Enzo Romano 'mor hapus' i fod yn gymwys i gynrychioli Cymru
Mae Enzo Romano wedi chwarae i dimau ieuenctid Cymru dros y blynyddoedd
- Cyhoeddwyd
Mae tad pêl-droediwr ifanc wedi diolch i'r cyhoedd am eu "cefnogaeth anhygoel", ar ôl cael gwybod y bydd ei fab yn gymwys i chwarae dros Gymru.
Daeth y penderfyniad wedi i ail gais Enzo Romano am ddinasyddiaeth Brydeinig gael ei wrthod ddechrau mis Chwefror - rhywbeth sydd ei angen i gynrychioli'r tîm cenedlaethol o dan reolau Fifa.
Cafodd ei eni yng Nghaerdydd yn 2009 i rieni o'r Eidal a Sbaen, ac mae wedi chwarae i dimau ieuenctid Cymru a Barcelona dros y blynyddoedd.
Mae'r BBC ar ddeall ei fod wedi cael gwybod bod ei gais am ddinasyddiaeth bellach "mewn sefyllfa i gael ei gymeradwyo", gan baratoi'r ffordd iddo gynrychioli Cymru.
Dywedodd y Swyddfa Gartref nad yw'n gwneud sylwadau ar achosion unigol.
Mae Enzo wedi dweud ei fod yn "teimlo mor hapus i gynrychioli fy ngwlad eto".
Dywedodd Enzo nad oedd yn meddwl fod ganddo gyfle gan ei fod eisoes wedi cael ei wrthod ddwywaith, ond fod ganddo "obaith tu mewn i mi" i chwarae dros ei wlad.
"Mae'n foment gyffrous iawn, rydyn ni mor hapus am yr hyn sy'n digwydd," meddai Antonio - tad Enzo - wrth BBC Cymru.
"Pan wnes i ddeall fod hyn yn wirioneddol bwysig - nid yn unig i bêl-droed ond i Enzo - meddyliais: 'Fi'n mynd i ymladd tan y diwedd'.
"Ar ôl dwy flynedd o frwydro, gyda'r gefnogaeth anhygoel a gawsom gan bawb, mae'n hollol wych.
"Rydyn ni'n gweld gwên ar wyneb ein mab, felly dyna'r peth pwysicaf," meddai.
Ychwanegodd ei fod wedi cael ei synnu gan y cariad a gafon nhw gan bobl Cymru, gan ddweud mai "bachgen 16 oed, nid rhywun enwog" ydy Enzo.
Pêl-droediwr ifanc i gael cynrychioli Cymru ar ôl tro pedol dinasyddiaeth
- Cyhoeddwyd1 diwrnod yn ôl
Ansicrwydd os gallai pêl-droediwr o Gaerdydd gynrychioli Cymru
- Cyhoeddwyd5 Chwefror
"Dydy'r ffaith fy mod wedi symud i Barcelona ddim yn golygu nad ydw i'n Gymro," meddai'r pêl-droediwr.
"Y peth cyntaf sy'n dod i'm meddwl bob tro yw'r ddraig ar fy mrest.
"Byddaf yn trio gwneud fy ngorau i aros ar gopa'r mynydd - yn nhîm yr oedolion," ychwanegodd Enzo.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
