 | 
![]()
![]()
|  | Arddangoswr: Patrick Thomas
Roedd y prosiect hwn, a leolwyd y tu allan i Drefynwy, yn cynnwys troi adeilad gefail ar stad o'r 19G yn annedd, ac i ychwanegu estyniad bychan yn y cefn a stiwdio ar wahân i'r arlunydd Barbara Crow. Roedd yr estyniad yn adlais o bensaernïaeth 'Celf a Chrefft' gwreiddiol yr efail. Bu hyn yn ddylanwad ar y stiwdio hefyd, fel y bu ei diben a'i lleoliad, a datblygodd yn bafiliwn syml cyfoes, yn siâp cleddyf pengam ar y cynllun, â tho 'gwyrdd' wedi ei blannu.
Adeiladwyd y stiwdio yn erbyn wal garreg gynnal grom a oedd yno eisoes ac y mae'n wynebu coedwig o glychau'r gog ar draws nant hudol. Mae'r adeilad yn lledu fel y mae'r safle'n caniatáu; mae'r ddwy wal grom yn cael eu rhychwantu gan ddistiau agored a baentiwyd yn wyn a'r rheini'n mynd yn fwy trwchus ac yn nes at ei gilydd wrth iddynt gynyddu o ran lled. Ffrâm goed ysgafn yw'r strwythur sy'n cynnwys deunydd inswleiddio trwm. Plannwyd y to â bywlysiau (sedums), nad ydynt angen llawer o gynhaliaeth, ac y mae eu lliwiau'n newid gyda'r tymhorau.Mae Patrick Thomas yn bensaer sydd â chefndir o weithio ar brosiectau adfywio ar raddfa eang ond sy'n gweithio ar ei ben ei hun yn y pegwn arall bellach, gan geisio cynhyrchu adeiladau syml o ansawdd deniadol nad ydynt yn glynu at unrhyw ddogma arddulliadol, er eu bod yn cael eu dylanwadu gan lawer.
|
|
