Chwe Gwlad: Rees-Zammit i ddechrau fel cefnwr yn erbyn Lloegr

Louis Rees-ZammitGetty Images

Mae Louis Rees-Zammit wedi ennill 35 cap i Gymru, ers gwneud ei ymddangosiad cyntaf yn 19 oed

Mae prif hyfforddwr Cymru wedi enwi Louis Rees-Zammit fel cefnwr yn ei dîm i wynebu Lloegr yn eu gêm agoriadol yn y Chwe Gwlad ddydd Sadwrn.

Bydd y gêm yn dechrau am 16:40 yn Twickenham, gyda'r Ffrancwr, Pierre Brousset, i chwythu'r chwiban.

Mae Steve Tandy yn paratoi ar gyfer ei bencampwriaeth gyntaf wrth y llyw a dydy Cymru ddim wedi ennill unrhyw gêm Chwe Gwlad ers bron i dair blynedd.

I'r gwrthwyneb, mae Lloegr yn dod i'r ornest gyda record dda yn ddiweddar, wedi iddynt ennill pob un o'u 11 gemau rhyngwladol diwethaf.

Dewi Lake a Steve TandyGetty Images

Dewi Lake - sydd â 26 chap dros ei wlad - ydy'r capten y gwnaeth Steve Tandy ei ddewis i Gymru ar gyfer y Chwe Gwlad

Mae'r ddau o'r Scarlets, Josh Macleod ac Eddie James, yn dychwelyd ar ôl colli ymgyrch yr hydref yn sgil anafiadau.

Bydd y blaenasgellwr Macleod, 29, yn gwneud ei ymddangosiad cyntaf yn y bencampwriaeth, gan lenwi'r twll sydd wedi'i adael gan Jac Morgan, sydd wedi'i anafu.

Mi fydd Macleod yn cychwyn wrth ymyl Alex Mann ac Aaron Wainwright yn y rheng ôl.

Bydd y canolwr, James, yn dechrau gyda Ben Thomas, tra bod yr asgellwr, Ellis Mee, wedi'i enwi ymysg y tri yn y cefn gyda Rees-Zammit a Josh Adams.

Dewi Lake, y bachwr, fydd yn arwain Cymru eto yn absenoldeb Morgan ac yn chwarae ochr yn ochr â'r propiau Nicky Smith ac Archie Griffin.

Enwodd Lloegr, o dan ofal Steve Borthwick, y tîm ddydd Llun a bydd chwaraewyr Cymru yn croesawu'r newyddion y bydd Maro Itoje, y blaenwr, yn cychwyn ar y fainc yn hytrach na'r cae.

Dewi Lake - Cymru, Sione Tuipulotu - yr Alban, Jamie George - Lloegr, Antoine Dupont - Ffrainc, Caelan Doris - Iwerddon, Michele Lamaro - yr EidalGetty Images

Yn wreiddiol yn 1883 dim ond Cymru, Iwerddon, yr Alban a Lloegr oedd yn rhan o'r bencampwriaeth, ond ymunodd Ffrainc yn 1910 a'r Eidal yn 2000

Tîm Cymru:

Rees-Zammit; Mee, James, B Thomas, Josh Adams; Edwards, T Williams; Smith, Lake (capten), Griffin, D Jenkins, Beard, Mann, Macleod, Wainwright.

Eilyddion: Belcher, Carre, T Francis, Carter, Plumtree, Deaves, Hardy, Grady.

Cymru yn erbyn Lloegr 2025Getty Images

68-14 i Loegr oedd y sgôr yng Nghaerdydd rhwng y ddau dîm fis Mawrth y llynedd

Tîm Lloegr:

Freddie Steward; Immanuel Feyi-Waboso, Tommy Freeman, Fraser Dingwall, Henry Arundell; George Ford, Alex Mitchell; Ellis Genge, Jamie George (capten), Joe Heyes, Alex Coles, Ollie Chessum, Guy Pepper, Sam Underhill, Ben Earl.

Eilyddion: Luke Cowan-Dickie, Bevan Rodd, Trevor Davison, Maro Itoje, Tom Curry, Henry Pollock, Ben Spencer, Marcus Smith.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol