Does dim rhaid i blant fynd i'r ysgol. Yr hyn sy'n ofynnol yn ôl y gyfraith yw eu bod yn cael addysg briodol ac mae llawer o rieni'n argyhoeddedig mai'r ffordd orau o ddarparu hyn yw drwy ddysgu eu plant gartref.
Mae rhai rhieni'n teimlo bod eu plant yn methu â dygymod â bywyd cythryblus yr ysgol; mae eraill yn dysgu plant gartref gan eu bod yn meddwl bod addysg arferol mewn ysgol yn ffordd ddigalon, ddi-fflach ac aneffeithlon o addysgu plant.
Nid oes cofrestr swyddogol ar gyfer plant sy'n cael eu haddysgu gartref, felly mae'n amhosib dweud faint yn union sydd yn y DU. Mae'r amcangyfrifon yn amrywio o ffigwr ceidwadol y Llywodraeth o 25,000 i nifer anhygoel o 150,000 - hynny yw, 1% o'r boblogaeth oed ysgol. Yn ôl un adroddiad gan y BBC, mae addysg gartref yn dod yn fwy a mwy poblogaidd yng Nghymru.
Gan fod y rhyngrwyd bellach yn cynnig amrediad cynyddol o adnoddau addysgol sydd gystal bob tamaid â'r rhai sydd ar gael mewn ysgolion, bydd llawer mwy o rieni'n cael eu temtio i ddysgu eu plant gartref. Cyn gwneud y penderfyniad hwnnw, bydd angen iddynt feddwl o ddifrif, am y manteision amlwg, a hefyd am yr anfanteision difrifol.
Er mwyn cael mwy o wybodaeth, ymwelwch â gwefannau sefydliadau amrywiol sy'n ymwneud ag addysg gartref.
Manteision addysg gartref
Mae plant sy'n cael eu haddysgu gartref
- yn cael llawer mwy o sylw unigol nag y byddent yn ei gael mewn dosbarth arferol
- yn gallu dysgu ar eu cyflymder eu hunain, a dilyn eu diddordebau eu hunain, heb gael eu llyffetheirio gan y Cwricwlwm Cenedlaethol, gan nad yw'n ofynnol i blant sy'n cael addysg gartref ei ddilyn.
Mae'r rhai sydd o blaid addysg gartref yn dweud bod hyn yn golygu bod plant yn fwy brwdfrydig a bod ganddynt fwy o hunanddisgyblaeth. Dengys gwaith ymchwil a wnaethpwyd ym Mhrifysgol Durham bod plant hefyd yn debygol o wneud cynnydd academaidd llawer gwell na'u cyfoedion sy'n mynychu ysgolion cyffredin. Mewn erthygl yn y Times Educational Supplement, mae rhieni'n amlinellu rhai o'r manteision eraill.
Anfanteision addysg gartref
Mae beirniaid addysg gartref yn poeni
- y bydd plant yn colli'r cyfleoedd a geir yn yr ysgol i ryngweithio â'u cyfoedion a datblygu sgiliau cymdeithasol
- na fydd rhieni'n ymwybodol o'r datblygiadau addysgol diweddaraf
- na fydd plant yn gallu manteisio ar labordai, campfeydd ac adnoddau eraill sydd mewn ysgolion
- na fydd ehangder addysg plant a'u cynnydd yn cael ei fonitro'n ddigonol - yn enwedig gan nad yw'n rhaid iddynt ddilyn y Cwricwlwm Cenedlaethol na gwneud TASau.
Cyngor gan yr Adran Addysg a Sgiliau - Canllawiau'r Llywodraeth
Sefydliadau
Home Education sy'n cynnwys llawer o adnoddau a dolenni cyswllt i fynd i dudalennau eraill.
Education Otherwise - sy'n cael yr enw gan fod y Ddeddf Addysg yn dweud bod yn rhaid i blant gael addysg "naill ai drwy fynychu ysgol yn rheolaidd neu mewn ffordd arall."
Gwasanaeth Ymgynghorol Addysg Gartref sy'n cynnig cylchlythyr chwarterol a llinell gyngor, ymhlith pethau eraill, i danysgrifwyr.
Ar gyfer rhieni sydd â diddordeb mewn dod ag adnoddau at ei gilydd er mwyn sefydlu eu hysgol anffurfiol eu hunain:
Human Scale Education Cyhoeddiad misol annibynnol ar gyfer addysgwyr cartref.
Llyfrau defnyddiol
Free Range Education - how home education works, Golygwyd gan Terri Dowty, £12.99 Hawthorn Press
Learning Unlimited, Roland Meighan, £7.95 Educational Heretics Press
Doing It Their Way, Jan Fortune-Wood, £11.95 Educational Heretics Press
Darllennwch brofiad Tracey Griffiths o addysg gartref.
Dyw'r BBC ddim yn gyfrifol am gynnwys safleoedd rhyngrwyd allanol
