US: Imfungwa n'umucungagereza baburiwe irengero muri Alabama bari bafitanye 'umubano wihariye'

Imfungwa yo muri Amerika yatorotse gereza hamwe n'umucungagereza ucyekwaho kuyifasha bari bafitanye "umubano wihariye", nkuko bivugwa n'abakora iperereza.

Iri tangazo ry'ibiro by'umupolisi mukuru wo muri leta ya Alabama ryavuze ko ibyo byatahuwe byemejwe n'izindi mfungwa zari zifunganywe na Casey White, ucyekwaho ubwicanyi.

Harimo gushakishwa mu buryo bukomeye iyo mfungwa yatorotse, y'imyaka 38, hamwe n'umucungagereza Vicky White, w'imyaka 56, bahuje izina nubwo nta sano bafitanye.

Bombi baburiwe irengero ubwo yari ajyanye iyo mfungwa mu modoka ngo ikorerwe isuzumwa rya baringa (rihimbano) ry'ubuzima bwo mu mutwe.

Polisi ntiyahishuye niba uwo mubano ari uw'urukundo.

'Nta kintu na kimwe cyo gutakaza'

Ku wa gatanu - umunsi bombi baburiweho irengero - wari witezwe kuba umunsi wa nyuma w'akazi w'uwo mucungagereza. Yari aherutse kugurisha inzu ye ndetse abwira bagenzi be bakorana ko ateganya kurushaho kumara igihe ari ku mwaro w'inyanja.

Ubu noneho polisi iremeza ko Madamu White yafashije muri uko gutoroka nyuma yo kurenga ku mategeko agaherekeza Casey White ari we wenyine.

Mu itangazo umupolisi mukuru w'akarere Rick Singleton yasohoye ku wa kabiri, yagize ati:

"Abakora iperereza bahawe amakuru mu mpera y'icyumweru n'imfungwa zo muri gereza y'akarere ka Lauderdale ko hari hari umubano wihariye hagati y'umuyobozi White n'imfungwa Casey White".

"Uwo mubano ubu wemejwe binyuze mu iperereza ryacu ryakozwe hagendewe ku bantu bigenga no mu buryo bwigenga".

Ku wa kabiri, urwego rw'Amerika rugenzura iyubahirizwa ry'amategeko - ruzwi nka US Marshals Service - rwavuze ko abo bombi babonywe bwa nyuma ku wa gatanu batwaye imodoka y'ibara ry'ikigina yo bwoko bwa Ford Edge ifite nimero iyiranga (plaque) yo muri Alabama.

Ayo makuru y'urwo rwego yanavuze ko Madamu White akoresha amazina abiri y'amahimbano - April Davis na Renee Marie Maxwell. Abategetsi bavuga ko Casey White akwiye gufatwa nk'umuntu "witwaje intwaro kandi uteje akaga gakomeye".

Abategetsi bavuga ko ubu abo bombi bashobora kuba bafite imbunda nini yo mu bwoko bwa AR-15 hamwe n'imbunda ntoya.

Ku wa mbere, umupolisi mukuru Singleton yavuze ko Casey White, ufite uburebure bwa metero ebyiri, ateje "akaga gakomeye", agira inama abapolisi "kutagira ikintu na kimwe bakinisha" hamwe na we.

Yagize ati: "Nta kintu na kimwe afite cyo gutakaza [guhomba]".

Kuva ku 'mukozi mwiza' kugera ku 'watorotse ushakishwa'

Yongeyeho ko Madamu White byibazwa ko arimo gukoresha amafaranga agendana (ya cash), kandi ko yafunze telefone ngendanwa ye.

Yavuze ko urwego rw'ubutasi rw'Amerika rurimo gufasha mu kugenzura uko akoresha amafaranga.

Umushinjacyaha mukuru w'akarere ka Lauderdale Chris Connolly yabwiye abanyamakuru ati: "Iyo twabaga dushaka ikintu kivuye kuri gereza, ni we twaganagaho, umukozi mwiza. Ni yo mpamvu twumiwe cyane".

Urwego rwa Marshals Service rwavuze ko Madamu White ari "uwatorotse urimo gushakishwa".

Casey White yaregwaga ubwicanyi bwo mu kwezi kwa cyenda mu 2020, mu gutera icyuma Connie Ridgeway wari ufite imyaka 58, nkuko bivugwa n'urwego US Marshals Service.

Yari asanzwe ari mu gifungo cy'imyaka 75 kubera uruhare mu rukurikirane rw'ibyaha byo mu 2015, birimo kwinjira mu nzu mu buryo bunyuranyije n'amategeko agakora ubujura, kwiba imodoka, no kwiruka atoroka polisi imuhagaritse.

Amakuru avuga ko yemeye ubwicanyi, ariko nyuma akavuga ko nta cyaha yakoze kubera ko atari ameze neza mu mutwe, ndetse abategetsi bongeyeho ko yarafungiye muri gereza y'akarere ka Lauderdale ategereje kuzaburanishwa.

Iyo ahamwa n'icyaha yari kuzahanishwa igihano cy'urupfu.

Hagati aho, umugore White yagerageje kwica mu bujura yavuze ko "yataye umutwe" nyuma yo gutahura ko yatorotse.

Uwo mugore utatangajwe izina yabwiye televiziyo yaho WAAY 31 ikorana na ABC ko we n'umuryango we barimo kwihisha, kubera ubwoba ko White azabashakisha akabageraho.

Uwo mugore yanavuze ko hari ubutumwa afitiye Madamu White, ati: "Niba akiri muzima, natoroke. Iruka. Iruka ujye kure ushoboye kugera hose, ubundi wishyikirize [abategetsi], ugire umuntu uhamagara.

"... Kora ikintu gikwiye mbere yuko utakaza ubuzima bwawe cyangwa hakagira undi muntu ubutakaza".