Korea ya ruguru na Korea y'epfo zasubijeho umurongo wa telefone nyuma y'umwaka

Koreya ya ruguru na Koreya y'epfo zasubijeho umurongo w'itumanaho rya telefone wari waraciwe na Koreya ya ruguru mu kwezi kwa gatandatu mu mwaka ushize.

Ibiro bya perezida wa Koreya y'epfo bivuga ko abategetsi b'ibihugu byombi bemeranyijwe kongera kubaka icyizere no kuvugurura umubano.

Itangazo ry'ibyo biro ryongeyeho ko kuva mu kwezi kwa kane uyu mwaka bohererezanyije amabaruwa menshi.

Mu kwezi kwa gatandatu mu 2020 ni bwo Koreya ya ruguru yaciye uwo murongo wa telefone, mu gihe umubano wabaga mubi nyuma yuko inama hagati y'ibihugu byombi itabaye.

Nyuma yaho gato, Koreya ya ruguru yaturikije ibiro byo ku mupaka ku ruhande rwayo byayihuzaga na Koreya y'epfo, byari byarubatswe mu rwego rwo kuvugurura umubano w'ibihugu byombi.

Ibiro ntaramakuru KCNA bya leta ya Koreya ya ruguru byagize biti:

"Nkuko bikubiye mu masezerano hagati y'abayobozi bakuru, amajyaruguru n'amajyepfo yafashe ingamba yo kongera gukoresha imirongo yose y'ubuhuza bwa Korea kuva saa yine z'amanywa [10h] ku itariki ya 27 y'ukwezi kwa karindwi".

KCNA yongeyeho iti: "Abayobozi bakuru bemeranyijwe kugira umuhate munini mu kubyutsa icyizere ku mpande zombi no guteza imbere ubwiyunge".

Abahagarariye impande zombi bavuganye kuri telefone mu gihe cy'iminota itatu, nkuko bivugwa na minisiteri y'ubuhuza ya Koreya y'epfo.

Iyi minisiteri yongeyeho ko kuri uyu wa kabiri nyuma ya saa sita z'amanywa haba kongera kuvugana, na nyuma bikazajya bibaho buri munsi.

Uhagarariye Koreya y'epfo yagize ati: "Twishimiye kongera kuganira nyuma y'umwaka urenga. Twizeye ko ibi... [bizana] inkuru nziza ku baturage bose ba Koreya [zombi]".

Mu 2018 umubano hagati y'ibihugu byombi wateye intambwe, ubwo Perezida wa Koreya y'epfo Moon Jae-in n'umutegetsi wa Koreya ya ruguru Kim Jong-un bahuraga inshuro eshatu.

Ariko mu buryo bwihuse uyu mubano wahise uba mubi nyuma yuko inama ya kabiri hagati ya Bwana Kim na Donald Trump wari Perezida w'Amerika itagize icyo igeraho.

Nyuma yaho ubushyamirane bwafashe indi ntera, bitewe n'amatsinda y'abatorotse Koreya ya ruguru bahungiye muri Koreya y'epfo boherezaga mu ya ruguru ubutumwa bw'icengezamatwara.

Ibi byatumye Koreya ya ruguru ihagarika itumanaho ryose rya gisirikare na politiki ryayihuzaga n'iy'epfo, harimo n'umurongo wa telefone wahuzaga abategetsi b'ibihugu byombi.

Perezida wa Koreya y'epfo yari yarasabye ko uwo murongo wa telefone usubizwaho ndetse hagasubiraho n'ibiganiro bigamije gusenya gahunda ya nikleyeri n'iy'ibisasu bya misile ya Koreya ya ruguru.

Urebye, izi Koreya zombi ziracyari mu ntambara kuko intambara zarwanye kuva mu 1950 kugeza mu 1953 yarangiye hashyizwe umukono ku masezerano yo kuba bahagaritse intambara, aho kurangizwa n'amasezerano y'amahoro.