Y Cwricwlwm Cenedlaethol yng Nghymru
Fframwaith a ddarparwyd gan y Llywodraeth yw'r Cwricwlwm Cenedlaethol yng Nghymru, a'i bwrpas yw nodi beth mae'n rhaid ei ddysgu i blant yn yr ysgol, a pha bryd. Fe'i bwriadwyd er mwyn darparu sylfaen dda mewn iaith, mathemateg a gwyddoniaeth ac fe'i rhannwyd yn wahanol Gyfnodau Allweddol:
- Cyfnod Allweddol 3: 11 - 14 oed
- Cyfnod Allweddol 4: 14 - 16 oed.
Beth yw'r Cwricwlwm Cymreig?
Mae'r Cwricwlwm Cymreig yn rhan o'r cwricwlwm sy'n arbennig i Gymru. Fe'i bwriadwyd er mwyn adlewyrchu hanes, daearyddiaeth a diwylliant Cymru a'ch ardal chi.
Bwriad y Cwricwlwm Cymreig yw i ddatblygu:
- ymdeimlad o berthyn
- ymdeimlad o le a threftadaeth
- ymwybyddiaeth o bwysigrwydd iaith a llenyddiaeth yn hanes a bywyd Cymru
- dealltwriaeth o'r celfyddydau creadigol a mynegol yng Nghymru.
Beth sy'n rhan o'r Cwricwlwm Cenedlaethol?
Cyfnod Allweddol 3:
Bydd disgyblion yn cael eu profi mewn:
- Saesneg
- Cymraeg (iaith gyntaf ac ail iaith)
- Mathemateg
- Gwyddoniaeth
Y pynciau eraill a astudir yw dylunio a thechnoleg, technoleg gwybodaeth, hanes, daearyddiaeth, iaith dramor fodern, cerddoriaeth, celfyddyd ac addysg gorfforol.
Cyfnod Allweddol 4:
Mae Saesneg, Cymraeg, Mathemateg, Gwyddoniaeth ac Addysg Gorfforol yn rhan o'r Cwricwlwm Cenedlaethol. Mae hyn yn caniatáu i ddisgyblion ddewis pynciau a chyrsiau ychwanegol ar gyfer TGAU neu gymwysterau galwedigaethol.
Rhaid i blant hefyd astudio addysg grefyddol, ac mae'n ofynnol i bob ysgol ddarparu rhywfaint o addysg mewn sgiliau personol a chymdeithasol, addysg ryw, addysg sy'n gysylltiedig â gwaith a chyngor gyrfaol.
Safonau
Rhannwyd pob pwnc yn y Cwricwlwm Cenedlaethol yn gyfres o lefelau ar raddfa genedlaethol o 1 i 8. Mae'r lefel yn dangos pa safon y mae plentyn wedi ei chyrraedd. Mae lefelau fel grisiau ysgol ac mae plant yn dringo i fyny'r grisiau hyn o'r naill flwyddyn i'r llall.
Ar ddiwedd pob Cyfnod Allweddol, dywedir wrthych ar ba lefel (safon) y mae'ch plentyn yn gweithio yn y pynciau y mae'n eu hastudio. Pan fo'ch plentyn yn 14 oed, asesir y lefel hon gan athrawon a chan ddefnyddio tasgau a phrofion cenedlaethol a elwir yn TASau. Ar ddiwedd Cyfnod Allweddol 3, bydd y rhan fwyaf o ddisgyblion yn gweithio o fewn lefelau 3 i 7. Bydd y rhan fwyaf yn cyrraedd lefel 5 neu 6.
Yng Nghyfnod Allweddol 4, pan fo plant yn 16 oed, ni ddefnyddir lefelau'r Cwricwlwm Cenedlaethol er mwyn asesu - yn hytrach, bydd plant yn sefyll arholiadau fel TGAU.
