Graivoron wangijwe n'ibyo bitero bya za 'drone', bituma habaho inkongi nto y'umuriro mu gitondo cyo kuri uyu wa gatatu.

BBC ntiyashoboye kugenzura mu buryo bwigenga ibi bivugwa n'impande zirimo kurwana – nubwo BBC yashoboye kugenzura ikabona ko inyubako ikoreshwa n'urwego rw'iperereza rw'Uburusiya, ruzwi nka FSB, ari imwe mu nyubako zangijwe muri urwo rugomo. Ntibizwi icyateye uko kwangirika.

Ubwo yavugaga ku mirwano i Belgorod, minisiteri y'ingabo y'Uburusiya yavuze ko "itsinda ry'Abanya-Ukraine b'amatwara ashyira igihugu cyabo imbere" ryateye ubutaka bw'Uburusiya rihakorera ibitero.

Imwe mu mafoto yerekanye imodoka yangiritse yanditseho ku ruhande amagambo yo mu Kirusiya avuga ngo "igenewe Bakhmut".

Ibi bisa nko gukomoza ku mujyi wo mu burasirazuba bwa Ukraine, Uburusiya buvuga ko buherutse kwigarurira – ibyo Ukraine yahakanye.

Hamwe no kwica abo yise "abakora iterabwoba b'Abanya-Ukraine" babarirwa muri za mirongo ikoresheje ibisasu bya rutura n'ibitero by'indege, iyo minisiteri y'ingabo y'Uburusiya yavuze ko abarwanyi bandi yabirukanye ikabasubiza hakurya y'umupaka muri Ukraine.

Ariko abategetsi bo muri Ukraine bavuze ko abateye ari Abarusiya, bo mu matsinda ya Liberty of Russia Legion, na Russian Volunteer Corps.