'Mayor' avuga ko Kyiv yibasiwe n'ikindi gitero cya drone cy'Uburusiya

Mu ijoro Uburusiya bwagabye ikindi gitero cy'indege nto zitarimo umupilote (zizwi nka drone) ku murwa mukuru Kyiv wa Ukraine, cyica nibura umuntu umwe, nkuko abategetsi baho babivuze.

Umukuru w'umujyi wa Kyiv Vitali Klitschko yavuze ko umugabo yapfuye ubwo igisigazwa cya drone cyagwaga hafi ya stasiyo y'ibitoro. Umugore yakomeretse.

Igisirikare cya Ukraine kirwanira mu kirere cyatangaje ko zose hamwe, Uburusiya bwohereje muri Ukraine drone zizwi nka drone z'ubwiyahuzi (cyangwa 'kamikaze drones') 54, za mbere nyinshi kugeza ubu, gihanura 52 muri zo.

I Kyiv honyine, abategetsi bavuze ko hahanuwe drone zirenga 40.

Ayo makuru ntabwo yagenzuwe mu buryo bwigenga.

Mu bihe bya vuba aha bishize, Uburusiya bwakajije umurego w'ibitero kuri Kyiv, bushaka gushengura ubushobozi bw'uwo murwa mukuru bwo kwirwanaho.

Kuri iki cyumweru, uburyo bw'impuruza buburira ku gitero cyo mu kirere bwavugijwe mu turere 12 twa Ukraine, kuva i Volyn mu majyaruguru ashyira uburengerazuba kugeza i Dnipropetrovsk mu majyepfo ashyira uburasirazuba.

Mu butumwa bwo ku mbuga nkoranyambaga, 'Mayor' Klitschko yashishikarije abatuye i Kyiv "kuguma aho bikinze", aburira ko ijoro riba "rigoye".

Yavuze ko inyubako ndende nibura ebyiri zo mu turere two mu murwa mukuru zari zirimo gushya nyuma yuko ibice bya drone zahanuwe bizikubiseho.

Abakora ubutabazi bwihuse boherejwe gutabara.

Hanatangajwe ko humvikanye ibiturika mu mujyi wa Zhytomyr, mu burengerazuba bwa Kyiv.

Impuruza iburira igitero cyo mu kirere nyuma yakuweho mu murwa mukuru n'ahandi mu gihugu.

Mu bitero byabwo byo mu gihe cya vuba aha gishize, Uburusiya bwagiye bukoresha izizwi nka drone z'ubwiyahuzi hamwe n'ibisasu bya misile zo mu bwoko bwa 'cruise' na 'ballistic'.

Ibi bitero bya drone bibaye mbere y'igitero cyitezwe henshi cya Ukraine cyo gutsinsura abasirikare b'Uburusiya muri Ukraine.

Ku wa gatandatu, umwe mu bategetsi ba Ukraine bo hejuru cyane mu rwego rw'umutekano yabwiye BBC ko iki gihugu ubu cyiteguye kugaba icyo gitero.

Oleksiy Danilov, umunyamabanga w'akanama k'umutekano n'ubwirinzi ka Ukraine, yavuze ko kigamije kwisubiza ubutaka bwa Ukraine bwafashwe n'abasirikare b'Uburusiya, kuva Perezida Vladimir Putin yagaba igitero kuri Ukraine mu kwezi kwa Gashyantare (2) mu 2022.

Danilov yavuze ko icyo gitero gishobora gutangira "ejo, hirya y'ejo cyangwa mu cyumweru kiri imbere".

Ukraine imaze amezi itegura igitero cyo kugarukana (gusubirana inyuma) abasirikare b'Uburusiya.

Ariko byayisabye igihe gihagije cyo guha imyitozo abasirikare bayo no kubona ibikoresho bya gisirikare yahawe n'ibihugu by'inshuti zayo byo mu burengerazuba (Uburayi n'Amerika).

Hagati aho, abasirikare b'Uburusiya na bo bamaze igihe bategura ubwirinzi bwabo mu turere bafashe two mu majyepfo ashyira uburasirazuba bwa Ukraine.

Aganira na BBC, ambasaderi w'Uburusiya mu Bwongereza, Andrei Kelin, yavuze ko igihugu cye gifite "ubushobozi bwinshi cyane" kandi ko kugeza ubu kitarakora "mu buryo bushimitse [bukomeye] cyane".

Yaburiye ko intwaro ibihugu byo mu burengerazuba biha Ukraine zishobora gutuma intambara ifata indi ntera itarigera ibonwa kugeza ubu, yongeraho ati:

"Bitinde bitebuke, birumvikana, uku gufata indi ntera gushobora gufata urundi rwego tudacyeneye kandi tudashaka".