Haiti: Imfungwa zibarirwa mu magana zatorotse gereza ya Croix-des-Bouquets

Imfungwa zirenga 400 ubu zirimo kwihishahisha nyuma yo gutoroka gereza iri hafi y'umurwa mukuru Port-au-Prince wa Haïti.

Abategetsi bavuga ko abantu 25 bapfuye nyuma y'uko guroka gereza ya Croix-des-Bouquets kwabaye ku wa kane. Abo bapfuye barimo n'uwari umukuru w'iyo gereza.

Abapfuye barimo n'abari bari hafi aho barebera bisanze baguye mu bikorwa by'urugomo byakurikiyeho, nkuko abategetsi babivuze.

Umwe muri abo bahunze, umuyobozi ukomeye w'igico cy'abagizi ba nabi witwa Arnel Joseph, yishwe hashize amasaha atorotse.

Joseph, wari ucyambaye umunyururu wo muri gereza umuboshye ku maguru, yari umugenzi wari uri kuri moto yahagaritswe igeze kuri bariyeri, nkuko byavuzwe n'umuvugizi wa polisi Gary Desrosiers.

Iyo moto yanze guhagarara, nuko Joseph asohora imbunda ayitunga abapolisi, bahise bamurasa bakamukomeretsa bikamuviramo urupfu, nkuko Bwana Desrosiers yabivuze.

Mbere yuko atabwa muri yombi mu mwaka wa 2019, Joseph yari we mukuru w'igico cy'abagizi ba nabi washakishwaga cyane kurusha abandi bose muri Haïti.

Amakuru y'uko iryo toroka ryagenze ntabwo arasobanuka neza. Ababibonye bavuze ko bumvise urusaku rw'amasasu hafi saa sita (12h) z'amanywa ku wa kane, nuko imfungwa zikabonwa zirimo kwiruka ziva muri iyo gereza.

Abakozi bo mu iduka ry'imyenda riri hafi aho babwiye abanyamakuru ko bategetswe guha imyenda izo mfungwa zari zirimo zihunga.

Gereza ya Croix-des-Bouquets yatashywe ku mugaragaro mu mwaka wa 2012, kandi yari igenewe kwakira imfungwa zitarenze 872, nkuko ibiro ntaramakuru AFP byabitangaje.

Frantz Exantus, umunyamabanga wa leta ya Haïti ushinzwe gutangaza amakuru, yavugiye mu kiganiro n'abanyamakuru ku wa gatanu ko iyo gereza yari ifungiyemo imfungwa zirenga 1,500 mbere yuko habaho iryo toroka.

Yagize ati: "Abantu makumyabiri na batanu bapfuye barimo n'imfungwa esheshatu n'umugenzuzi wa gereza Paul Hector Joseph".

Yongeyeho ati: "Mu bishwe harimo n'abaturage basanzwe bishwe n'imfungwa ubwo zari zirimo gutoroka".

Haïti ni cyo gihugu cya mbere gicyennye cyane kurusha ibindi byose byo mu birwa bya Caraïbes (Caribbean). Cyari cyarigeze kubamo itoroka ry'imfungwa mu kivunge mbere yaho.

Mu mwaka wa 2019, imfungwa zose 78 zari muri gereza ya Aquin mu majyepfo y'igihugu zaratorotse, mu gihe polisi yari irangajwe n'imyigaragambyo y'abatavuga rumwe na leta yari irimo kubera hafi aho.

Mu mwaka wa 2017, imfungwa zirenga 170 zatorotse gereza yo muri komine ya Arcahaie, mu majyaruguru y'umurwa mukuru Port-au-Prince.