Uko Kapiteni wo muri Zambia yagowe no kwemererwa kurera umwana wo muri Centrafrique

Kapiteni Mwila Chansa wo mu ngabo za Zambia yavuze ku rugamba yaciyemo ngo ashobore kwemererwa kurera umwana yahuye na we bwa mbere ubwo yari mu butumwa bwo kubungabunga amahoro bw'umuryango w'abibumbye (ONU/UN) muri Centrafrique.

Umubyeyi w'uwo mwana w'umukobwa yari atwise impanga, ariko agira ikibazo apfa amaze kubyara umwana wa mbere mu kwezi kwa cumi na kumwe mu 2020. Uwa kabiri yapfuye mbere yuko avuka.

Kapiteni Chansa yasuye umujyi wa Birao, hafi y'umupaka wa Sudan na Tchad, mu kwezi kwa gatatu mu 2021, ubwo yumvaga inkuru y'uwo mwana - icyo gihe witabwagaho n'umuforomo mu nkambi y'abasirikare ba Zambia muri Centrafrique.

Yafashe icyemezo cyo kurera uwo mwana, ariko ibibazo byo mu nzego za leta bituma icyo gikorwa kimara igihe ndetse kigorana, mu kunyura mu mategeko ya kisilamu yo muri Centrafrique.

Mu kiganiro na BBC, yagize ati: "Nagiye kuri Google, ngerageza gushakisha uburyo bwo kurera umwana wo muri CAR [Centrafrique]. Amakuru yose yari ajyanye na USAID [ikigo cy'Amerika gitanga imfashanyo] n'ukuntu byoroshye ku Banyamerika muri rusange kurera umwana.

"Ariko nta kintu na kimwe cyari gihari kijyanye no kurera umwana waho uri Umunya-Zambia".

Kapiteni Chansa yavuze ko "kwizera gukomeye" kwe kwatumye ahatana n'"abategetsi kugeza ubwo umwana ageze hano [mu murwa mukuru Lusaka wa Zambia]".

Yagize ati: "Binyibutsa cyane inkuru ya Musa wo muri Bibiliya".

"Kurera umwana ni nko kujya mu rukundo. Ubona abagabo benshi cyane cyangwa abagore benshi cyane ariko uhitamo umwe gusa".

Perezida wa Zambia Hakainde Hichilema yashimye igikorwa cya Kapiteni Chansa kubera kugaragaza ubumuntu mu kazi ke.

Uko gushimwa na Perezida kwatumye Kapiteni Chansa arushaho kumenyekana.

Kapiteni Chansa yagize ati: "Nabyutse, nsanga telefone yanjye yuzuye abambuze".

Icyo yifuza ni uko uwo mwana w'umukobwa - yise Thabo - azakura akazaba Perezida wa Centrafrique.

Yagize ati: "Nakwifuza ko azaba Perezida wa Centrafrique. Ibyo mbivuze nkomeje".