Drwy ddefnyddio dulliau dysgu amrywiol, gallwch helpu plant o bob oed i amsugno gwybodaeth a magu chwilfrydedd am y byd o'u cwmpas. Rhieni yw athrawon pwysicaf plant, ac mae'n bosib mai'r cartref yw'r amgylchedd dysgu gorau. Dyma rai ffyrdd y gallwch eu helpu i ddysgu gartref a golwg ar sut mae'ch plentyn chi'n dysgu.
Mae pob un ohonom yn dysgu mewn ffordd wahanol
Mae plant yn dysgu mewn ffyrdd amrywiol - wyddoch chi beth yw arddull dysgu eich plentyn chi?
Gall gwybod beth yw'r ffordd fwyaf effeithiol o ddysgu wneud y gwaith yn haws, yn fwy effeithiol ac yn llai o ymdrech. Does dim pwrpas gwthio gwybodaeth mewn un ffordd pan allai defnyddio ffordd wahanol arwain at gynnydd o dros 50% yng ngallu plentyn i amsugno gwybodaeth!
Beth mae arddulliau dysgu'n ei olygu? Wel, ydych chi'n darllen y cyfarwyddiadau er mwyn defnyddio'r peiriant fideo neu ydych chi'n pwyso'r gwahanol fotymau hyd nes y mae popeth yn gweithio? Ydych chi'n well am gofio'r lluniau mewn cylchgrawn yn hytrach na'r geiriau? Oes angen i chi ysgrifennu nodiadau er mwyn cofio pethau ac ydych chi'n cadw'r nodiadau wedyn neu'n eu taflu ymaith gan mai'r weithred o ysgrifennu'r nodiadau sy'n eich helpu i gofio?
