Mae'n ymddangos braidd yn greulon weithiau, ond mae gwaith cartref yn ffaith i blant heddiw, ac mae'n cynyddu mewn pwysigrwydd wrth i'r plentyn fynd yn hŷn. Faint o waith cartref ddylai plant ei wneud, sut allwch chi eu helpu, yn enwedig gyda gwaith cwrs ac adolygu ar gyfer TGAU, Safon Uwch a Safon Uwch Atodol?

Faint?

Mae gan y Llywodraeth ganllawiau yn nodi faint o waith y dylai plant o wahanol oedran ei wneud:

Blynyddoedd 1 a 2: un awr yr wythnos.
Blynyddoedd 3 a 4: 90 munud yr wythnos.
Blynyddoedd 5 a 6: 30 munud y diwrnod.
Blynyddoedd 7 ac 8: 45-90 munud y diwrnod.
Blwyddyn 9: 60-120 munud y diwrnod.
Blynyddoedd 10 ac 11: 90-150 munud y diwrnod.
Blynyddoedd 12 a 13: yn dibynnu ar raglenni unigol.

Os ydych yn meddwl nad yw'ch plentyn yn cael digon o waith neu yn waeth fyth ei fod yn cael gormod, cysylltwch â'r ysgol. Ond cyn i chi wneud hynny, ewch drwy'ch ffeithiau unwaith eto. Nid yw gwaith cartref bob amser yn golygu bod eich plentyn yn gorfod defnyddio papur a phensel. Efallai fod yr athro/athrawes wedi gofyn iddo fynd dros bwnc arbennig neu adolygu rhywbeth a drafodwyd yn y dosbarth y diwrnod hwnnw, neu ddarllen pennod mewn llyfr. Gall y math hwn o waith cartref fod yr un mor bwysig â chwblhau aseiniadau ysgrifenedig.

Cofiwch hefyd fod gan blant dueddiad i anghofio eu bod wedi cael gwaith cartref, ac y gallant newid ychydig ar y stori pan ofynnir iddynt a ydynt wedi cael gwaith cartref.

Os ydych yn meddwl bod gormod o waith cartref, mae'n bosib bod eich plentyn wedi methu â threfnu ei amser yn iawn, a'i fod wedi gadael i waith cartref diwrnodau (neu wythnosau) grynhoi. Ceisiwch ei helpu i sicrhau nad yw hyn yn digwydd eto. Mae'n siwr y bydd gan bob ysgol uwchradd amserlen gwaith cartref. Gofynnwch am gopi!