Abantu batatu biciwe mu gitero gishya cya misile cy'Uburusiya kuri Kyiv

Abantu batatu bapfuye, barimo n'umukobwa w'imyaka 11, mu gitero gishya cya misile cya nijoro Uburusiya bwagabye ku murwa mukuru Kyiv wa Ukraine, nkuko byavuzwe na polisi ikorera muri ako karere.

Uburusiya bumaze igihe bugaba ibitero byo mu kirere ku murwa mukuru wa Ukraine mu buryo buhoraho, bukoresheje ibisasu bya misile n'indege nto zitarimo umupilote zizwi nka drone.

Muri iki gitero gishya, byatangajwe ko cyakomerekeyemo abandi bantu 11. Cyabereye mu turere twa Desnyanskyi na Dniprovskyi two mu burasirazuba bwa Kyiv.

Umugore w'imyaka 33, n'umugore w'imyaka 34 akaba na nyina w'uwo mukobwa wishwe, na bo bishwe.

Mu makuru batangaje mbere, abategetsi bo muri Ukraine bari bavuze ko abana babiri bapfuye, ariko ibyo babihinduye.

Iki gitero kibaye icya kane muri iki cyumweru, ndetse kibaye nyuma yuko mu kwezi gushize kwa Gicurasi (5) Uburusiya bwagabye ibitero 17 byose hamwe ku murwa mukuru wa Ukraine – byinshi muri byo byabaye nijoro, uretse ko nibura kimwe muri byo cyabaye ari ku manywa.

Amashusho yatangajwe n'abategetsi ba gisirikare bo muri Ukraine agaragaza amatsinda y'abakora ubutabazi yita ku bantu, ndetse no ku nyubako zangiritse.

Mu butumwa butandukanye bwo mu gitondo cyo kuri uyu wa kane bwo ku rubuga rwa Telegram, umukuru w'umujyi wa Kyiv Vitali Klitschko yavuze ko "urukurikirane rw'ibiturika" rwabayeho muri uwo mujyi, ndetse ko abakora ubutabazi bakomeje guhangana n'ibisigazwa byahubutse, hamwe n'imiriro.

Hagati aho, abategetsi bashyigikiwe n'Uburusiya bo mu karere ka Luhansk mu burasirazuba bwa Ukraine, kigaruriwe n'Uburusiya, bavuze ko ku wa gatatu abantu batanu bishwe naho abandi 19 bakomeretswa n'igisasu cya Ukraine cyarashwe ku murima wororerwamo ibiguruka.

Mu gitondo cyo kuri uyu wa kane, Guverineri w'akarere ka Belgorod ko mu burengerazuba bw'Uburusiya, gahana imbibi na Ukraine, yavuze ko abantu nibura babiri bakomeretse mu gitero cyo mu mujyi wa Shebekino, yegetse ku basirikare ba Ukraine.

Guverineri Vyacheslav Gladkov yanditse ku rubuga rwa Telegram ati: "Ijoro rirakomeye nanone kuri Shebekino. Abasirikare ba Ukraine bari barimo barasa ku mujyi mu gihe cy'isaha imwe".

Mu byumweru bya vuba aha bishize, Uburusiya – bwagabye igitero gisesuye kuri Ukraine guhera mu kwezi kwa Gashyantare (2) mu 2022 – bwagiye bukoresha za drone z'ubwiyahuzi, zizwi nka 'kamikaze drones', hamwe n'ibisasu bya misile zo mu bwoko bwa 'cruise' na 'ballistic' mu kurasa ahantu hatandukanye ho muri Ukraine.

Kyiv yarashweho cyane, ndetse abasesenguzi bamwe bavuga ko Uburusiya burimo gushaka gushegesha no kwangiza ubwirinzi bw'ikirere bwa Ukraine, mbere y'igitero kimaze igihe cyitezwe cya Ukraine cyo kugarukana (gusubiza inyuma) abasirikare b'Uburusiya – igitero leta ya Ukraine imaze amezi itegura.