Prisiau tocynnau trên Trafnidiaeth Cymru i gael eu rhewi am flwyddyn

Bydd prisiau tocynnau trên Trafnidiaeth Cymru yn cael eu rhewi am flwyddyn o 1 Mawrth, yn ôl cyhoeddiad gan Lywodraeth Cymru.

Dywedodd y Prif Weinidog Eluned Morgan y byddai cadw prisiau tocynnau trên ar eu lefel bresennol ar wasanaethau Trafnidiaeth Cymru yn rhoi "rhoi sicrwydd i deithwyr ar adeg pan mae llawer yn cael trafferth gyda chostau byw."

Mae'r cam hwn yn dilyn cyhoeddiad Llywodraeth y DU y bydd prisiau tocynnau trên yn Lloegr yn cael eu rhewi am y tro cyntaf mewn 30 mlynedd.

Dywedodd Plaid Cymru fod angen "dadwneud degawdau o dan-ariannu'r rheilffyrdd", tra bod Reform UK wedi dweud bod Llafur wedi cael "cenhedlaeth i sefydlu rhwydwaith trafnidiaeth effeithiol" yng Nghymru, ond eu bod "wedi methu".

Croesawodd rhai teithwyr yng ngorsaf Bangor y penderfyniad fore Sadwrn.

Dywedodd Gareth Williams: "Dwi'm yn dreifio. Dod i fama 'dwi, a neidio ar y trên a mynd i ble bynnag dwi isio. Dwi reit hapus efo'r prisiau."

Ond doedd Joshua Cooper o Gaerdydd ddim yn teimlo'n sicr a fyddai'r penderfyniad yn gwneud gwahaniaeth, gan ddweud fod tocynnau "dal yn ddrud, felly dwi ddim yn credu bod hyn yn mynd i gael llawer o effaith.

"Mae'n rhaid dod a'r pris lawr ac wedyn efallai bydd pobl yn mynd ar y trên."

Bydd y rhewi prisiau yn berthnasol i docynnau sengl ymlaen llaw, tocynnau dychwelyd a gwasanaeth newydd "tapio i mewn a thapio allan", yn ôl Llywodraeth Cymru.

Mae'r gwasanaeth "tapio i mewn a thapio allan" yn cael ei defnyddio ar hyn o bryd mewn rhannau o dde Cymru a dywedodd y llywodraeth ei bod yn bwriadu ei chyflwyno mewn ardaloedd eraill.

Dywedodd Eluned Morgan, "Mae mwy o bobl yn dewis teithio ar y trên yng Nghymru, mae gwasanaethau'n datblygu'n gyflymach ac maen nhw'n fwy dibynadwy."

Ychwanegodd y byddai'r rhewi prisiau yn gwneud teithio ar y trên yn "fwy deniadol ac yn rhatach".

Dywedodd Plaid Cymru bod angen "dechrau'r broses o ddadwneud degawdau o dan-ariannu cyllid rheilffyrdd gan Lywodraeth San Steffan" i wneud newid "pendant" a "datganoli seilwaith rheilffyrdd - rhywbeth y mae Llafur wedi methu â gwneud."

Ychwanegodd llefarydd ar ran Plaid Cymru y byddai'r blaid yn "brwydro dros yr hyn sy'n ddyledus i Gymru, fel y gallwn fuddsoddi'n iawn yn ein seilwaith a chysylltu cymunedau Cymru".

Dywedodd llefarydd ar ran Reform UK Wales: "Mae Llafur wedi cael cenhedlaeth i sefydlu rhwydwaith trafnidiaeth effeithiol yng Nghymru.

"Maen nhw wedi methu â gwneud hynny, a nawr maen nhw'n cael eu cosbi'n briodol am hynny."

Mae'r Blaid Geidwadol, Democratiaid Rhyddfrydol a'r Blaid Werdd wedi cael cais am sylw.