Ateb y Galw: Gwïon Morris Jones

Mae Gwïon Morris Jones yn actor a chanwr o Ynys Môn, ond yn bellach yn byw yn Llundain. Mae'n ymddangos ar hyn o bryd yn Dal Y Mellt ar S4C ac Under Salt Marsh ar Sky Atlantic a NowTV.

Er ei fod yn brysur yn saethu ffilm newydd ar hyn o bryd, fe gymrodd saib o'r gwaith i ateb cwestiynau busneslyd Cymru Fyw.

Mynd i Ysbyty Gwynedd i gael tegan til yn anrheg. Digwydd bod, fe gafodd fy chwaer, Siwan ei geni'r un diwrnod. Wrth gwrs, anrheg oedd y til gan fy chwaer fach newydd. Yn ddwy a hanner oed, doeddwn i ddim yn cwestiynu ei gallu i fynd i siopa.

Mynydd Parys. Mae gen i gysylltiad teuluol cryf efo Rhosybol. Roedd teulu fy nain yn cadw'r siop yno, Mam wedi ei magu yno, a fi a'm chwaer ydi'r drydedd genhedlaeth i fynychu Clwb y Ffermwyr Ifanc yno.

Mae cerdded tirwedd arallfydol y mynydd, yn gwybod bod fy nghyndeidiau wedi bod yn rhan o'r diwydiant copr yna, yn brofiad cyfriniol. Sgwennodd fy mam sioe gerdd am yr hanes, Llwch yn ein Llygaid, a chwaraeais ran John Elias yng nghynhyrchiad Ysgol Syr Thomas Jones. Rhan o gychwyn fy siwrnai fel actor.

Nos Fercher Eisteddfod Genedlaethol Wrecsam. Wedi diwrnod prysur, es i weld fy chwaer yn headline-io Llwyfan y Maes efo fy hoff artist, Meinir Gwilym. Ei dilyn hi wedyn i Faes B i'w gweld yn chwarae efo Buddug.

Ar draws hyn i gyd, roedd un pianydd wedi dal fy llygad ers canol p'nawn. Daeth o, yn ei grys streips, i Lwyfan y Maes, ac yna i Faes B lle buon ni'n sgwrsio am oriau. Dydi'r sgwrs honno dal heb ddod i ben oherwydd mae'r pianydd yn y crys streips, Gruff, bellach yn gariad i mi.

Angerddol, gofalgar, gwirion.

Clywed fy nghyd-fyfyrwyr yn Central (fy ysgol ddrama) yn canu darn wnes i ei gyfansoddi. Roeddwn i wedi gosod geiriau Shakespeare i wyth llais ac ukelele i gloi ein cynhyrchiad o Nos Ystwyll. Roedd hi'r tro cyntaf i mi glywed fy ngwaith cyfansoddi yn cael ei berfformio.

'Mond yn ddiweddar iawn dw i wedi sylweddoli bod misdimanars yn dod o'r gair misdemeanours, nid misty manners. Dw i'n siŵr mod i wedi deud misty manners mewn ambell glyweliad yn Llundain.

Dw i'n crïo'n aml. Wrth wrando ar Unlikely Lovers o'r sioe gerdd Falsettos yn y car, wrth wylio Lost Boys And Fairies ar y soffa, wrth wylio Hamnet yn y sinema neithiwr... dw i jest yn gradur bach emosiynol!

Dwi'n dueddol o ddibynnu ar adrenalin funud olaf i orffen unrhyw dasg dydw i ddim isio'i gneud. Stydio sgriptiau, dysgu leins, unrhyw beth efo sbarc creadigol, dw i awê. Ond ffurflen treth incwm? Dim diolch.

Llyfr Glas Nebo. Mae Manon Steffan Ros mor driw i'w chymeriadau. Eu lleisiau mor glir a didwyll. Mae hi'n ysgrifennu fel actor sydd wedi astudio rôl yn drylwyr. Ges i'r fraint o leisio'r nofel ar gyfer addasiad BBC Radio 4, efo Rhian Blythe. O bob dim dwi 'di neud, dyma un o'r darnau o waith dw i fwyaf balch ohono. 'Sgwn i oes rhywun wedi ystyried gneud ffilm? Dwi ar gael ;)

Fy nhaid, Trefor. Fuodd o farw pan o'n i'n chwech oed. Mae pawb yn deud mod i'n debyg iawn iddo, o ran f'ymddygiad, a phryd a gwedd. Roedd o'n ddyn doeth iawn a 'swn i wir yn gwerthfawrogi'r doethineb hwnnw yn oedolyn.

Yn fy arddegau, roeddwn i, a fy ffrind pennaf Carwyn (sy'n llais ac wyneb cyfarwydd i'r rhai ohonoch sy'n dilyn y newyddion), eisiau bod yn rheolwyr fferm. Doedd gen i ddim profiad amaethyddol ond roeddwn i wrth fy modd yn y Ffermwyr Ifanc, yn barnu buchod, ac roeddwn i'n ysu i fod yn rhan o'r gymuned.

Cael pryd o fwyd cynhesol hefo Mam, Siwan, a Gruff. Adra.

Fi, fy chwaer, Mam a Nain yn ei gardd gefn, tua 2005. Y tair dynes gref yma, eu cefnogaeth, caredigrwydd, a'u cariad, sydd wedi fy ngwneud i'r hyn ydw i heddiw. Fyddwn i'n ddim heb y tair yma tu ôl i mi ac mae fy niolch a'm parch tuag atynt yn enfawr.

Heb os, cydymaith i'r Doctor o Doctor Who. Dwi'n ffan enfawr o'r gyfres ers yn hogyn bach ac wedi bod yn ddigon ffodus cael bod yn rhan ohoni. Hyd heddiw, dwi'n dal i aros i'r bocs heddlu eiconig gyrraedd Ynys Môn!

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.